ليتني استطيع فعلها الحلقة (42)

ليتني استطيع فعلها

الحلقة  (42)

يسألوني و اكلهم بالبخت عفته
يجي الليل و يجن كلهن
ضحكتك صورتك وانت

......

خالد :- ها الله يساعدكم

مينا:- اهلين كيفكون

باوعتله و درت وجهي عنه ما سلمت، العبرة خنكتني ، ادري وراي و ادريه يباوعلي بس اخاف اباوع عيونه العبرة خانكتني، ادري عيوني راح تفضحني و ما راح اسيطر عليهن

بقى يسلمن عليه و على مرته و هو يعرفها عليهم و ام رافد فرحانة بيها و ترحب، و هي تسلم عليهن ، حجه

:- هاي ديار تصير مرت ابن عمي ، دياااار

انداريت عليها ابتسمت الها و هزيت راسي، و ما حجيت، الكلمة ما جاي تطلع من كد ما اختنكت

درت عنهم بسرعه و اني احجي ويا بتول اكللها :- لو نطلع الجدر برا نصب لان هنا خنكة صارت

بتول :- اي هوسة صدك

انداريت ما اباوع بوجهه ، هو يحجي وياهم نظره الهم و يرجع يباوعلي بنظرة و يصد عينه شلت الجدر اني و بتول طلعناه برا

العائله فرحانه بالبنية خاصة انو حجيها غريب علينا سوري ويشبه الدبلجة مال المسلسلات التركية، و احنا العراقيين نستلطف شي الغريب و نحبه ، فالكل بقى يحجي وياها و يسألونه عليها

كعدت برا و هم صارو كبالي هو اندار يباوعلي:- ها راح تصبون

ما رديت عليه، بتول جاوبته :- اي والله، اذا تريد روح يم عمامي

مشى يريد يروح، اجت ورا مرت :- وقف خالد

خالد :- شنو

-رح ظلني هون ؟

-ترجعين للبيت

حجت ام رافد :- بالبيت ضحى وحدها ما اجت لهنا خاف تحطها و تكتلها تعاي اكعدي هنا يمنا لا تخافين

اشرلها تفوت و هي فاتت ويا امه جوا
البنية حلوة و ناعمة احلى من ضحى بعد، لايكتله ولايكة لجماله، حقه يدور التناسبه اني شنو حتى اناسبه.

انشغل بالي كل الناس الموجودين ما كمت اشوفهم من كد مانشغل تفكيري، كمت اصب المركة ع التمن
نزتني بتول :- ولج لا مو هيج شجاي تسوين ديار

باوعت :- يااا والله ما ادري

ابتسمت هي:- اذا تعبتي اصعدي و اني اصيح وحدة وياي تكمل

ميعاد:- امشي اخذي حسوني بدليله عوفي اني اصب وياها

كمت من مكاني، لزمت ايدي و همستلي :- الحاط ايده بغير ايدج و ما اهتز لا يهزج، لا تجيبين النظرة الج ترا كلهم يعرفون و كلهم ينتظرون منج الزلة لا تجيبيها لروحج

خنكتني العبرة بالزايدة احس بس واحد يكلي بز ابجي، عفتها و مشيت من يمها اخذت حسوني و دخلت للحمام غسلت الطفل و بجيت بيني و بين نفسي
حاطة ايدي على حلكي و خانكة بجيتي حتى لا ينسمع صوتها

حسوني كام يسألني :- ديدي بيس

مسحت دموعي و غسلت وجهي و شلته :- مبيه شي حبيبي نروح انام

-لا

فتحتله الباب و طلع هو برا، رجعت غسلت وجهي مرة لخ حتى عيوني ميبين بيهن البجي و انسأل (شبيج)

صعدت فوك بغرفتي اهدئ بنفسي و اكوللها :- اني العفته بنفسي شمتوقعه يعني يوفيلي طول العمر لو يظل يبجي وراي سنين حقه يشوف حياته اني ما الي حق لا افكر بيه ولا حتى اغار

عقلي يقنع بس كلبي شيقنعه، احس جمرة بصدري مو كلبي ، و حسرة بداخلي كلش جاي تعذبني دمرتني

حسيت اكو احد جاي للغرفة ، كمت للكنتور بسرعة اكلب بالملابس، فات امجد :- ها عمري هنا انت و اني جاي ادور عليج

ما باوعتله :- كول

-بس حظريلي ملابسي الاروح بيهن و ارجعيلي ع القميص اكوي خاف بيه كسرة

هزيت راسي:- هسه

تقرب مني و حضني من ورا :- تعبتي وحدج بالمطبخ جوا ادري ارتاحيلج شوية لبين ما يكملون الغدا

