ليتني استطيع فعلها الحلقة (39)

ليتني استطيع فعلها

 

الحلقة  (39)

اخذ الموبايل :- هاي الرسايل مو اني كاتبها

- يعني شنو ؟

- يعني اكو واحد منتحل شخصيتي يريد يختبرج فوتي جوا بسرعة

امجد :- ديار شجاي تسوين

التفتت وراي خالد ديطلع، وكف كبالي :- شعندج فاتحة الباب

-ما عندي شي بس سألني خالد على عمي كتله ما موجود

-ما موجود مو

ضربني راشدي قوي
لزمت خدي :- شبيك ليش تضربني ؟

لزم شعري بقوة :- واكسر راسج حيوااااانه، افتهمتييييييي، انت شنو جاي تلعبين عليه، هاااااا ، احجي ، طرطور كبالج و تجذبييييين

فات خالد للبيت على صوت الصياح شافه لازم بشعري دفعه من عندي و كاله :- شبيك تخبلت شلون تلزمها هيج

-مرتي اضربها اموتها انت اطلع برا

-احترم نفسك لا اشوه وجهك والله

امجد :- منو هذا التشوه وجه بالله

تلازموا من القمصان و يتصايحون، فزيت بيناتهم افاكك

امجد يغلط و خالد يصيح، امجد فشر على خالد
جابه بوكس على وجهه وكعه و هو يصرخ :- من تتعدى حدودك ادفنك والله ك****

كامله امجد تلازم وياه مرة لخ
محد بالبيت بس اني ومها نايمة و ذوله اثنينهم تلازموا و يتعاركون

الجهال سامعة الهوسة راكضة لبيت ابو رافد يكلولهم ، ام امجد و ام رافد اجن يصرخن و يفاككن بيهم

ام امجد جرت امجد و ام رافد سحبت خالد و اطلعه من البيت

خالد يهدد و يغلط و امجد يدفع بامه يريد يرجعله، و يغلط ، دفعت خالد برا و سديت الباب، اجا امجد
لزم شعري ووكعني للكاع

- شعندج ويااااه احجي اذا ما تحجين والله اجيب سلاحي افرغة براااااااااااسج

ام امجد :- يمه عز العزاك شجاك البنية راسها على كيفك

اني ابجي و اصيح بأيدي و اوخر بيه

رجع خالد يضرب بالباب و يصرخ :-زلممممممممة افتح الباب لا تستقووووي علييييييها

ام امجد دفعت امجد من عندي و خلتني ورا ظهرها و كامت تصيح على خالد :- روح الله لااااااا يوفقك عوفونااااااا بحالنا امشي مناااااااا

امجد عصبي و يصيح راد يفتح الباب و يطلع اله، ركضت ام امجد، لزمت الباب و هي تكله :- كافي عوفه كاااااافي عيب عليكم استحو الجوارين منا سمعت صوتنا تتعاركون جهال انتم

امجد :- روحي لهاي المشوووووهة روحي اءا ما تحجيلي هسه سعدها وياه والله العظيم السلاح افرغه براسها

ام امجد :- شصايرفهمني كلي شصاير

ام رافد تسحب بخالد و تصيح عليه ، اني فتت جوا ركضت للغرفة لميت ملابسي حطيتهن بعلاكة ، و ابجي
صعد امجد بهمة بس صوت الرجلين ع الدرج و امه تصيح عليه

فات للغرفة شافني اشيل بملابسي، سد الباب :- انت تعتقدين اخليج تروحين اذا ما حجيتيلي شعندج وياه

-اكلك انت شنو تهدد، صير سبع من صدك و فرغ اسلاحك لا تهددني و الا عوفني اروح و ابتعد

عني دفعني للكاع :- ولج تحجين شعندج وياه لوووووولا

-ما عندي مااااااا عندي شرايد مني بعد شرااااايد ، تضربني و تسحل بشعري مو حيوان عندك اني و تضربني افتهمتتتت

لزمني من ركبتي و هو يصرخ عليه :- تريدين توهميني دفتر الحركتي ما بيه سوالفج المكسرة

دفعته من عندي حيل:- عندي ما عندي انتهت وياك افتهمت

-اذبحج هنا والله و ما اخليج اطلعين

ام امجد تضرب بالباب قوي و تصيح بأمجد و خبصت الجو علينا، سحبني من جتفي حيل، ردت اوكع دفعته من عندي

كلت الك ما اكعد وخر من عندي

دفعته حيل و فتحت الباب و هو يغلط، فاتت امه تصيح :- بس كلي شصاير بس فهمني خل افتهم حتى انطيك حق لو لا

فتح الها الرسايل :- شوفي بعينج شوفي اراسلها بأسم خالد شوف شتكلي، خالد من صفحة ووسام من صفحة متزوجلي كح... وما ادري

ديار :- يعني انت الجنت تراسلني حتى تختبرني و توكعني بكلمة الحمدلله ربي ما عندي شي و اتحداك اطلع علية شي، بس بسيطة

