المراهقة والأربعيني الحلقة (11)
المراهقة والأربعيني
الجزء الأول
الحلقة (11)
طلع وصفك الباب وراه.. وصاح ليليااااااااان..
-يمه .. احس كلبي وكع بالكاع من صاح..
حتى رجليه ما بيها تمشي وتشوف شيريد..
اندار الحجي :- دحكي رجلج يابه شيريد
-اي.. تركتهم. وطلعت.. لكيته عبر البايه الاخيره من
الدرج.. صعدت وراه.. الباب مسدود.. دكيت الباب صاح دخلييي..
-دخلت.. بس كلبي دكاته من الخوف طبل..
دحكتو نازع قميصو.. وفاتح الكنتور .. دنكت و كلتلو.. ها عمو.. تقرب وكال
-انتي شكو وتحجين هاااا.. منو طاااالب
رأيج
-اسفه عمو والله ما علقصد بس ردت احجي
الحقيقه.
-وانتيييي شكو .. منو سامحلج ادخلين
نفسج .. دحكي ليليان.. انجن من المره الفضوليه والحشريه ف لا تصيرين هشكل تره
بالقران ائذيج..
-تمام عمو والله بعد ما اعيدها..
-لج بابا ابن سعد عايش ويانه تفتنين
علي وطلعت عليج.. شلج بهلهوسه.. مره غريبه انتي شدخلج بين البصل وكشرته..
واليدخل يا بويه ميحصل غير الدموع
-ما علقصد والله لان دحكت هيام تبجي
انقهرت وحجيت.. وبعدين هو صدك كال هيج خطيه يعيره..
-يحجي وهو يطلع بملابسه ومهووس.. كلت
هيج اندارلي.. واتقرب.. بعدج مصره..
-دنكت وغمضت لا ما مصره..
-دحكي ليليان.. لو شفتي واحد.جايب عبوه
ويريد يفجر البيت ممنوع منعا باتا تفتنين.. شتشوفين شتسمعين. تتجاهلين وكأن ما مر عليه..
مفهوم ؟؟؟؟؟
-هزيت راسي..
-يحتاج اعيد لو حفظتي الدرس ؟
-لا حفظتو..
-عفيه وهسه طلعي.. دا ابدل..
-تمام.. تركتو.. وطلعت الحمدلله عدت
على خير.. كلت نذبحت من عيونو المخوزره..
عاد.ما نزلت.. رحت للحمام.. استخدمته وطلعت.. دحكت صراع دخل
على غرفة حلا وعلي كاعد بيها..
مشيت ادحك عليهم. فتحت الباب.. خو يحجي اندار دحكني
ورجع يحجي وي علي..
وانته حبيبي وتعرفني شكد اعزك.. والبيت بيتك واذا يسمعك كلمه
كلي اكص راسو.. وانته البطل.. واني ماده راسه اسمعلهم..
عاد قطع حديثو.. وكال يولي كتلنا البرد لو ادخلين لو تولين..
سديت الباب ما دخلت.. شو يفشلني..
بقيت ادحك ع الطابق الفوك براحتي.. شفت درج بعد يصعد.. مشيت دا
اريد.اصعد.. زكح هااااي وين موليه..
-وانته شطلعك.. درتلو.. عمو بس دا اشوف
فوك..
-نزلي عيب ..
-تمام.. مشيت دا انزل.. كضبني من ايدي..
-يولي انه مو كتلج اكره المره الحشريه
شعندج دخلتي تتسمعين..
-بعد ما اتسمع..
-نكث ايدي.. نشوف .. عدل قميصو.. وكح
مدري مح.. مدري شنو معناها استعداد لنزول..
ونزل كبالي يميل بكتافو من يمشي.. وشكلو وطولو هيبه ابتسمت..
بابا كان ضعيف هذا طويل وكتافو عراض.. وتارس ما ضعيف
والاهم شي بيه.. هو عطرو.. قبل لا يجي.. عطرو يصل گبلو.. دحكت
بأيدي.. احس العطر بعد بيها..
شميت ايدي.. اي عطرو طابع على ايدي.. عجل شكد يسبح بالعطر..
نزلت اساعد بالعشا مرت سعد وجها ما يكصو السيف وتنافخ بوجهي..
عاطت بيه علمود التكلى..
كتلها شبيج تنافخين بوجهي.. دكلي رجلج ما كادر بس على ولدي..
وابن هيام يبوس ويحظن بيه تكول ابني ابن البطه السوده..
-عجل متحجين هلحجي بوجهو.. لو تريدين
اني اوصلو ما فهمت..
-اششش شتوصلين مكصوفة الركبه. ايالج وبالج تحجين شي..
-عجل اني شكو وجايه تلوميني على
تصرفاتو ورجلج ورجلج ذاك هو واحجي وياه..
-بره منج شنو يبتلي اليحجي يمج..
-تركتني وراحت تصلي المغرب كلهم..
ديصلون واني واكفه ع الطباخ .. صبينا الاكل واجتمعنا.
كملنا.. كعدو يشربون جاي على ما يأذن العشاء.. يصلون ويطشون..
اللي يروح ينام واللي يطلع بره من الولد..
كملت مواعين الاكل.. ودا ادخل.. سمعت عياط من غرفة سعد.. مرتو
تكلو اخوك يكفخ وانته ما بيك ترده عجل المن مكعدنا هنا حس كول ملينا من الشاكل
رديت.. ادخل.. طلعو جنطهم وراحت نوال لام سعد دتكولها اني
رايحه لاهلي..