-لا عادي حمودي يستاهل التعب

-زين لعد حبي طلعيلي الملابس

طلعت اله ملابسه و كويتله و كل هذا ما مباوعه الوجه حتى لا يكلي شبيج

هو نزل جوا، اخءت نفس قوي و تنهد، رفعت راسي للسما :- ياربي دخيلك فدوة اترجاك خليني انسى تعبت ادمرت نسيني ربي فدوة
حجيت و بجيت

سمعت صوت جوا ، مسحت دموعي، اخذت ملابس و رحت جوا، غسلت المطبخ ويا البنات و كملنا و كعدوا يشربون جاي

اجا امجد وكف :- شو ما تصعدين ليش ؟ تره مبقى ربع ساعة و نروح

-ما اروح

-ليش ؟

-ما بيه حيل

-لا امشي اصعدي بدلي بسيارتي وياي كعدي قابل اروح هيج غير انت و الجهال وياي

-لا والله روحوا اني ما الي خلك

وكف رافد يحجي ويا امجد و يسأله، طلع خالد وكف برا درت وجهي عنهم و بقيت افتر بالمطبخ و انظم الاكل و اضم

فات خالد للمطبخ، حجه :- بس صبيلي جاي

بدون ما اباوعله صبيت، التفت امجد و هو يحجي ويا رافد :- ديار لا تظلين واكفة حظري نفسج و الجهال بسرعة

فاتت امي :- يلا شو واكفة

-ترا خبصوتني والله كلت الكم روحو ما اروح والله

ميعاد :- دنجبي بنتي كومي كومي

فاتت مرت خالد و هو واكف يشرب جاي ويباوع لبرا ، كالته :- عجئه هون خلينا نمشي

ما جاوبها باوعلها ابتسم و دار وجه يكمل شرب الجاي

همست امي:- بعد اخذيلج صفنة بجهرته ولج ربيتيلي علة دمشي

سحبتني من ايدي و صعدتني فوك بدلت ع السريع و هي سريعه بالمكياج ، مكيجتلي بسرعة ، فات امجد و اني البس بحسوني و امي تمشط بفطومة

كام يلبس الجهال وياي حتى الحك بسرعة كمل ولده التوم اخذهم و نزل جوا، لبست فطومة بدله و نزلنا اني و امي

نص طالع و نص بعدهم، طلعنا امجد فاتح اغاني بالسيارة وولده يركصون و خالد شايل مرروة بته الصغيرة و رافع الكاميرا ويصور و هو يبوسها

اني اباوع وامشي مو ابالي احد، طلعت امشي ورا امي و ما ادري وصلت وياها كدام سيارة رافد و هي تكوله :- ها يروحي

منى :- روحج مو هسه اني جهالي نصعد وياه

رافد :- شكو منى

ميعاد :- اخذها عمري اخذها اني ما اقبل احد يسوقلي سيارتي اباب بيتي مو بحال احد راح اخذ بتي و امشي

باسته بالهوى و هي تكول :- منا لليل راح اشتاقلك يبو عيون الحلوة

امجد :- ديار

باوعتله ، حجه :- تعاي هنا

ميعاد :- امشي روحي ويا رجلج اني راح اخذ اثار ونمشي، هي وينها اثار بس لاوبقت جوا

بقيت اتلفت منا و منا لكيتها كاعدة ع الرصيف هي و مهيمن :- ذيج

اشرتلها ماما و اني ابتسمت على منظر اثار ، اجتها تكلها :- ماما انتم روحو اني و مهيمن نجي مشي هو قريب والله قريب اني اندلهم بيت العروسة

ميعاد :-، ولج عروووم عوفي للولد نايمة بخوانيكة من هسه امشي

كامت تكمز بمكانها :- لا ماما اريد اروح مشي

-اي نمشي منا للبيت و صعدي مهيمن وياج بالسيارة

باوعتله و هي تكوله :- اييي تروح ويانا
هو يهز براسه

ميعاد :-، من هسه لاطمته للولد ما يحجي بس ينفذ امشي عرمه امشي

ابتسمت على سوالفهن و امجد واكف ورانا ، سالني :- شبيها ؟

-تحب مهيمن

ضحك و حط ايده على جفتي و كال :- يلا اصعدي

مشيت وياه صعدت بالسيارة ، خالد ما ناوي يروح وياهم للخطبة لان كلهم صعدو و هو وبناته واكفين ما يمشن، و مرته ما ادري وينها

اجت ام امجد صعدت ويانا، من اجت اني نزلت من الصدر صعدت هي لان بسيارة ابو امجد صعدوا اخوته و احمد صاعد ويا رائد وولد عمه فصعدت ويانا
اني و الجهال كعدنا برا ، عمتي فرحانة حيل خطية و تباوع لاحمد

سقنا السيارة خالد جان كبالنا شايل بته مصعدها على جتافه و هي تصيح (باي ) درت وجهي عنه ما ركزت بيه حتى لا اتوتر و امجد عينه عليه بمراية السيارة