نزلت و عفته بالغرفة، و جسمي يرجف و اسمع امه تگله :-، الرسايل ما بيها شي ما كاتبه شي اتوقع خالد ما عنده ي وياه شلون هيج ادزلها بأسم خالد مشتاق و ما مشتاق

امجد :- جابلها دفتر و كدام عيني انطاه الها و حركته و من اكللها مالمن تكلي مال بته و من اسأله مال منو هالدفتر يكلي ما اثار و اثنينهم يجذبون والله العظيم
الراسلني جان متاكد من كالي مرتك جاي تخونك ويا اقرب الناس الك ماكو غير خالد

... نزلت من عدهم ما اريد حتى اسمعهم
سمعت الباب تندك، و جهال امجد يبجون و صوت مها كوة يطلع دا تريد تعرف شصاير

عفتهم ورحت للباب، شفت من جو حذاء مرة مو رجال، رحت فتحت الباب، طلعت امي كبالي :- ها ولج خير شبيج تبجين

-فوتي

-خالد هجم عليه الباب كال روحي لبتج بسرعة محتاجتج، شصاير كليلي

-اجت رسالة على موبايل مكتوب خالد، ادخلي ذاك الموبايل و شوفي بنفسج
فاتت جوا، باوعت بالموبايل:- منو هذا ؟

-ما ادري يراسلني من الصبح بأسم خالد مكتوب بالجهاز اني عبالي خالد لما كعدت قبل شوية رديت عليه و اسمع صوت خالد برا طلع مو خالد امجد جاي يختبرني

نزلت ام امجد :- هلا ام ديار فوتي جوا

-ابنج شمسوي ابتي ضاربها مو ؟

ام امجد :- مرة و رجال لا تكبريها كولي يا الله فوتي

فاتت امي و ام امجد تخزرني افوت ، وكفت بالصالة و صاحت امي :- امجددددد لا تصيح فوك تعال و كابلني اذا بتي بيها غلط احجيلي

نزل هو الها :- ما تعرفين بتج

-اعرفها و تشرفك و تشرف راسك احجي وياي ابأدب لا تخليني ادوس بالحجي

ام امجد :- ميعاد عيب هالكلام ما يصير

ميعاد:- عرفي ابنج العيب و عود ارجعيلي
دارتلي :- ضاربج ؟ احجي متعدي عليج لا تسكتين
ازين شواربه والله اليتعده عليج

امجد :- اكسر راسها و ادفنها بكيفي اطلعي منا و لا تدخلين يلااا

ميعاد :- فدوة يكسر راسها تايهتلك بيك خير مد ايدك و شوف اذا ما خليتها تتعلك بركبتك، امشي انت اصعدي بدلي اخذج لبيتي

امجد :- ادفنها هنا كتلج و ماكو الها طلعة اذا ما تحجيلي الحقيقة كلها

ميعاد:- خليني محترمة البيت و ساكته ولا تخليني اطلعلك وجهي الثاني ابعد مني .

...امجد.بقى يترادد ويا امي و اني صعدت فوك حتى البس و انزل اروح لبيت امي، صعدت وراي ام امجد

كرصتني منززندي و تحجي بصوت ناصي :- شصاير و امجد هيج متخبل شمسوية

-كلشي مسويت رقم مكتوب عليه خالد بموبايلي يراسلني من الصبح حتى رديته اليوم شكو لان مستغربه خالد ميراسل ولا يحجي هيج كلام

-ام امجد :- يوم واحد اخذتي الموبايل صارت المصايب شلون بالله وياج ؟ الدفتر المنطيجياه خالد شنو ؟

-دفتر خواطر من زمان جان عنده انطانياه و اني حركته ظن شافني امجد احركه كام يشك

-و انت الا كباله تحركينه

-هسه جاي تلوميني كباله و ما كباله خالة اني تعبت خليني اروح و هاي هيه

-بهالسهولة تروحين ديار يمه اعقلي مو هيج الحياة ، اصبري يجي ابو امجد خابرته هسه راح يجي

-خالة الموضوع زاد عن حدة اني ما جاي ترهم وياي عيوني فاضحتني رغم والله ممسوية شي

-اذا انت لهسه تتهربين من حقوقه شلون ما يشك، شايفة مرة شهرين و ما تخلي رجلها يتقربلها شيسموها هاي ولج هو الصابر مو انت اكعدي و اسكتي

...سمعنا صووت امجد يصيح على امه
مها كايمة تبجي لأن ما رادين عليها

نزلت ام امجد تركض، و امي صعدتلي :- بس هذا الصاير احجيلي شنو سالفة الدفتر الما تخلص ؟

-انطانياه خالد و حركته و هو شاف لما حركت

-منين جابه خالد ؟ و عد منو جان

- ما ادري المهم جابه

-المهم جابه شنو ، اكو احد جان يهددنا و يدز رسايل و يفشر علينا و يطعن بينا هيج نمشيها بسهولة بس سكتوها للسالفة