-دخلت لغرفة الحجيه.. كالت هيام..
هاا..كتلها نوال راحت لبيت اهلها.. كالت گلعه خل نفتك شويه..
كعدت.. وحلا وساره وعلي نزلو جوه بالبيت .. حلا سوت جيلاتين و
ساره تكصص الموز.. واني واكفه وياهم..
ساره ابتسمتلي كالت تشاركين.. ضحكت.. اي..
-عجل كسري البسكت و زتي فوكو النوتيلا
وخبطي.
سويت مثل ما كالتلي.. جبنا كاسه كبيره زجاج..
سويت مثل ما كالتلي.. جبنا كاسه كبيره زجاج..
رصيت البسكت المخلوط كاكو.. وساره طفطت الموز فوكو.. وحلا شمرت
الجلي فوكو.. وخلينا شوي برا ..
وبعدها ضمينا بالثلاجه.. اجه علي للمطبخ.. راد يمد ايدو واني
ادحك.ع الجلي احمر يجنن بس مدها ضربتو لااااا.. تعبنا بي..
-بس اكل وياكم
حلا:- تنطينا فلوس .. شنو اني كوه طلعتهم من جيب بابا وانطاني
اشتريت مواد تجي حظرتك ع الحاظر تاكل..
علي-وليليان هم ع الحاظر..
-رفعتلو ركبتي.. ليش متدري هو يصير
زووووجي يعني فلوسي حلالي
كلهم ضحكو.. بس حلا ضاجت.. كال وساره.. كالت اني ساعدتهم.
-عجل انطيكم كل واحد ربع شرط نلعب
وتفوزون علي ..
كلنا گلنا ماشي.. ورحنا نلعب اسم حيوان نبات جماد.. وننطي حرف
واول واحد يحزر اسماء الحرف ويكمل يدك ايدو بالكاع ويكول قبط..
احنه نلعب وهيام والحجيه كاعدات يسولفون.. اجه صراع.. وبأيدو
علاكة حلويات.. اني دحكت عليها ونسيت اكتب..
بساع دك علي وصاح قببببط.. وتالي حطيت ايدي اخر وحده.. ضحك
صراع لان ملمومين نلعب شال العلاكه وفرغها فوك روسنا ويكول اكلوووو دام خالكم طيب..
الحجيه:- لا هيج يمه مو كله اكله وحده جان وزعتلهم
-دعوفيهم يا حجيه خلي ياكلون براحتهم..
-كمنا نلعب و ناكل بس علي لوتي شاف حلا
غلبته بنقطه كام انطانا حرف ظ .. وخلانا ندوخ بالاسماء منين نجيبها..
ف حلا ضاجت كالتو والله تغش هذا ماكو بي اسماء.. كاللهم
بكيفكم.. عاد كلبو يلعبون صراحه.. بطل بيبسي ويفروه بصينيه..
وين يصير حلك البطل.. هو اليسألوه.. والمايجاوب بصراحه ينضرب
10 نعالات بيدو...
صار على ساره .. انوبه عليه.. وهيام والحجيه وصراع يضحكون
ويانه ومتفاعلين.. سألني علي هم مره بايكه فلوس ..
ويحجي وشايل النعال ويرفعلي بحواجبو.. ههههههه كلتلو اي ..
بساع اجاني السؤال من وراي..
صراع:- من منو بايكه..
-من يحيى..
-ليش ممعلميج البوك حرام..
-لا علموني بس من مات بابا خوالي
يصرفون علينا وبيومها ماما ما موجوده.. وردت اطلع الصبح للمدرسه وما عندي فلوس ويحيى
نايم.
طلبت منو ما قبل يعطيني عاد جريت الف من محفظتو.. وطلعت
للمدرسه..
صراع:- هااا.. غيرو اللعبه ولا اطلعون اسراركم عيب .. وكومو
نامو ساعه 12 ونص
كمنا.. راحت حلا جابت الحلاوه السويناها وجايبه خواشيك.. اول
شي اكل منها صراع وبعدها احنه وكعنا والحجيه تصيح دهر صابكم دطونه شويه وياكم
ندّحك عليكم نضل..
صبينالها بماعون.. وصراع من فوكنا يمد وياخذ بخاشوكتو وهو
واكف.. كملنا غسلنا ونمنا.
الصبح كمت الشغل بس عليه.. هيام خلصت الريوك وطلعت للسوك..
كملت البيت.. اجت جايبتلي ملابس
جبه للطلعه كالت ميقبل صراع اطلعين ابنطرون او تنوره الا جبه
او عبايه..وجابت و3 حجابات و 3 كلبيات قديفه حاضر مال بيت..
ووحده كلش حلوه بيها كبوس وحافاتها فرو وبيها لولو كاتي ..
ولونها وردي ..
لبستها.. دا اقيس.. طلعت من الحمام.. دا اروح لغرفة الحجيه..
نزل صراع وهو يكول دحكي يولي..
اندرتلو.. فصلني تفصل وهو يدحك..
-المن هاي
-هيام جابتلياهم هسه.. عفتو وفتت فات
وراي.. كالن تخبل عليج تجنن بالعافيه.. صراع ما عاجبو..
كال:- ام علي الوانهم مو فاتحه حيل
-اي غير شابه يا صراع عجل تريدها تلبس
جوزي لو اسود..