وصلنا بيت حليمة، نزلنا جانوا بس اثنين من عمامها جايين و اخت حليمة و بناتها .. بس بعد ماكو احد بيتهم فارغ، و احنا ما عازمين احد بس العمام جايين بلا عزيمة و ١٤ سيارة محملات تحمل

فتنا رغد رايحة صالون و لابسه فستان مخصر على جسمها كلش حلوة طالعة تجنن، فطومة كابلتها وكعدت لان عروسه

وما جان عد بيتهم احد بس الخالة و بناتها يقدمن و مخبوصات بين النسوان و بين الزلم و الخالة تصيح :- شمدريني هواي غير هم كالو ما عازمين احد

وكفت وياهن اصب الجاي للزلم و اصفط بالبيبسي للنسوان و احط بالصواتي، اجت وياي بتول و دعاء اخته عاوناهم ،و صحت على شبابنا اجاني رائد ، كتله :- وزع من يمك
لان بس عمام اثنين جايين عيب يعوفون الزلم و يجون يوزعون

كملنا توزيع كعدنا بالهول، ام رافد تعيب على مكياج رغد و امي تمدح بيها و ناس تجر بالطول و ناس تجر بالعرض

باوعتلي حليمة و هي تكلي :- اطلبج ٧ الاف

عقدت حاجبي :- مال شنو

-مو ما كفى البيبسي الجبتي جبنا بعد

ضحكت و امي تكللها :- ولج الله الاحد ٧ الاف شقيمتهن

شالتهن ام امجد من جيزدانها جرتهن ام رافد كالتلها:- هاج دزيلنا مي متنا من الحلاه لو هم المي احنا انجيبه الكم ؟

حليمة :- اطيني هسه اجيبلجن

انطت الفلوس بأيد مهيمن و كالتله روح جيب صناديك مي بسرعة، حليمة احتقنت كلش ضاجت من ام رافد

و ام امجد و امي يضحكن
سألت بتول :- لعد ليش خالد و مرته ما اجو

-البنية ما متعودة على هيج هوسة داخت و راحت للبيت و بقى هو خاف يصير مرادد بينها و بين ضحى او تصير مشكلة

-هاا

لهناك سمعنا الرياجيل ارتفع صوتهم يعني تمت السالفة هلهلن خوات امجد و كامن يهوسن و شغلن اغاني و كام الكل يهوس و يركص

اجا احمد دخل جوا، و فات امجد سلم، اتفاجئ ماكو غربه كل البنات الواكفات خواته بنات عمه و خالاته ضحك

.. بلغهم ان الشيخ راح يجي فرغوله مكان .. و عقدوا
كملنا الخطبة رجعنا للبيت، شغلن خوات امجد دي جي جابه الهن رائد و بقن هن و البنات يركصن و احمد و رائد وولد عمهم دخلو

عفتهم و صعدت فوك تمددت، راسي صاير هالكبرة، بالي مضروب مشوشة ، خالد جان لا اباله ولا كأني واكفة كدامة، جنت من اوكف احس يحترك كبالي هسه مبين مرتاح ولا عباله
واني ليش افكر هيج طبعا يشوف حياته اني شعليه بيه الله يوفقه

بقيت اتكلب بفراشي وكلش متضايقة و متوترة، فات امجد يبدل، حجه :- شنو نايمة

ما رديت عليه

امجد :- جوا البنات كلهم ديصفكون و متونسات ليش حابسه روحج هنا انزلي اتونسي وياهن

-تعبانه ما بيه حيل

-شبيج ؟ شو اليوم مو على بعضج اكو شي ؟

كمت من مكاني صحت :- تعبانه جاي اكلك تعباااانه هم يحتاجلها تبرير لو بكلشي تشك بكلشي تحط انه و تسوي سالفة

صفن :- ليش تصيحين سألتج سؤال جوابه ما يحتاج كل هالصوت العالي

-لان كلتلك تعبانه و انو ترحع تعيد السؤال نفسه، كتلك تعبانه

-كلهم جوا لو احد سمعج تصيحين شيكول ؟ غير اعرف من شنو تعبانه

-بكلشي تشك

-تشوفين سؤالي شك ؟

-لعد شتسمي

-اسمي قلة احساس ، ديار شبيج ترا مليت اتوسل منج الكلمة توسل اداري بالعيني و حبيبتي و حياتي، و كلمت حبي ما تطلع من حلكج

لو اجي هموم الدنيا على راسي ما تكليلي شبيك ، عبالج الاهتمام بس نظفتيلي ملابسي و داريتي جهالي و بريتي اهلي

-و شتريد انطيك بعد بشنو مقصرة

-مقصرو بالكلمة الحلوة محسستني انت هنا للخدمةو بس تنظفين و ادارين و ما ابالج تسمعيني كلمة حلوة و لا جنج مرتي ما طلبت منج تهتمين بيه ولا كتلج سويلي شي بس حسي حسي كولي هذا بشر