-كافي يوم لخاطر ربج

-تمشين وياي لا تظلين

-ام امجد تكلي ابقي

-ضاربج و تبقين بعد يومين كل ما اجا على بالج و دمغ على راسج لان ضرب اول مرة و سكتي، معليج بامة خليني أأدبه هل بلا ادب

شصاير بينه وبين خالد هو ؟

-تمالخو كطعت روحي بس اريد افاككهم لحد ما اجت امهاتهم

-ليش؟

-يمه دنزلي خل اشوف شلون نحلها وياه

-يا فدوة نحلها شكو اخذج و غصبا عليه يبوس القنادر حتى يرجعج و اذا راد يطلك يطبه طوب لو بيه خير جان تمسك بيج .. خلصي منه

صاح ابو امجد من فوك :- ديااااااار

-اجيت عموووو

لزمتني امي :- اسمعي من يحجي وياج احجي بثقة ولا تخافين لا تحسسينهم عندج شي و خايفة خلي الحق عليهم و اغلب الحجي خليه عليه اني اتصداله، يلا انزلي

نزلت و هي شالت الجنطة مالتي وراي، و نزلت
فتت للهول ، جاي يحجي ويا امجد و امجد عصبي، من شافوني اثنينهم سكتوا، و امجد دار وجهه

ابو امجد :- شصاير ديار ؟.

ميعاد:- ابنك ما كالك شصاير يا ابو امجد يعني يراسلها بأسم ابن عمه و يكلها مشتاقلج و سوالف عيب تنحجي و فوك شينة يضربها

انطيني شسوت و ضربته

امجد :- اراسلها وواكفة ويا خالد بالباب

ديار :- لان من اندزت الرسالة صوت خالد برا اني سمعته فأستغربت ، خالد ما يدز هيج رسايل فطلعت ردت احجي وياه اجيت انت

ميعاد:- اسمع ابو امجد الشاهد الله اني احبكم و اودكم بس سوالف ابنك ما اكدر اتحملهن من يلزم بتي و يضربها و هاك شوفة عينك جارها من شعرها لو مضروب راسها و صاير بيها شي اني بيمن ربحي ؟

ابو امجد :- شنو سالفة الدفتر

ميعاد :-، عاد لا تحطون سالفة الدفتر حجة، دفتر و حركته و راح ولى لو يعز عليها و تريده ما حركته كافي عاد طوختوها طلعت من ماعونها ادورون بكل سالفة مطلعيلكم انه

ابو امجد :- ام ديار الحجي اخذ و عطا خل نسمع منهم اثنينهم

ميعاد:- شتحجي بعد العدها حجتها ابن غلطان ابو امجد ميستحي يراسل مرته بصفته ابن عمه

امجد :- احترمي نفسج مو اني التكليلي ما تستحي افتهمتي لو لااااا

ميعاد:- لا ما تستحي ولو تستحي ما تسويها تشك بيها طلكها ما واكفة عليك

ابو امجد :- راح يبقى الحجي مصايح و كلشي ما نفتهم ام ديار بس اهدي خل نعرف نتفاهم يا يابه

-شنتفاهم بعد ما جره لراس بتي و ضربها جاي نتفاهم، اني هم ادز عمامها يكتلونه و عود وراها اكلك خل نكعد نتفاهم تقبل ؟ لو تسووها عشاير و تكلبوها فوك روسنا، شو على بزركم كلشي ما تقبلون و على بتي واحدكم مسلط تسلط

امجد :- اي دكليلها بتج شعدها جايه ويا صاحبها

ابو امجد :- امجددددددد احترم نفسك

-يابه تجي ويا ولد و اني ما ادري

ديار:- انت الكتلي ارجعي وحدج اني ما اكدر اجيج، يعني لو صعدت ويا تكسي ورجال غريب عادي و من اصعد ويا ولد زميلي اعرفه و اعرف اخلاقه يوصلني و يوصل زميلاتي الباقيات ما يصير .

ميعاد :- ما هتمة الرجال الغريب يمه هو بس يريدله واحد يتهمج وياه ما خلا واحد وما كال ديار عدها علاقة ويا لو يعرف العيب ما تهم مرته و سوه هالسوالف هاي، كومي يلا

اخذت الجنطة و سحبتي امجد ظل يصيح و ابو امجد يبعد بيه و ام امجد تحجي ويا امي و تكلها :- لا تكبريها مرة و رجال كلشي يصير بيناتهم

ميعاد :- لو سوالف عادية ما تحجي مو يختبرها يريد وكعها و يتهمها بشرفها و يكتلها واسكت لا والله ما اسكت

ام امجد :- شلون ما تردينه يشك وبتج مانعته منها

ميعاد :- والله اسألي ابنج شايفتلج رجال شهرين مرة تعصى عليه و ما يكدر ياخذها

ام امجد :- يااا يعني طلع ابني المو رجال لأن ما يريد يجبرها و يأذيها

ميعاد:- ام امجد حبيبة الله شاهد اني احبكم بس بتي تعبت، على الله جاي تتحسن و انت كلش زين تعرفين حالتها النفسية شنو كافي عيوني كافي ما اعول بتي اطيب، امشي كبالي امشي يلا