-مو هي منا البنيه ضاويه الله يستر
عليها وتلبس هيج الوان.. تجيب العين يا ام علي..
-
يا خويه الله خالقها ضاويه ما بيدها
قابل انت اطفيها حرام بنيه شابه من حقها تلبس لا بعمري ولا بعمارنا احنه الاكبار
حتى اجيبلها الوان غتره..
شاف من بين الكلبيات.. وحده لونها نفطي.. كال هاي من يجي احد
لبسيها لا تلبسين هاي.. صراحه ضجت.. صح النفطيه حلوه ما قاصره بس شنو حتى من الوان
الملابس يحرمني..
حجاب لبسني.. كلبيه ولبسني .. وحتى الوان بكيفو.. هو جبير اني
شنو ذنبي اكبر نفسي والبس مال عجايز..
عاد تركتو وطلعت.. انظف غرفتو.. اخذت دشاديشو وخليتهم بالغساله
وخليت تايت... نضفت غرفتو ومسحتها وعطرتها ورحت شريتو ملابسو..
ونزلت هيام ماخذه جهالها وطالعه .. و صراع كاعد على موبايلو..
دخلت للحجيه تمتمت وي روحها..
وتلبس بجواريبها.. كتلها ها حجيه خير وين ..
-يولي هذا ابن فطيم البارحه اندعم
واليوم اول نهار الفاتحه .. خليني اروح بسرعه الحك عليهم.. ديربالج ع البيت ومالج
شغل بأم سعد شتحجي سدي اذانج ولا ترادديها وتكضبها عليج..
-تمام.. طلعت..
جان صراع صاعد والحجي طاب بغرفتو.. طلعت ام سعد والحجي من
غرفتهم.. كال والله مشتهي سمج مزكوف..
كالتلو الجامد ما يصير طيب مخليتو بس للكلي روح جيبلنا طازج
ونسوي ..
والله شو ابو ثرب ما جذب خبر مسك الدرب وراح على عينو يرضي
كرشو ويشتري .. واني
شلون تلعب نفسي من السمج.. اموت منو..
ام سعد.. كالت حظري الصواني مال الشوي وطلعي الخضره نضفيها
لبين ما يجيب السمج..
اني هم رحت احظرهم.. سمعت تلفونها يدك.. ردت عليه وتحجي
باستعجال ودكلهم هسه اجي انتظرواي واجت .. وتكول ولج نويزك جاي تطلك انه اروح بساع
عمت عيني عليج يمه الهي يسهللها ..
-يعني حترحين
-عجل اكاااابلج.. اكلها بنيتي تطلك..
-والسمج
السمج من يجيبو نضفي وتبليه وخلي طماطه وبصل وفليفله بالبدايه
وحطي السمجه فوكهن ولا تنسين اتخلين الليمون يكتل الزفره..
تحجي وهي تركض على جواريبها وفلوسهه وموبايلها وعبايتها..
شلشتني. وتحجي وتعلم وتمشي..
كالت افتهمتي يلخايبه مو اتخربيها.. هزيت راسي وكتلها اي اي
خاله شيرادلها روحه للقاضي كلشي افتهمت هو سمج
-عجل انه رايحه عود خبري للحجي..
-ماشي..
-طلعت واني كلشي ما مفتهمه.. هاي شلون
حدبرها.. يلا هو ارشها بملح واخليها بالفرن عجل شسويلها..
شويه وفات الحجي.. وجايبلو علاكه بكبر كرشو ابو ثرب .. هو يتشهى وانه الاكع بيها..
خلاها وكال.. عجل وين ام سعد.. كلتلو نويزك جاي تطلك وراحت..
كال هاا.. خل اخابرها..
-روح خابرها شعليك قابل انته راح تسوي
السمج.. جبت صينيه وشمرت العلاكه بيه.. يمه شنو هاااااي
السمجه حلكها مفتوح وعيونها مخوزره وترجف.. لا لا يربي شنو هاي
اني الزمها..
طب الحجي.. وانه بهلضيم بدي الزمو اذبحو على مشتهاتو الواكعه
براسي.. كال دحكي بويه انه رايح لسعد للمولد اكعد يمو بالمولد..
بعد صلاة الجمعه ان شاءالله اجي .. السمج نضفي زين واريدو طيب.. طلع وان
اقلد عليه اريدو طيب ابو ثرب بالله هسه اني شباليني بهلبلوه
الله لا ينطيك يحيى على هلزواجه هاي.. يربي بعمري كلو ما كاضبه
سمجه.. جنه اذا نشتهي ما نجيبو عدل.. نشتري جاهز و مشوي من منطقة الميدان يم جسر
القديم
الا لا كاضبه سمج ولا داحكه زعانف ترجف .. يمممممممه.. وين
رحتي وعفتيني لهضيم يمممه
جانت اذا تشتهي تجيبو صغار يتقرمش وما يكشش شو هذا ابو ثرب
جايب السمجه بكد الحوت وحلكها تشبه حلكه يا سبحان الله..
يربي شلون اكضبها.. اخذت علاكه وجبت سجين حيل جبيره وكطمت
راسها.. يااا شو هاي راح نصها.
اي هاي هيه قابل ياكلون الراس شنو ما وحوش وياكلون الروس.. لا
اكص الذيل منا حتى تصير مربعه حلوه..