- احس بشنو كل الاكدر عليه جاي اسوي

-اكو شغلات صعب تنطلب لازم تسويها من ذاتج من اجي تعبان ما محتاج اطفيلي ضوا لو تاخذين الجهال مني حتى ارتاح، احتاجج انت تكليلي شبيك تعبان و احجيلج باعتبارج مرتي

اريد ادخل فد يوم و تتتلكيني بالهلا و الابتسامة الحلوة، ما الكاها منج

-هاي طبيعتي

-لا مو طبيعتج اني جاي احس انت مجبورة بيه الكلمة الحلوة تستحسفينها بيه بينما ويا جهال و اهلي تصيحيلهم حبيبي و عمري و حياتي ولج هذا اخوي احمد انت تصيحيله حمودي ووياي امجد ولا جني رجلج

ويا كل الناس لينة وياي جامدة ليش فهميني

من اكلج ليش تعبانه مو لان جاي اشك بيج بس الاشياء اللي انت ما جلي تسويها اليه اسويلجياها حتى بلكي اعودج و تتعودين على هذا الاسلوب

رايد احسسج اني رجلج مو واحد يصرف عليج لو متوليج .. تشكيلي تفتحيلي كلبج و انت مقوقعة روحج و مخليتني ابعد الناس عنج ليش

كلت الج اخذي الفلوس تعالجي كلت يمكن هالسبب بعده مسويلها عقدة بس طلعتي ما مهتمة فهميني شبيييج

... هو يحجي و اني كعدت عيوني تصب، بكلامة عرفت اني اغبى انسانه لما فكرت اذا اتزوجت راح انسى خالد و اعيش ويا رجلي عادي

هذا القرار خلاني اسلم جسمي و نفسي لزوجي و كلبي عفته معلك بأيد الانسان التركته و بسبب هذا القرار الغبي علكت نفسي بين السما و الكاع ..

لا اكدر اعيش ويا رجلي طبيعي و انسى ولا اكدر ارجع للماضي و احويه، مجبورة ابقى بمكاني هذا جامدة بين السما والكاع لا احساس و لا مشاعر.

من شافني ابجي و ما ارد، كمل كلامه لبس و طلع من الغرفة كلها، خابرت امي ابجي ، ردت عليه :- ها شكو تخابرين مو جوا
سمعتني ابجي غيرت نبرة صوتها :- شبيج صاعدتلج

سدت الموبايل و صعدتلي بساع، فاتت للغرفة اخذتني بحضنها و هي تكلي :- شبيييج

-تعبانه كلش ما اريد ابقى هنا

-شصاير ؟

-كولي لام امجد اخذيني يمج ما دام بناتهم موجودات

-هسه اكللها بس كليلي صاير شي

-نروح و اسولفلج

-بدلي و انزلي اني راح اكللها

بدلت و نزلت جوا، ام امجد تكول لامي :- خطية من الصبح تشتغل تعبانة

.. دايخة كلش ما اكدر اباوع اي احد بيهم راسي يوجعني ، صاحت على امجد كالتله :- مرتك تعبانة تريد تروح ترتاح ابيت امها شوية

باوعلي و كال :- خل تروح ترتاح

اخذتني امي و طلعت من البيت وصلت و بقيت احجيلها هو شنو كالي ، بقتوتلوم بيه و صوجج و شكد اوصي و حقه و الولد ماشي وياج مثل المي انس الفات عوفي دوسي على كلبج

هي تحجي و اني مدنكة راسي و افرك بيه من الوجع، كمت من يمها و هي تحجي

رحت حاولت انام مكدرت من الوجع مال راسي ، لهناك كعدت على صوت رافد و هو يضحك بصوت عالي، و امي تكله اش نصي صوتك

رافد :- منو موجود اصار و هناك شعندج عليه بعد

-ديار نايمة جوا

كال الها :- اهووو اخلص من الصغيرة تطلعلي الجبيرة

اخذها و صعد فوك بعد ما اجا براسي نوم بقيت فاتحة التلفزيون وكاعدة ، اندكت الباب كمت من مكاني، رحت فتحته طلع خالد ، اصطكيت مكاني لا حجيت كلمة ولا نطقت فاتحه الباب و مصتكه

خالد :- رافد هنا

بقيت اباوعله مجاوبت ،رفع ايده و هو يكلي :- هلووو رافد هنا

هزيت راسي بمعنى (اي)