اخذتني و طلعنا من بيت ابو امجد، رادت تفوت للبيت كالت :- لا تعاي نفوت لاسامة للفرن حتى ما يروح لبيت ابو امجد من يرجع

الفرن يصير بصف اسواق بيت ابو رافد، باوعت رائد كاعد بالمحل، مرينا منه و رحنا للفرن، طلعت الف و كالتله :- يحلو نريد بألف صمون

اسامة باوعلها هو ما يحجي وياها، ابتسم و هو حاول يخفي ابتسامته، جمع الها صمون خاله الها بالعلاكة انطته الالف كاللها :- ما اريد اني ادفع

ميعاد:- خليها بجيبك، اسمعني من ترجع من الشغل تعال البيتنا لا تروح لبيت ابو امجد

اسامة :- شصاير ديار شكو ؟

ديار :- تعاركنا اني و امجد

هز راسه وكال :- روحو منا صحباني عيب

ضحكت امي و اندارت تمشي، صعدت على دكات المحل تريد تفوت، كلت الها :- شعندج فايتتلهم ؟

-دتعاي خل ناخذ النا فد كم حلواية نسلس بيهن عصرونية طاكة ارواحنا

فاتت و اني وكفت اباب المحل مفتت، سألته على ابو رافد وينه كاللها :- طالع ما موجود بالبيت ، شصار ابيت عمي ؟

-كول لاخوك الا شوية جان اطلكت بتي من وراه

لمت الها فد علاكة حلويات وعصاير باردة و كالتله :-سجلهن على رافد عود، ما شايله وياي
طلعت من عنده و هو يهز بأيده

لفيينا ورجعنا للبيت، اول ما فتنا للبيت و اثار ناطة من البجي شلون امي عايفتها وحدة و سادة الباب مكسرة المواعين مال الغدا و شامرة الصينية بالزبالة و خابصة البيت خبص

امي فاتت باوعت ع البيت و هاي تكمز، لزمتها بالنعال وين اليوجعها و تصيح وراها :- تعاي النمرة تعاي اليوم اتغدى و اتعشى بيج

وذيج ما همها السانها شطوله حتى النعال ما فاد بيها، كمت نظفت البيت و لملمت و امي صاحت :-خليلنا الحلويات بصينية و جيبي النا ناكل و الا هالعايقة هاي ما انطيها عقاب وياها دشوف شلون تهجم البيت بعد من اطلع

سويت الجايبته بصينية حلويات تطلع فوك ال٧ الاف انواع و اشكال و عصاير باردة و جبتها ، اثار كعدت اول وحدة

ميعاد:- كومي انت العايقة كومي

اثار :- هليوووو والله انتم تكومون هذا كله الي

مدت امي طولها للنعال تلكته و نيشنته براسها، و هاي كامت تصرخ و تضرب بالباب خبصتنا، صحت بيها :- يمعودة دعوفيها والله دايخة و ما الي خلك، تعاي انت اتزقنبي وبلا صوت

اجت اثار تاكل ، و امي تخزر بيها، اندارتلي و هي تكلي:- وسام هذا منو ؟

-صديق وياي بالكلية

-شعنده وياج ؟

-كلشي ما عنده اصلا خاطب بس خالد يكرهه و شكك امجد بيه

-انت شنو رايدة تطلكين منه ؟

- لا ، ولا رايدة ابقى وياه .. خالد شكد ما اكول انساه ما جاي اكدر ، و ما اكدر اطلك و اعيش و خالد هنا ارجعله لا محالة و مستحيل ارضى ارجع لخالد و هو متزوج ما اتحمل

-كل كلامج خالد يعني سبب بقائج ويا امجد خالد ؟

-شي على شي يجمع، الصراحة امجد صح يشك بس حباب لا مقصر علية بمصرف ولا جابرني على اي شي ماكو رجال يتحمل كل هالمدة و يسكت بس هو سكت، غير ان اهله ناس طيبين محد بيهم يسمعني حجاية ولا احد يضوجني، غير حالة مها الما اكدر اعوفها ولا اعوف جهالها ما ينطيني كلبي، بس المشكلة اللي بحياتي خالد لا اكدر انساه ولا اكدر ارجعله ولهذا ما اعرف مترددة.