كصيت ذيلها شو احس السمجه خلصت.. يا ربي اليجيبولنا مشوي ما
هيج مكصوص عجل هاي شلون اسويها
ادحك.بيها كشور كبار.. شلون اكشرها.. ردت الزمها بعدها ترجف
واني مكصكصتها يربي شلون مشكله هاي دموتي
حايره بيها وكفختني ريحه طيبه غير ريحة السمج الوصخه واسمع
خطوات تجي للمطبخ. دحكتو صراع لابس دشداشه بنيه ولاف غتره على راسو وسبحتو بيدو..
..
وكف على راسي .. يولي شو ماكو احد..
-
راحو .. احجي واني حايره بالسمجه..
-وين راحو امي وين..
-ابن فطيم اندعم ومات وراحت
-يا ابن فطيم هذا
-شعرفني كاعده وياها
-زين وام سعد.. ابوي وين
-بالله هذا شكد يحجي واني حايره بهمي
.. ام سعد راحت لنويزك تطلك وابوثرب ااا ما ادري ما ادري راحو
-يولي احجي عدل شنو ابو ثرب شنو نويزك
فطيم منو
-اي يا عمو غير هاي اسماءكم عجل اني
جايبتها من جيبي
-يضحك ويهز بيدو.. زين نوال شوكت
راحت.. ليش وحدج بلبيت
-نوال طكت روحها وهجت
-شنو ليش هجت
-تكول لسعد اخوك يكفخ بأبنه وانته ساكت
وتعاركت وياه وراحت..
-وانتي تتصنتين عليهم اني مو كتلج بطلي
حشريه والسانج كضبي
-عمو انت سألت واني جاوبت وما متصنته
والله همه صياحهم واصل لاخر العالم اشلون اسد اذاني
-هههههههه استغفرالله ربي
. زين انتي شدسوين وشنو هلخربطه الكدامج. يحجي ويأشر بسبحتو
. زين انتي شدسوين وشنو هلخربطه الكدامج. يحجي ويأشر بسبحتو
-متشوف الضيم الحجي اليوم تشهه سمج
ووكعت براسي واني ما اعرف..
-زين انه اريد اروح صلاة الجمعه شلون
اتركج وحدج حتى حرب وحلا راحو لخوالهم..
-ما رديت عليه ادحك ع السمج وبودي
ابجي.. هو مشى مني وكف يتصفن اباب المطبخ ومنطيني ضهرو
اندرتلو عمو فد.سؤال..
-شكو
-هاي شلون انضفهن فدوه والله ما اعرف ..
-عجل منو مصخم وجهج وكايلج اشويلنا سمج
-ام سعد..
-ههههههههههههه .. تقرب ودحك ع السمج لا يا مكصوفة
العمر.. هاي شمسويه.. الراسو وينو
-ليش انتم تاكلون حتى الراس..
-يولي حتى الذيل كاطمته
-عمو هسه فدوه بس كلي شلون انضف الكشور
والله صعبه..
-ولج يا بابا هو انتي مبقيه بيها كشور
كالبه جهرته للحيوانه ليش هيج
-يعني بعد متصير... اوووي شلووون يربي.. الحجي والله يرزلني وشيخلصني من ام
سعد. ما تسكت..
-دكومي يابه كومي اليوم الله ما كاتب
علي صلاة بالجامع شكلي راح اكابلج انتي و السمجه.. صعدي جيبيلي هدوم خل ابدل..
بس بالاول غسلي اديج مو تزفرين ملابسي..
-تمام.. ركضت غسلت وجبتلو تراك بساع..
دخل بغرفة الحجيه بدل وطلع..
دحكتو شكد حلو.. ما اعرف اني ما كنت منتبه لهيبتو بس ادحكو
جبير بالعمر بس حلو .. مهيوب ووكفتو ويايه بالمطبخ ما اعرف شلون اوصفها
عطرو ملا المكان.. ويمكن لاول مره بحياتي اوكف مع رجال غريب
بنص بيت وحدنا.. وكف يكشر ومرتاح ما متشنج مثلي..
طلع اللخ بدون ميكص الراس.. نضفها وملحها وذب عليها بهارات.. وكال
دوريلي هاي التهرس ثوم.. رحت دورتها.. اجه يكلب وياي بالجراره واخذها .
تبلها بليمون ودهنها معجون .. وكال شغلي الفرن وبالج تحطيها
والفرن بارد خل يحمى ترة تيبس وتصير ما طيبه..
كتلو تمام..
-جيبلي صابون دا اغسل
-هذا زاهي
-لا باباتي زفره تعلك باديه اريد صابون..
-ركضت جبتلو واجيت.. هو يغسل وريحتو
شكد عجبتني.. كتلو عمو شنو اسم عطرك.. كلش طيب
-ابتسم وكال BOSS
-لا عيب شنو هلاسم
-يم العقليه التعبانه هاي ماركه ما مثل
البراسج
-ذوله شكد ميستحون.. انوبه فشلت من
سألته وهو يضحك.. راد يروح كتلو وين..
-اروح اقره قران ربع ساعه وتصير
الصلاة.. ديري بالج بس يحمى الفرن حطي السمجه.
-تمام. شفت الفرن سالفتو طويله.. رحت اخذت
ملابس من اللي جابتلياهم هيام.. ورحت للحمام...
عجل بس هو نضيف وريحتو تعط واني كلي سمج.. رحت سبحت وطلعت ...
اسمعو يجود بالقران..
حتى الايه حفظتها كد.ما يركز على حرف النون ويجر بيها بصوتو...