-شنو الفار اكل السانج متجاوبين

-اي هنا
عفته ع الباب و دخلت، فات هو و يكول :- صعديلي كعديلياه

درت وجهي عليه :- مبروك الزواج

خالد :- شكرا الله يبارك بيج ، صعدي يلا

صفنت بيه، حجيت :- صيح انت ما اطيق اخوك و اصعد اصيحه

صاح :- رااااافد

ما جاوب رافد ، حجيت :- مو عروستك بالبيت شعندك طالع

خالد :- لا تدخلين بحياتي ديار يا ريت تبتعدين مني و تخليني اعيش حياتي براحة

صدمني بجوابه، بسرعه درت منه و رحت للغرفة
شكد وترني و استفزني جوابه هذا مو خالد شبيه هيج يحجي وياي

بقيت اروح و ارجع بالغرفة كلش ضجت و دموعي تنزل منه، اندكت الباب و هو مفتوح باوع :- رافد ما جاي يجاوب سويلي حسنه و صعدي صيحيلياه

بقيت صافنة بوجهه، كحيت، مسحت وجهي وردت افوت من عنده اصعد، لزم ايدي و كال :- احساس يوجع و يغث من تهتمين و تنردين مو، قيسيها كم مرة كلتيلياها و بعدتيني

باوعتله :- متأكد اصيحلك رافد ؟

- اجا دورج توكفين و تتفرجين و تشوفين الكبالج عاش حياته و ما اهتملج

-جنت راح اقتنع قبل ساعة ان انت تغيرت و ما عاد تهتم ، لو ما اجيت هسه

دنك و مشا للصالة، صعدت فوك دكيت الباب على امي ورافد، صاح ادخلي، فتت لكيتها متجيه ظهرها على صدره و كاعدة تباوع بالتلفزيون

طلعت من الغرفة بسرعة و اني اكله :- خالد جوا يريدك

كام بسرعة من عدها و نزل جوا، فتحت الباب على امي باوعتلها، كالتلي :- خالد على شنو جاي

-ما اعرف

-اكو شي

ما جاوبتها نزلت، امي واضح حبت رافد من صدك و قررت تبقى وياه لان مشاعرعا الشفتها لرافد ما جنت اشوفها كبل لا لابوي ولا لأي واحد مر بحياتها

نزلت سمعت خالد و رافد يحجون على فلوس بيت ورافد كاعد يبني ، رحت للغرفة هي نزلت وراي،

- تتعشين ؟

- لا ، رافد جاي يبني بيت ؟

- اي ليش

-الج لو لمنو

- الي طبعا، عليمن كاعدين بأيجار عنده قطعة ارض و دبر ٢٠ مليون للبناء و من ١٥ مليون و نريد نبني

-١٥ مليون منين جبتي

-سحبت قرض على راتبي

-قررتي تبقين ويا رافد لو مثل كل مرة

-انت شتكولين ؟

-جاي اشوفج حبيتي

-اي

- شنو البيه ينحب ؟

ابتسمت :- ما ادري بس الوكت مر بيه هواي، رايدة استقر ورافد خوش ولد ووكف وياي رغم يعرفني لا بيوم عيرني ولا بيوم كال و شحده اليجيب اسمي ويسمع احد يحجي عليه سد حلوك الناس كلهم عني
عصام عفته قبل لا هو يطلكني اختار عائلته و سيد جعفر اختار امه و ابوج بعمره ما حاسبته رجل ، رافد يختلف وكف بوجه الكل لخاطري
ورغم عندي راتب و سيارة يدفع ايجار بيتي و مصرفي و مصرف بتي واصل ليش ما اساعده ؟ هي المرة شتريد غير رجال يحبها بكول و فعل و اني شفت حب رافد بالحجي و بالافعال ليش ما احبه و ليش حتى العب عليه ؟

-الله يسعدكم

-و يسعدج يا يمه و يهنيج و ينسي گلبچ ، بعده راسج يوجعج

-ذبحني متت منه

-انطيج براسيتول

-ياريت

كامت راحت للمطبخ شوية و رجعتلي :- ديار

-ها ؟

-دورتج صارلها شكد ما نازله ؟

-ما اعرف ما اتذكر بس اعتقد شهر

-اخاف احمل و ائذيج بالحبوب ولج

-ما عندي لعبان نفس ولا ادوخ بس راسي

-ماما انت عايشة جو المسلسلات التركية هواية، اني جبتكم كلكم ابد ما صار عندي لعبان نفس ولا تقيئ ولا دوخة .. جنت بس ايام نساوتي راسي يوجعني خاف ولج طالعة علية و دوخة راسج هاي حمل مو تعب

-لااا لا تكولين هيج ما اريد

-يا فدوة مو هو ندوسله دكمة و نكله ربي رجعه ما نريد

-لا لا ماما ما حاطة الحمل على بالي عود صدك اصير حامل

-اوكفي خل اوصي رافد يروحلي لراس الشارع يجيبلج تحليل

-عاد لا تشهريني

-دكعدي هسه اجيج

كامت ورحت امشي وراها، راحت رافد كاعد ويا خالد :- اهلين خلودا كيفك

باوعلها :- هلا

-لعد وينها مرتك السورية ليييش ما جبتهااا

-كاعدة يم امي

ميعاد :-، باجر اجيكم و اباركلكم اليوم ما عرفنا منها شي

خالد :- شوكت خططتي و نفذتي بهالوكت توقعت احمد ما يخطب ب٥ اشهور

ميعاد :- و انتظر احد رحت خطبتها بنفسي و حجيت بالسالفة

-و شمقررة تسوين عالسالفة ؟

- والله لهسه ما عندي اي فكرة عود يتزوجون والله كريم ولو هاي العمصة مسجله كل البيت بأسمها