ميعاد:- الله كريم ارتاحي هنا وريحي بالج منهم

انفتح الباب و فات رافد للبيت، شافني كاعدة، حجه :- مرتاحة هيج من عالكة ناس بناس وكاعدة تاكلين هنا ديار ؟

ميعاد:- وليش عيوني ترد على بتي ؟

-من وراها علك امجد و خالد و هسه ابوي و عمي تحاجو من وراها ما ناوية تفكين من خالد انت

ديار :- انت معليك لا تدخل ولا تحاول تسويلي نفسك الأب النصوح و هالسوالف لأن ما اطيقك

رافد :- انت و النعال اطيقين لو لا اخوي ابتعدي منه عوفي لمرته و عائلته

-النعال يلوكلك افتهمت لا تتجاوز

ميعاد:- هاااا يمعوديييييين ، انجبي انت ادب سز لا تغلطين على الاكبر منج فوتي جوا يلا

هو كام يصيح و يغلط ردته اني و ظلت تصيح عليه حتى افوت جوا ، كمت من مكاني و كلت الها :- كليله الرجلج المحترم مرة لخ لا يدخل بيه ولا يطخ السانة وياي لاني ما احبه ولا احترمه

هد راد يكوملي هي كامت قبلي لزمته و ظلت تغلط عليه، فتت جوا و عفتهم :- شلون شكول شكد اكره طايح الحظ

كعدت اكلب بموبايلي و بالرسايل الدزهن امجد بأعتباره خالد، هسه يلا انتبهت فعلا صيغة الكلام تختلف ابد ما يشبه خالد شبيه اختلطت عندي

بعدين منين جاب رقم خالد و راسلني منه ؟
باوعت بالرقم اتأكدت منه مو رقم خالد هذا بس نهايته 66 مثله و مفتاح الخط اسياسيل و الارقام ٥ البقية ما تشبه رقم خالد ابد ، بس امجد كاتب عليه خالد و الرقم ما يطلع بالموبايل بس الاسم

شلون استغباني، هم زين الله ما طالع مني ولا حرف غلط لو فالته بكلمة جان رخت بيها من صدك

فاتت اثار، اتمددت و هي تفكر وضايجة، حجيت :- شبيج اثار ؟

-اريد اتزوج

صفنت بيها :- ولج انت ليش ما تستحين بس الله يستر من تكبرين شتسوين بينا، عيب هالكلام

-شنو عيب ماما من اتزوجت مو كالت اني ما مسويه عيب اتزوجت بس اني عيب

-ماما جبيرة انت صغيرة ادب سز مرة لخ لتعيدين هالكلام

كامت من مكانها و اجت يمي:- اكلج شي و ما تحجين ؟

-شنو ؟

شاورتني :- اني احب مهيمن

بعدت راسي منها و باوعتلها :- يا مهيمن

-ابن رافد زوج ماما

باوعتلها مستغربة :- ولج يمعزاية وينج وين الحب بعدج بكد فردة النعال شنو هالحجي

-مو هو اليوم من رحنا للمدرسة

- اييييي ؟

- انطاني هدية

-شنو ؟

-اجيبها الج ؟

-بالله شوفيني

راحت ركضت كدامي و اني صفنت وراها ، بعدين ضحكت من كل كلبي، دخلت بموجة ضحك وحدي، فاتت امي :- خير اللهم يجعله خير عليمن تضحكين

-على اثار تكلي احب مهيمن

-شفتي بالله النوب هاي اني شحطلها و تطيب

-ما جاي اضحك على اثار اني اتخيل شكل ام رافد من تعرف مهيمن يحب اثار و منطيها هدية

ميعاد:- حرام الا تستأجرلها ارهابي يفخخ روحه بنص بيتنا و تخلص من عدنا فد دور

ضحكت حيل، و هي كامت تضحك فاتت اثار انطتني مداليا قلب الحب بيها زئبق احمر و قلب الحب و لمع

:- دباعي هسه هاي البكد الفصمة وينها وين الحب ؟ اسمعي لج مرة لخ اذا مشيت وياه لو رحتي يمه تنكتلين

اثار :- ايوووو احنا نريد نتزوج

ميعاد:- انهجم راسج كون ولج يا زواج

اثار:- مثلج انت و رافودة

ديار:- انوب حتى اسم الدلع ماخذته منج، ماما لخاطر الله انتبهي لتصرفاتج تره هاي شتشوف منج تقلدج

ميعاد:- هي طايحة الحظ غير رجلي و ادلعه لا مخليتها يمنا و لا جايه يمها

-هي وين تنام ؟

-جوا هنا و احنه فوك

-ما تخاف وحدها

-لا انومها و اصعد

-هاي شيطانه جاي تنتبه كل تحركاتج، مو مثلي من جنت اشوف عمايلج لو عمايل الخنزير ابوي اكش و اتضايق و ابجي

ميعاد"- اححح راح تكعد تعيرنا

-فكرج سهل انسى كل الشفته و اني صغيرة تدؤون سببتولي عقدة

-شكد تحبين تكلبين بالماضي اوووي اكوم رفودة احسنلي

-بعدة هنا

-اي تمدد يلعب بالموبايل اكوم يمه

كامت من يمي و اني كعدت اباوع بكتب اثار هي داومت قبلي بيومين لأن مدرسة ، مستلمة كل الكتب بس ما مجلدتهن

كلت الها كومي نروح اني وياج نشتري جلادات
و هم نتمشى صار دنيا المغرب و الناس دخلت للبيوت ماكو هوسة