(الم اعهد اليكم يا بني ادم انّ لا تعبدو الشيطان انه لكم عدوا مبين)
على كل حرف نون يمد ويجر.. شكد استمتعت واني اسمع.. فتت للمطبخ
يماااااااااي
السمج جاراتو البزازين وياكلن بي.. صحت بش ولجن بششششش .. وشلت
السمج بعلاكه .. وحطيتو وسديت الباب..
يا الله هاي شلون شسوي والله يكصون ركبتي كلشي ولا كروشهم..
رحت للصاله .. وكفت
يمو.. كتلو عمووو.. صدق ورفع راسو.. كال ها ليليان.
-البزون
-اجلتهن موو عفييييه عفيه ببنيتي
النادره..
-زين عمو شسوي..
-
عجل يلفاهيه غير تسدين الباب..
-اني شدراني اكو عدكم بزون غير تكول
وهاي راحن السمجات من وراك.
فتح عيونو حيل.. هاي فوك الخلف الله ذبيتيها براسي يول..
-عمو هسه دعوفي من السوالف و كلي شسوي
الله عليك والله يضل يحجي اخاف.. اني بشاربك..
-ههههههههههههههههههههههههههه شلون
شلون.. انتي بشاربي .. دكومي دا اشوف شمصخمه .. طبك المصحف وكام
-كمت وياه وهو مشى كبالي .. ويحجي زين
كلهم اكلتهم البزون ولا بقت وحده
-اي كلهن
-عجل دبري نفسج وي الحجي انه حتى غده
ما اريد..
-كضبتو من ايدو لا عمو فدوه دخيلك..
انه داخله بعرضك..
اني كلت هيج وهو تفلش ضحك بعمري ما سامعتو هيج يضحك...انتجه ع
الحايط يكح ويشحط.. رحت جبتلو مي وبكلاصو كتلو شوف وهاي جبتلك بكلاصك فدوه خلصني..
-يعني رشو مووو.. هههههههههه دكومي ام
العرض نضفي هلخيسه وانه راح ادبر الفاينه مالتج.. بس بالاول اصلي الضهر ...
-راح يصلي اني كمت للمطبخ غسل وتشحيم
الزفر شاحطه شحط.. هو طلع واني انضف.. كملت تنضيف ادحك نفسي صايره مي .. رغم بارده
عاد رجعت سبحت ودخلت بغرفة الحجيه امشط.. طب هو. كال بالعافيه يابه..
-شكرا..
-اذا خلصتي تعاي للمطبخ.. كمت وياه..
دحكت ع الطبله علاليك بيض وبيهن شغلات مسلفنه جايب 4 سمجات مشويه.. وخبز ابو
السمسم و طرشي..
-كتلو عمو ما اعرف شلون اجازيك والله
نقذتني ..من الفرحه بستو بكتفو..
-ههههههههه ضحك.. ومسح على راسي.. يلا
تهون باباتي تتعلمين شويه شويه..
-زين شوكت ناكل
-لا اكفي يجي الحجي.. وامي.. والا اكلج
خل اخابر هيام خطيه تاكللها سمجه.. والا اوديلها البيتها
-لا خل تجي كلش اضوج اذا ما هي بالبيت..
-عجل اخابرها..
-عفتو راح يخابر.. شلت السمج من
مواعينو المسلفنه وخليتو ببلامه فرفوري.. وغطيتهم وحظرت كلشي ع الطاوله ..
سمعتو يصيح.. ليليان الباب سدي والمواعين والعلاليك ضميهن..
صحت تمام تمام..
لميتهم العلاليك والمواعين وطلعت ازتهم بالحاويه.. طلع وراي..
كال انطيني خل اشمرها..
اخذهم من ايدي واني دخلت امسح بالكاونتر واعطر المطبخ من
الزفر.. دخل ينكث بايده ويصفك بيهن ويكول
اي ليليان تعودي مثلهم سوي المصايب وزتيهم على كلبي وانه
الاطمطم لا من شاف ولا من دره ..
-ههههههههه يلا عمو تهون .. تركتو ورحت
للغرفه كعدت ع التفزيون.. طلعت اغنية احبها عليتها شوي وكعدت اسمع واني امدده على
سرير الحجيه
صاح هو شنو هذااااا الصوووت.. ودخل.. فزيت من مكاني.. ها عمو..
-شنو هلاغاني تره ما اقبل ابيتي تتشغل
اغاني حرام.. سديييي..
-اي طفيت التلفزيون من اساسه من الخوفه.
-انتي شنو متعلمه ع للاغاني
-اي اسمع مرات
-ما اقبل ابويه.. ذول ما وراهن غير
المصايب اطير البركه من البيت وادخل الشياطين.. وتكب المشاكل
-بكلبي كلت عاد.شلون شياطين ابيتك
ابليس يتعلم منهم.. بس ما حكيت وبقيت بس اهز براسي واكلو تمام عمو..
يحجي ودخل الحجي كالو صراع ها صلاة مقبوله.
-تقبل اعمالك عجل ليش ما جيت لصلاة
الجماعه
-ما احد بالبيت بس هلبنيه شلون اتركها
واطلع..
-ما كملت الغدا ترانا جوعانين..
-اصبر امي جايه بالطريق و رايح اجيب ام
علي تاكل خطيه..
ليليان:- بس طلع صراع دخلت ام سعد وبتها التطلك ومره غريبه ما
اعرفها.. صاحت ام سعد ماي بساع
رحت جبتلهم.. كوه تكعد الحبله.. وتكلها مني هاي..