رافد :- شنو الموضوع يا فكرة يا بيت

سولفتله امي، و حجه خالد :- بالعشاير اخذيها

ميعاد :- عشايريش فدوة اروحلك هو اكوم و اكول عمامها و عمامها و هم عمامها خ***يه ما بيهم حظ بس الله كريم هسه بعد وكت خل تتزوج البنية

رفودة حياتي متكدر تروحلي لابو الصيدلي اللي براس الشارع تجيبلي منه تحليل مال حمل

رافد :- مال حمل ؟

-اي محتاجته

-المن ؟.

-احس بديوره حامل جيبلي هالتحليل حتى اتاكد خطية راسها ذبحها

خالد :- اني اكوم اترخص، اااا مع السلامة

رافد :- انتظرني اروح وياك

ما انتظر رافد بسرعة طلع من البيت ، اني واكفة برا اباوعلهم، رحت لامي ترا فضحتيني حامل و حامل منو كال هيج و حجيتي

-تعمدت احجيها كبال خالد لا فرحان بمرته جايبها و يهفي كبالج يقهرج انطيتها اله بكلبه حتى يكعد وزن

-و تروحين تكولين لرافد يمكن ديوره حامل حتى عيب

-بايكته و عيب شو طبي جوا انت

شوية و جابلي تحليل و انطاه لامي، ما حللت خفت رغم شكد لحت عليه امي ما اتجرات احلل خاف اطلع حامل، ثاني يوم حصرتني يم الحمام و سدت الباب و تكلي :- ما افتح اذا ما تنطيني التحليل بأيدي

حللت بسرعة بين خطين حمر ، يابة شكد ضجت و توترت ، طلعت الها خليت التحليل بأيدها باوعته و كال :- صلاوات على محمد ولج صدك حامل كللللللللللوش اروح ابشر رجلج

-عوفي لخاطر الله اسكتي

-يمه و راح يصير عندي حفيد عزااااا

اثار تمشي و تكللها :- شنو ماما شنو

-ولج راح تصيرين خالة يالجلحة

ما افتهمت اثار بقت امي تفهم بيها و اني رحت للغرفة حيل ضجت و انقهرت ، دراستي شغل البيت الجهال امجد شنو طفل يعني عاي عي عود اقبل بطفل
لا ما اريده

امي ما جذبت خبر خلتني ابدي و اخذتني لعيالي ، جان امجد كاعد و ابو امجد و خواته كلهم سلمت و كعدت

باوعلي امجد :- ها شلون صرتي

ميعاد :- ما بيها شي الدوخة من الحمل

امجد :- حمل !

ابو امجد :- صلاوات على محمد حامل صدك

ام امجد :- صدك الله عليج

-اي والله شكيت بدوختها ذكرتني بروحي بحبالتهم هم هيج ادوخ رحت جبتلها تحليل و طلعت حامل

كلهم كامو يباركولي و امجد يحضن بيه كبالهم ومبروك و مبروك و يركص بجهاله و يصيح :- راح يجيكم اخ لو اخت لفطومة ، انتم شتريدووون

اني ما الي اي ردة فعل، باوعلي و هو يسأل :- اخ لو اخت

-ما ادري

-شبيج شو ضايجة ؟

-لا بس دايخة شوية

-اصعدي، اني ما راح اطلع راح ابقى يم الجهال روخي ارتاحي

صعدت لغرفتي شوية بس ما جايني نوم بس راسي يوجعني ، نزلت يمهم حجت وياي امي :- تروحين وياي لبيت ام رافد ؟

-شعدكم ؟.

- نبارك لخالد و مرته نوصلهم رايحين اني و ام امجد و البنات لبسي و تعاي ويانا

-من كل عقلج اروح اباركله ؟

-براحتج

عفتهم و صعدت فوك انام، عمتي اخذت الجهال وياها، امجد من اخذت الجهال صعد يمي شافني الوب من راسي بقى كاعد يمي حاير شيسويلي ما بيده شي فركلي راسي شويه ووخرت من عنده بقى كاعد ع التفزيون، و اني اتكلب بفراشي

دك الموبايل مالتي، كمت و هو يكول :- اني انطيجياه

كلت اله :- لا هذا يمي، اخذته اباوع الرقم خالد
تخربطت احوالي، ارد ابتلي ، اترك يشك ليش ما رديت