اثار :- اييي واخيرا راح افتر بالشارع

ضحكت :- دكومي كومي

لبست ملابسها و اني لبست و صحت على امي كلت الها:- راح نتمشى اني واثار نجيب جلادات

ما سمعت، اخذت اثار و طلعنا، ما رحت لمحل بيت ابو رافد ما اريدهم ما عايزني مشاكل، التفيت و حتى ما باوعت وراي منو موجود بالمحل

طلعنا نتمشا براس الشارع مناك هم اكو محل، فتمشينا الفرع كله، سيارة خالد ما جانت موجودة بالباب، كملت مشي فتنا اشترينا الاختارتهن و طلعنا

طلعت سيارة امجد كبالي، شافني و نزل ، اجا :- توقعتج هسه ابيت امج ميته من البجي لان ضاربج و طاعن بيج

-الشفته بحياتي هواي اكثر و اصعب من مشكلتي هاي، فما كامت تضوجني و تاخذ من وقتي هواي و اكعد اتاثر و ابجي تعبت

-شعندج طالعة ؟ بعدج على ذمتي ما اقبل اطلعين بكيفج

اثار :- لا رحنا اني وياها نجيب جلادات هواي حتى تجلدلي كتبي

ديار :- جاوبتك

باوعلها، رجع حجه وياي بأستهزاء:- المحل بصفج جان اشتريتي منه

-ما اريدهم و لا اريد اشتري منهم ما عايزة مشاكل

-تريدين تبينيلي انت ما عندج شي ؟

-امجد تصدك بكيفك ما تصدك هم بكيفك مع السلامة

عفته و رجعت للبيت دخلت الغرفة و كعدت اجلد بكتب اثار و ادرسها الواجب ...

لليل اجا اسامة ب١٢ اني فارشة و اثار نايمة و راافد و امي فوك نايمين ، دك الباب طلعت فتحت اله، انطاني علاكة صمون اليزود يوزعونه بيناتهم

حجه :- امي وينها ؟

-فوك نايمة

-هذا يمها

-اي

-لعد خل ارجع انام بالفرن احسن

-وين وين اسامة دفوت

-ما اتحملهم خل اروح ديار

-اسامه لا تكبرها هو رجلها بالشرع و القانون مو غريب و كاعد بالبيت، بالعكس مدامها متزوجة محد راح يعيرنا بيها ولا يحجي بس من هي مطلكة و تفتر يوميه كدام الرايح و الجاي بسيارتها يكوم يا اليجي و لاطخ بينا كلمة و يسمعنا

-شنو تريديني اقنع بزواجهم

-اسامة اتادب عاد و فوت القنعت و الما قنعت هم اتزوجو و انتهت

طنكر الا يطلع، غصب عنه دخلته جوا ، هو تعبان و شاف الغرفة باردة تمدد بفراشه كبل

دنكت بست و اني امرغله جسمه :- تعبان حبيبي

-اي و باجر وراي مدرسة

-ممجبور هيج تتعبتطلع من ال٧ للدوام تروح للفرن ما ترجع الا ب١٢ بالليل

-لا مجبور

-شكو شعندك ترا اني وياك

كام وكعد على حيله:- بيت ابو امجد و بيت امي اثنينهن كمت احس بيهن بالذل من ابقى بيهن

-ليش هناك شناقصك

-ما ناقصني شي هم خوش ناس بس اني ما احب
حتى من عشت وياج بكربلاء جنت اطلع اشتغل ويا سلمان حتى لا يعيرني
ومن كالي خالد ع الشغل نبهني و كيفت اتعب ولا اكعد حمل على غيري

-خالد شعليه

-هو الكالي اشتغل و لا تكعد بمنية احد

-هاي شوكت

-من فتحوا الفرن ابو الفرن صاحبه و كالي راح احجيلك وياه و اشتغل

-خالد

-كالي اشتغل و اصرف على نفسك و على اختك و ارفع راسك و راس اختك احسن مما كاعد و هي تصرف عليك و الناس تشوفك بالعين الصغيرة
اختك ما الها سند غيرك خليها تفتخر بيك
مو تطلب من الناس حتى تنطيك

ابتسمت تقربت منه و حضنته، ابتعد مني :- ديار شلون اذا اطلكتي ؟ اني ما اكعد عد امي

-الله كريم

- ناجر بيت اني وياج ونعيش

-شناجر ولك كل يوميتك ١٠ يعني شهريتك ٣٠٠ الف وين تكفينا

-لو اعيش بالشارع و ما اعيش ويا امي

-هسه انت متحزم من هسه دكول يا الله، نام ارتاح نام

تمدد بالفراش سألته :- تريد عشا

هز راسه و هو نايم بمعنى (لا )

... نمت يمهم و اني افكر بحياتي
منين ما اجيبها ما ترهم وياي، كلت اتزوج حتى انسا خالد و اخلي يشوف حياته، تزوجت و هو رجع مرته ولا اني الناسيته ولا هو الشايف حياته شكد ما نكول نبتعد نلكى نفسنا كبال بعض