-ما تعرفينه الخايبه الطمت اخوج صارت
الخانم بهلبيت
-اي دام صراع وراها شنتوقع.. غير خراب
البيت
حجت المره الغريبه..:- يعني هاي مرت صراع ؟
ام سعد:- خليني ساكته وبالعه الهم.. شبيدي واسويي.. الا بوديه
اكلها بعظامها..
-خفت منهن.. ردت اروح جان تحجي المره
الغريبه.. عمت عيني عليج خيه وجدان طمتج التراب واجت بت الشوارع تاخذ مكانج
-سديت باب غرفة الحجيه وكعدت.. حيل ضجت
من حجيهم.. مدنكه وطبت هيام. ها ليونه شبيج .. وشمرت العبايه..
-منو هاي المره البره..
-نازك اختي من ابوي و سوسن مرت المرحوم
رجلي اخت وجدان..
-هااا
-سمعنج حجي مو
-هزيت راسي.
-شكالن
-خليهن لا تهتمين من غيرتهن وحقدهن
يحجن هيج معليه بيهم..
-اي عفيه معليج بيهن.. طبت الحجيه كامت
تحجي هي وهيام ع الفاتحه.. رحت للمطبخ احظر السمج..
طلعنا مدينا سفره اني وهيام. واجو الولد كعدو وام سعد والحجيه
وكلها التمت... حجت الحجيه عاشت ايدج ليونه شلون سمج ما ينشبع منه..
عجل شلون تكولين ما اعرف اطبخ ..
-هااا ااااا.. وبقيت ادحك لصراع.
-انه وياها سويناه يمه.. انه انطيها
تعليمات وهي تنفذ وشوينا سويه
-هيام ضحكت.. عاشت اديكم والله شلون
نفسيه حلوه طابخين بيها.. حيل طيب..
سوسن:- والله وكت يا ابو حرب توكف المطبخ وتطبخ وي المره..
نسيت ذيج شكد.جنت تكفخ على راسها..
تالي تصير خادم للزعطوطه وفرحان تطبخلها..
-حرمتي هي لا انه خادمها ولا هي خادمتي
وانه قررت افتح صفحه جديده بحياتي بعد ما دحكت النسوان الوان بيهنال تشل الحال
وبيهن تهدي البال
اوين ما بالك يصفى كلبك يحط.. حجاها وكال الحمدلله.. عاشت ايدج يابه
.. وخله ايده على متني تجى وكام.. خلاهن يفورن والوجه صار ينطي الوان..
وهيام تضحك.. وتكله الله يريح بالك يا خويه ويبعد عنكم كل عين
نكسه بجاه الحبيب المصطفى..
-هو مشى غسل وصعد.. وام سعد حجت.. زلم
ما تلام يموتون على الزعطوطات والمره الخضره الصفره حتى لو جانت كح...
بس الزينه محد يريدها ويشل حالها..
هيام:-اي والله لا عاب حلكج .. ما تشوفيها هلكاعده كبالج سنين
ودهور محد كلبها لنها زينه وبت اصول
ما باكت رجال من عياله وخلت جهاله يموتون جوع وابنه يدور اللكم
بالشوارع حتى يوكل امه واخته
ام سعد -شگصدج يهويمه
-ما گصدي شي.. بس جاي ابينلج ان ذاك
الشبل من هذا الاسد والخلف ما مات فرق بينهم.. صراع وفى لمرته وهي عاله كلبه وما
ركض وره النسوان لنه عاگل واخو خيته ما تغره النساوين
بس ... الله اليسامح شنكول..
-
گصدج ابوج مو اخو خيته موو..
-خاله لا تكعدين تشبهين ليليان بوجدان
تره لو نفتحت الدفاتر العتك وانلچمت الكلوب ف الكلام ما يسر ..عاد خليها مچودره
احسن
-چنچ ما ناويتها على خير يهويمه
الحجيه:- يمه ام علاوي فدواتج سكتي ما بينا حيل
-والله خاله الخير اليجيني منكم ما
اريده.. الله يحفظلي ابو حرب حتى باللكمه يخابر ويعزم.. ما محتاجه خير احد..
-خافنچ ما تدرين ابوج الدز السمج ماهو
اخوج.
-والله عاد ابوي اخويه.. الخير خيرنا
ما ماكله من چد احد..
سوسن:- بعدج مسمومه عمت عين التراب الطمته وخلت السانج يطلع
يهويمه...
-ماهو الجان كاضب الساني.. الا اخلاقي
الخلتني اتحمل ضيم رجلي وما احجي..
ولو حجيت تتذكرين اختج شصار بيها.. عندي اخو اشد الضهر بيه..
من اجي زعلانه انتم بنفسكم تجون تتبوسون باديه اطمها وما اوصلها لصراع.
الحمد لله ما فد يوم اجيت زعلانه وردوني اهلي الكم.. ما جنت شامره روحي على احد وان جنت
ساكته فلخاطر بيت اخوي لا يخرب وتطلك اختج..
الحجيه:- يا هيام شجاج يمه.. انهديتي..
-يمه ليوين نسمع السم ونسكت.. ملينه..
-دتحجي هيام.. واني صافنه على كمية
العداوات والمشاكل اللي بعمري ممطلعه على هيج شي..
اجاني صوت صراع من فوك... ليلياااااان..