كلت خل اعوفه ما ارد، باوعلي :- ردي

-صديقتي بالكلية عود بعدين احاجيها ما الي خلك

انكطع و رجع اتصل، باوع امجد :- جاوبيها خطيه خاف رايدة شي اجاوبها ؟

كمت من يمه و رديت :- ها عذراء

خالد :- شطلع التحليل ؟

امجد يمي شجاوب بقيت امتمت ، طلعت برا الغرفة و هو يكلي :- حامل انت

-انت شنو تريد تورطني امجد هنا

-امجد هنا موو

-شرايد مني

سده بوجهي

رجعت للغرفة هم زين امجد ما شاك بشي، باله يمي اذا راسي بعده يوجعني ، طفيت الموبايل كله و تمددت

....... من بعد هذا الاتصال
خالد غاب عن البيت يوم كامل
اهله جانوا قلقانين عليه و مرته تسأل عنه
و ضحى شادة وياها و مستغله غيابه
اجا ابو رافد يشكي خالد يم ابو امجد و محتار بيه
ثاني يوم راجع ماخذ مرته السورية و راجع للاردن
مبقى هنا

.... الكل يكول انو ماخذها على حب ، البنية عاجبته و متزوجها بس اعرف الحقيقة شنو خالد اللي اعرفه معقوله بلش بعلاقة جديدة و نسى ؟
ما اعتقد

... مرت هاي الفترة
ايام النساوة جانت ثكيلة دوخة حيل و ما اشتهي من الاكل غير الطرشي ، لدرجة امجد كام يجيب دبات دبات مال طرشي بس حتى اكل لان الزاد مو كلش احبه ما عندي شهيه ، اكعد من الصبح اكل طرشي

... عمتي طلبت مني السلفة تاخذها تزوج بيها احمد تنطي لام الحصة فلوس و تقنع المشتركين يقدم الاسم و تستلم ، وافقنا اني و امجد و اخذت السلفة
هم ٥ ملايين يطلبونا و خمس النا فهي اهذتهن كلهن و كالت من يصير عند ابو امجد يرجعهن لامجد و تتطوهن للدين

امجد اخذ غرفة نوم تركية لاحمد على راتبه بالتقسيط
و انطيناه غرفة مها و غرفة احمد الصغيرة بقت اسامة يكعد.بيها من يرجع من الشغل
رتبتها اله و اشتريتله سرير ابو النفر و كنتور ابو البابين و نظفتها سويتها تخبل اله حتى يرتاح بيها و يفرح

هاي الاحداث جانت وكت امتحاناتي لان يريدون يزوجون احمد ورة العطلة مباشر

جنت من صدك اجاهد منا البيت و الجهال و الدراسة و الحمل وتحضيرات العرس من صدك طلعت روحي لحد ما كملت ورا العرس الامتحانات مباشرة زوجنا احمد
راح هو وياها لأربيل هناك شهر عسل يتونسون

هنا امي بدت شغل ..
راحت لبيت حليمة حاجية وياها على ورث مال سلمان
، حليمة متخبله :- ما الها ورث يمي و شعدكم عليه و منيلها حصة و سلمان مات و بتج اتزوجت و ما الها يمنا اي حق

كايلتلها امي :- انت هم اتزوجتي على اي اساس تاخذين بيت ابو سلمان و تكعدين بيه انت ورجلج
شنو نسيتي من جنت اموته سلمان المرحوم جوع نسيتي من تكتلينه و اطردينه بالشارع
لا برد يكتل ولا خر يذبحه ما تحمله المسكين ع الرصيف من وراج حتى جان يكول تكهربني ومحد يصدكه من وراج تصيحيله المرعوص المرعوص و مشيتي عليه هاللقب وخليتني الناس ما تصدكه بكلشي يحجي

حليمة :- سلمان ما اله كل حق بالبيت و هو مات و ماتت حصته وياه ربع ما اله

ميعاد :- لا والله حبيبيه اله حق و الحق الاكبر بعد بتج الها نص حقه و انت ربع و هو اله الحصة الجبيرة على اي اساس اموتتها ابطنج بتي التشردت بيه و بتي الاحتارت بمرضه و من دكتور لدكتور و من مستشفى لمستشفى .. دارته و حتى جانت تشيل من جوا اني جنت اروحلها و اشوفها بعيني هي الجازته انت شجازيتي و تاخذين حقه ؟

حليمة :- البيت بيت بتي و ما انطي منه طابوكة

ميعاد :- اذا بيت بتج كليلنه نروح لبتج ناخذ حقنا منها و اذا يمج حقنا منج نريده

حليمة كايمة متعاركة ويا امي و تصرخ ما الكم حق يمي بالقانون البيت بأسمي و يا حايط يعجبج ركعي راسج بي البيت الي و ما انطي لاحد ..