ما اعرف شلون اخلص من هالموضوع كلش تعبت منه
دزلي خالد رسالة ( شصار وياج بالي يمج ) ما رديت
لازم اخذ قرار .. يا اعوف امجد و اشوف حياتي يا ابقى وياه و ابتعد عن خالد ابتعاد كلي

ثاني يوم اخذتني امي بسيارتها حتى توصلني
شافت رائد بالطريق، حجت وياه :- خالة ليش ما تلزم كلية ديار خط ؟ ما دامك اشتريتلك كيا و الله وفقك

رائد:- هلا ام ديار، والله جاي اخذ ابتدائية

ميعاد :- صارلك يومين اخذتهن ؟ الكلية احسن الك ترا كل طالبة ٧٥ الف احسن من دوخت الجهال و جيب وودي

بقى صافن الولد بوجهه و كاللها :- اي احسن صح بس بعد لزمت خط و التمو الطلاب راح يكتمل العدد

ميعاد:- اعتذر منهم انت شاب و على وجه زواج مو مال مستحى

رائد :- ارجعلج جواب ان شاءالله

سلمت عليه و فاتت بسيارتها :- ما اريد رائد ماما عوفيني اني الكا اشتراك

ما ردت عليه، وصلتني للكلية و طلعت لدوامها
مهند و حسام شافوني نزلت من سيارة امي، انتبهو، من فتت للكلية، اجو ورايا كالو :- منو النزلتي من سيارتها، اختج ؟

-لا امي ليش

مهند :- دكولي والله ؟

-اي والله شبيكم

-كولي غيرها مبينه اصغر منج

-هي تحب تعتني بنفسها هواي

-شتشتغل و هيج عدها سيارة عالية ؟

- بالمالية

حسام:- متزوجة لو لا

-اي متزوجة و زوجها يصير ابن عم زوجي و تحبه حيل بعد اكو سؤال لخ لو اروح ؟

ضحكوا :- مو قصدنا شي والله بس هيج حبينا نستفسر الله يخليها الج مبينه مثقفة

كلت الهم :- شكرا
ومشيت منهم، اصغر مني اشافوني عجوز و يكلولي مبينه اصغر مني، شبيه يعني اني شناقصني حتى التشوه عالجته يعني شبيه

رحت للحمامات ما تحملت اباوع بوجهي تعبان وهالات سودا جوا عيني فضيعة من قلة النوم و القهر
لا بعمري حطيت خيار على وجهي مثلها و لا كريمات
الله ينطي الصابونه التمر على وجهي يومية تغسله الا لو ما الصابونه هم ما اغسله

لازم اعتني بنفسي شنو مبينه امي اصغر مني

رحت حضرت جميع محاضرات اليوم ولا فوتت وحدة وولا وحدة منتبهتله يا افكر بمشاكلي يا بأسامة لو تمر على بالي العرمة اثار و اضحك لو اتذكر كلام مهند و حسام على امي و ابقى افكر شلون اعتني بروحي

رجعت للبيت اثار هسه جاية تريد غديتها و كعدنا سوا جوا نقرأ، اجت امي من الدوام و رافد هم اجا و صعدوا فوك ..

هو يوم يم مرته الاولى و يوم يم امي بس من يجي من الدوام يجي لبيت امي لأن ماكو هوسة بس لثار و ما عدها احد تلعب وياه اغلب الاوقات لو تروح تلعب وتقرأ ويا بنات خالد لو تلعب وحدها او تكمل واجباتها لو ع التلفزيون يعني البيت كلش هدوء فيجي هتا يرتاح للعصر يروح لبيته

تقريبا الساعة ٤ اني متمددة و اثار يمي تباوع على سبيستون، اندكت الباب، كلت الها :- اثار اكلعي شوفي منو ما بيه اكوم

راحت و اجتي، كعدت ع التلفزيون :-، منو ؟

-خالد

-فزيت من مكاني :- خالد !!! شعنده جاي و شلون يجي، المن ؟

-ما ادري

ملتهيه تباوع ريمي ما مركزة وياي، كمت من يمها بسرعة طلعت للهول، صدك خالد :- هاي شعندك هنا

خالد :- و عليكم للسلام ورحمة الله و بركاته

ابتسمت:- لا صدك شعندك هنا لا يروح احد يشوفك

-ويشوف ما فايت ابيت غريب، بيت اخوي و هو الجاي يدفع ايجاره و اخوي موجود فوك ما داخل بغيابه حتى احد يحجي

-لا بالله

- زين احوالي شكرا على سؤالج

-المن اجيت

-لا شكرا ما اريد غدة لا تكلفين نفسج

ضحكت :- هاي شبيك

باوعلي :- البيه انت ، ابو ابويه احترك البارحة بس اريد اعرف اخبارج ماكو و من ادزلج رسالة ما تكلفين روحج و اطمنيني