هيام:- كومي ليونه لرجلج حبيبه يريد يرتاح.. يستاهل ابو حرب..
-صعدت الو بسرعه.. ها..
-ملابسي ذول منو غاسلهم
-اني..
-لج دحكي التايت دحكي يولي شمصخمه انتي
الدشداشه ملحه هسه انه بيمن اطلع..
-ادحك ع الدشداشه.. كل طكعة ملح بيها
تفلش.. ضليت بس ابلعم..
-لج بويه انتي احد.مسلطج فوك راسييي
احد مصخم وجهج وكايلج خربي هدومي.. الا ملابسي ليليان لا توصليهم
-غير غسلتهم الك..
-ولج بويه هي دشداشه.. بشامبو مال عبي
وادورها بالغساله .. مو تايت وتمولحيلياهااااا.. نعللعلا غيرتج..
يدحك بيها ويشمرها ويفتح الكنتور ويرجعلها.. هسه انه شسوي
كليلي انتي منين الله زتج علي
-عمو ما اعرف عبالي مثل الملابس.. هسه
اغسلها بسرعه وانشفها ما صار شي ..
-دخذي غسليهم بساع.. وزيدي الماي
وبشامبو زاهي اي شي بس لا تايت وتمولحيها..
-تمام.. اخذت وغلست وكملتها بساع .. دا
اطلع.. صار بوجهي..
-ها خلصتي
-اي..
-تعرفين تضربين اوتي
-هااا
-اذا متعرفين كولي.. واذا تعرفين
اكويها بساع..
ودخل الحمام وسد الباب.. بقيت صافنه يربي شسوي.. دخلت للغرفه. لكيت الجفيه مالته ع التخت..
اخذتها وفرشت ميز الاوتي .. حميته.. كويتها.. شو اجت حلو تخبل
صارت.. ادور بيها عطر يجنن .. مال كوي وعطر منو ..
وخرتها.. وفرشت الدشداشه .. كويت الجسم.. عادي انكوى .. ادور الردان..
ما اجت عدل تصير كسرتين وما اعتقد هذا يقبل
-تركتهم .. كويت الياخه ولحيت عليها
حتى تصير عدل.. شو هاي حمرت.. ياااااا بس لا يحجي..
طب هو.. والخوفه بكلبي ودخل بالخاولي اندرت منو وجهي يضرب
الوان.. صاح العفو والله نسيت انتي هين..
بس عاد اهتم فتح الكنتور وبدل واني سبحت بهدومي كد العرك
والخجل والتوتر والخوف..
لبس الداخليات واتقرب.. كال بالله .. اني مدنكه راسي.. بس يسويلي بز ابجي..
-بالله هذا هم كوي.. خرب انه ... لج
كولي ما اعرف...لا يااااااااا الله يولي شمسوووويه..
-عمو والله ما علقصد هي احتركت بيدي..
وبجيت..
-خرب ببليسج يول انتي احد مسلطج على
هدوووومي .. سكطتيلي الدشداشه ليييييش هيج. كولي ما اعرف نطقي احجي.. خرررب..
-اني مدنكه وابجي.. انتبه ابجي صاح
بويه اسكتي ونزلي رحمه لواليدي اتركيني بقهري..
-نزلت وامسح بدموعي.. ام سعد رايحه ..
دحكتني هيام .. كالت :- ها يولي شو عيونج تتلامع انحسدتو..
-حركت دشداشتو بالكوي وبقى يصيح..
-عزى العزاج ولج هدومه يتخبل عليهن لا
تتكربين معتني بيهم حيل..
-شعرفني.. تركتها ودخلت للغرفه. دخلت.. كتلها عجل السعلوه وينه..
-ههههههه السعلوه امرمرين بتها
بالمستشفى كلساع شويه جايبتها وجايه متغديات وخذتها للجده تجيبها
-زين سوسن شتعودلها
-حماتها لان نازك ماخذه اخو المرحوم
رجلي..
-هاااا
-شويه ودخل صراع يتبختر بمشيتو جن الله
خالقو وما خلق غيرو.. صاح:- يمه انه طالع محتاجين شي
-يحرسك الرحمن يمه .. روح محفوظ ان
شاءالله من عيني ومن كل عين ما تصلي على النبي
-عجل اودعناكم.
لليل.. دخلت ام سعد بتها جايبه.. نومتها بغرفتها واداري بيها
ومعلاك والعشا والبيت مركب ابراسي..
اجو جهال هيام هم.. واجه صراع وجايب جهالو وكلها التمت تحجي
وتضحك وتسولف
حرب اخذ جهاز ابوه.. وكعد.يمي يلعب.. اتعجبت بالالعاب
البلموبايل كام ينطينياه العب بيه..
وهوستهم عاليه واني مخليه راسي بالموبايل انوبه طلع موقع مدري
شسماه يمكن سوق بلبل كله العاب يجنن هو يحمل واني العب
..
شوي وطلعت ام سعد.. تصيح محبسي الذهب
وينو .. صاحو دوريه وينو محد داخل غرفتكم.. بقت تحجي وتصيح
اني بالي مو يمهم يم الموبايل.. دورو وكلبو الكون واني وحرب ع
الموبايل نلعب.
ابدا ما خطر ابالي شنو النيه ويقصدون منو وليش.. لاني ما مسويه
شي كل البالي محبسها ضايع ادوره ما عرفت قصدها تتهم البشر بضيعتو
-دحكتهم مخبوصين وصراع يكلها دوري وهي
دكله دور انته انه دورت متأكده. ماكو... هاي اول بوكه ابيتنه عمرنا كله ما ضايعتلنا حاجه هلمره ننباك.