طالعة امي منها و كايلتلها :- بسيطة سهلة ان شاءالله

قانون ماكو و عشيرة ما بيها خير، ماخذه رقم ابو و مخابرته :- الو

اسماعيل :- الو منو ؟

-اني ميعاد اسماعيل

- ها هلا ميعاد خير اكو شي

-اي اكو شي بتك الها حق و حقها ضايع بالقانون تكدر ترجع حق بيتك لو مو زلمة و اطلعه

-احترمي روحج شنو هالحجي

-اسمع اسماعيل سلمان تعرفه و تعرف بيت ابوه و بتي جانت مرته و هي الشافت و تعذبت وياه ، حليمة مرت ابوه مسجلة البيت بأسمها وكارصة بيه هي ورجلها وتكول بتج ما الها حق يمي تقبل حك بتك ب٤٠ مليون يروح لحلك حليمة العمصة تكدر ترجع حق بتي لو اشوف غيرك

اسماعيل :- خليها يمي اني احلها

عافت السالفة امي على ابوي، يومين و واصل تهديد لبيت حليمة ( ورث سلمان من حق ديار يرجع خلال اسبوع واحد بس وراها لو ما رجع تلكون روسكم بصفحة و الاجساد بصفحة )

هنا ابو رافد انضرب على راسه تهديد ووصل مرته وروسكم مو راسج يعني هو مجموع وياها ، جاي لعمي يرجف ومنطي التهديد

اجتمع رافد و امجد و عمي و خالد بالبيت و كلها تكول منو اليهدد ، سألوني كلت الهم ما عندي اي علم بالموضوع اجت حليمه و كايلتله :- بس ميعاد الفاتحتني بورث سلمان و كالتلي بسيطة يصير خير التهديد منها

رفع رافد الموبايل على امي و كال الها :- هسه تجين لبيت عمي فورا

ربع ساعة و اجت امي كعدت كبالهم و حليمة تصيح :- هي التهددني والله ماكو غيرها

ميعاد :- شعندي يمه مافيا و اهددج شصاير

انطو الورقة لامي، ضحكت الهم و كايلتلهم ما ادري عن هاي الورقة ديار الها حق بالبيت من حق سلمان و اني طالبت حليمة ما انطتني خابرت ابوها و كلت اله حق ديار انت الترجعه

هم سمعو ابوي و خرطو العافية ..
هم يعرفونه ارهابي و الشرطة ما كدرت تلزمة لا وصار بالدولة ضابط و دمج و اهل الدمج كل الشر منهم و من اديهم منو يكدر يواجهم

لان ضباط الدمج اجو عن طريق واسطة احزابهم
لا دارسين ولا فاهمين عن طريق الاحزاب صعدوا للدولة حتى يخدمون احزابهم .

يا عمام و يقانون يكدر لواحد مثل ابوي مجرم
حجو ويا امي كالتلهم ما ادخل اني حق بتي يم ابوها و هو اللي يرجعلها حقها مو هي اكلت حقها و سجلت البيت بأسمها خل تواجه اسماعيل لو تكدر

حليمة تصيح :- اي اواجه و لو اعرف اموت والله ما انطي ربع

ابو رافد كايل الها :- اذا صدك ما تنطين اني اطلكج و اطلع منها ما بيه حيل اواجه اسماعيل ، لا اكدر احقه بقانون و لا اكدر اجيه بعمام و اني عندي ولد و احفاد اخاف عليهم

حليمة :- اي طلكني بس ما انطي ولا طابوكة من بيتي ولا اتنازل و اني اروح باجر للشرطة اخليهم ياخذون ديار و امها

ميعاد :- ههي لا صدك والله خاف ما عندج تريدين اجي وياج خاف تستاحشين بالطريق

هاي متخبله شلون امي تكللها هيج و تصيح :- تريدون تبوكوووون فلوسي حراااااامية تريدون تاخذون بيتي

كام يصيح عليها ابو رافد و شاحتها ، فاتت ام رافد للمطبخ ، و كالت :- ها ولجن هااا

باوعنالها :- ها

- خايب هو و خايب هو

ام امجد تصيح :- خايب هوو

-العمصة و طلكوها
خايب هوو
وفلوسها خذوها
خايب هوو
و من بيتها طردوها
خايب هوو

وصلاوت على النبي و عموصة صارت لبلبي
وصلاوات على النبي عموصة صارت لبلبي

وكامت تهوس بنصنا و احنا نصفك و نضحك وياها خربنا ضحك و الزلم مخبوصه بالاستقبال حايرين بالتهديد سمعوا صوت الركص و الهوسات

صاحو :- شنو هالركصصصصصصص

ام رافد :- صخام الصخمني وخرن ولجن خل اشرد البيتي لا الحك العمصة
ركضت كدامنا و احنا طكيناها ضحكة ....يتبع

☆☆☆☆☆☆