- ما بيج حيل مشاكل و من توكعين بالمشكلة فدوة خالد ساعدني

-تعيرني ؟

- لا بس اسلوبج وياي كلش صاير يغث

-انت مو رجعت مرتك لو تروح الها احسن

- هالموضوع لا تدخلين بيه

-اي لعد انت هم لا تدخل بحياتي

-هيج صارت ؟

- اي

-كام من مكانه :-ابوي و امي و رافد الفوك و عمي و كل اهلي و عمامي يتعاركون وياي حتى ابتعد و اني كل الهامني اعرف انت شلونج ومحد مأذيج، ولج من صدك اني هاين روحي وياج و انت ما يغزر بعينج شي

سكتت ، حجه :- عايفلي مرة تتوسل مني الكلمة و جاي تابع وحدة تستحسف ترد عليه بكلمة و تجاوبني من صدك اني غبي

-حشاك بس ابتعد مني خالد خليني....

قاطعني :- خليني اعيش خالد، خليني ارتاح خااالد، ابتعد خالد روح خالد، ولي خااااالد
هذا بس اليطلع منج مووووو ؟

نزل رافد :- هاي شكو خالد

خالد :- من انعل اليوم الصار بيه خالد و تورط بهيج انسانه حقيرة

نزلت امي :- هم زين اجيت اريد احجي وياك

خالد :-، انت بالذات ما اريد اشوفج

راد يطلع وكفت كباله :- لا عيوني خلودة مو على كيفك منين اخذت الدفتر و منو جان يهددنا

-رافد ابعدها من طريقي

رافد :- انت بيك شي ترا مو صاحي انت

ميعاد:- انتظر جوابك يلا منو الاخذ الدفتر ؟

وخر من جانبها ، صاحت وراه :- بتي اتزوجت حس على روحك و ابتعد منها

صاح :- تتهنى ويا

وضرب الباب وراه
اخذت نفس تنهدت و فتت للغرفة ابجي
شكد صعب الاتمناه ابعده بنفسي
يحترك و يحاجيني بعتب و ما اكدر انطق و اخليه يتأمل .. ياربي ساعدني انساه

لليل .. اجا احمد جاب جهال امجد يمنا لأن مها تخرطت كلش و نقلوها للمستشفى و ام امجد وياها و محد بالبيت ويا الجهال فجابوهم يمي

وكلتهم و بدلت الهم وكعدو يلعبون ويا اثار شوية و نومتهم خابرت عمتي حتى اطمن على مها كالت كلش حالتها بالنازل درنالها دم لان دمها موشل

بقت هي تحجيلي حالتها و اني ابجي
كالتلي :- اذا تكدرين تعاي بدالي باجر هنا البيت فارغ و اني رجليه ما يساعدني على وكفت المستشفى

كلت الها :- بعيني باجر اخلص دوامي واجيج

حجت :- اداومين و الجهال ؟

-ما ادري بس لازم اداوم عندي محاضرة كلش مهمة

-يلا عود عوفيهم يم عمج لبين ما ارجع

-ما اطول اني اول محاضرة و اجيج

-ان شاءالله بنيتي ديري بالج ع الجهال

-بعيني

خليتهم يمي و ثاني يوم وديتهم لعمي و طلعت للكلية، اول محاضرة و تعذرت رحت للمستشفى تبادلت ويا ام امجد

امجد جان بالدوام، للمغرب يلا اجا، ما يحجي وياي داير وجهه عني ما اهتميتله ، حاول يحجي ويا مها راد
مها فاقدة ما حاسة بأي احد

جاب النا صندوك مي و نفر كباب و صمون وراح بالانتظار كعد خاف نحتاج شي
ما اشتهيت شي لان قبل شوية وحدة من اللي بالردهة انطتني بسكت و باكيت عصير جزت نفسي بعد

نايمة بمكاني تقريبا الساعة ٣ ومر مثل الطيف كبالي
كأنو مها كامة على حيلها و مرت من كدام عيوني تمشي و تباوعلي

فزيت من نومي بسرعة باوعتها هي كبالي، تشهك بقوة و مفتحه عيونها حيل كمت يمها مفزوعه و ما حاسة على روحي

لزمت ايدها :- مهاوي حبيبتي
كامت تشهك بقوة و تباوعلي، لزمتني عصرت ايدي حيل حسيت ايدي راح تتكسر بأيدها على قوة القبضة و هي تشهك بقوة

تحاول تنطق و اني اقرأ الفاتحة و القران و اهدي بيها و ارفع بصوتي حتى اللي بالردهة يكعدن، كعدت كم وحدة كامن يلبسن حتى يطلعن يشوفن ممرض

نطقت و هي شاهكة عيونها حيل و تجالع، نطقت كلمة وحدة بس ( جهالي ) حجتها و ايدها رخت من ايدي

صرخت من كل كلبي :- مهااااااااا لا مهاااااا اكعدي مهااااا

اباوعها عيونها وكفن و هن مفتحات على حيلهن
ماتت
اخذتها بحضني حيل و صرخت من كل كلبي :- مهاااااااااااااا ...يتبع

☆☆☆☆☆☆