دحكت صراع وهيام والحجيه يصفنون نزلت عيني منهم وكملت لعب.. وي
حرب.. شعلي
بيها
شوي وطفى الجهاز كال اصعد اشحنو.. كتلو ماشي.. فتت للغرفه لكيت
صراع فاتح جنطتي ومفردش غراضي بالكاع.
حتى الداخليات مطشرات.. ركضت لميتهم استحيت كدامو مطشرات..
ويدور.. كتلو على شنو ادور عمو..
-على حاجه مهمه ما ادري وين راحت..
'شنو اليوم كلهم ضاعت حوايجهم . ..
دحك.جوه العلاكه الجابتها هيام اليوم يمكن جواهم.. شال دور فتش ماكو..
كتلو عمو شلون شكلهم خاف انضف باجر الكاهم وانطيكياهم..
-ميحتاج ... وطلع..
صراع:- راح اتجنن معقوله تبوك. وجهه بريء وتصرفاتها فطريه معقوله
تبوك.. اي
تبوك ليش لا مو البارحه اعترفت بكل صلافه وتكول بكت اخوي
والتبوك اهلها كلشي تسوي.. اجت هيام.
-ها خويه..
-والله خويه دخت. معقوله هي..
-خويه لا نظلمه هو من المضيع ام سعد..
يمكن تريدلها مشكله
-بس هيام البنيه بنفسها اعترفت تبوك من
اخوها
-خويه لو عدها عقل ما تحجي بس والله
ثوله وفطيره هاي..
-وانه شعرفني بيها هيام ما صارلها 5
ايام ابيتي..
-لا وحقك ما تسويها .. زين جربها حتى
يبطل شكك بيها وتشوفها
-شلون اجربها
-حطلها مبلغ بغرفتك وكدام العين. ان نكصت من الفلوس هي بيها بلا. وان ما نكص البنيه بريه.
-ما عرف .. دخت .. اخاف اجربها وانصدم
وام اتحمل اذبحها ولا تبقى تبوك ابيتي..
-والله ما اتوقعها تسويها.. دجرب
وشوفها حتى بعد اطمن كلبك منها فرد نوب..
-ان شاءالله.
ليليان:- لليل صراع سحب حلا وحرب فوك نومهم.. والكل طش.. عاد
اني نمت.
-ثاني يوم كعدنا بعد الريوك. صراع كالي صعدي نضفي غرفتي من البارحه
كاش منها .. بيها ريحة زفر.
كتلو تمام هسه اصعد..... صعدت بديت بخشابو بمنضف اخشاب ومعطر
امسح اخشابو والكاع..
شفت فلوس مشدوده بالجراره.. وسلاح يمهم.. جذبني السلاح شكلو..
شلتو وبقيت ادحك عليه..
واسدد واسوي نفسي بالشرطه.. بعدين كلت وراي شغل كومه خل اكمل
بسرعه وانزل.. نضفت غرفتو ع التمام
ونزلت ع البيت انضف.. غسلت مواعين... دا انضف بالاستقبال..
سمعت صراع يصيح من فوك ليلياااااااان
يا ستار ياربي صوتو تكول ملك الموت يقشعر البدن من الخوف..
صعدت بسرعه.. كتلو ها عمو.. ادحك عيونو نار.. الفلوس الهينا
وينهم..
-قصدك البلجراره..
-اي
-موجودات ما شلتهم.. هنا.. فتحت الجراره
بس السلاح.. درتلو
مخصر اديه.. ويكول وين هين احجي..
-عمو والله جانو هنا.. اني متأكده
مشدودات واخذت المسدس ادحك بيه بس ما مسكت الفلوس والله..
-اذا هين طلعيهم ليليان بسرعه.. ما
غيرج دخل الغرفه بس طلعتي انه طبيت..
-عمو والله هنا
-عجل طلعيييييييييييييهم..
-انقبض كلبي من صرختو صعدت الحجيه وام
سعد.. ادور وابجي بالجراره مثل المخبله ماكو والله ماكو ..
عمو ما شايلتهم والله... حجيت وجابني جف.. حسيت طبلة اذني
نزرفت وصفرت على كد قوته. وي الصفكه لزمني من شعري
-دحكي يولي مو انه التلعب علي وحده
بكدج دموع التماسيح بطليهن وطلعي الاخذتي..
-ما ماخذه شي والله
-ما مااااااااخذه مو .. عجل تعاي...
كضبني من شعري ومشى بيه والحجيه تصرخ لا يمه برضاي عليك عوفها صرااع
نزلني الدرج سحل من شعري واني اصرخ بيدو وابوس بيه يعوفني
واكلو والله مماخذه شي قسم بيسوع اني ما اخذت شي عمو والله...
وما كأنو يسمعني الدمرات كد.اعصابو كلها طلعت بوجهو.. والحجيه تصرخ وك يمه لا يتيمه لا
تظلمها يمه امشيه عليك دين محمد لااااا صرااااااع.......يتبع
☆☆☆☆☆☆
تعليقات
إرسال تعليق
اهلاً وسهلاً بقرائنا الكرام نتشرف بكم في مدونتا ارجو الاشتراك في مدونتنا ليصلكم كل ماهو جديد تحياتي لكم