ليتني استطيع فعلها الحلقة (41)

ليتني استطيع فعلها

الحلقة  (41)

عشت مرسآل يم عميآن
محد يعرف شبيه
والسآعي الـ خذاني بعيد
اخرس مآقره الـ بيه.🖤

.......

ميعاد :- نزلت جوا ، باوعت على ام رافد : ها يعني باجر نروح ؟

ام رافد :- بيش الساعة تجين ؟

-وره الظهر

بتول :- شبيهم خالد و ضحى ليش يصيحون ؟.

ام رافد :- شجاهم

نزل خالد عصبي ، وكف كبال امه :- خابري واحد من اهلها خل يجي ياخذها و طفل واحد ما تاخذ وياها

ام رافد :- يا يمة شجاك شصاير

عافهم و طلع ، كلت الهن :- اني اترخص منكم ارجع لبنيتي اشوفها شسوت هاي اذا ما اكعد على راسها الكاها مخربطة الدنيا

نزلت ضحى تبجي :- الله لا ينطيج ان شاءالله حية خاربتينا اني ورجلي و طالعة منها الله يطلع حبوتي منج يا نذله

ام رافد :- شبيج شجاكم شبيه خالد

ميعاد :- بتي ابتعدت من رجلج و كل ما يجيها تبعده و ما تريده و عافته الج، تفضحينها يم رجلها و تريدين تخربين حياتها ليش، لو من تفضحينها حلال و من تنفضحين حرام و نصير انذال، ان جان بيتج امن گزاز لا تشامرين الناس حجار

ضحى:- والله انت و بتج ساقطات و اسقط خلك الله، الله ياخذجن و يخلصني من شرجن

ام رافد دفعت ضحى و هي تگلها :- شمسوية و خالد يطردج كولي

ميعاد :- هي كالوها كح... ملهى ولا كح.. بيت ،
خل اكملها الج ما دام السانج بعده طويل وياي، و حتى ام رفوده تعرف السالفة ، اكولج بيها عيوني كل السالفة ضحى جانت رايدة تتزوج واحد ومواعدته بالزواج و من شافت خالد رضى ضربت ذاك بوري ورجعت لخالد .. الامانة لله هي ما مسوية شي غلط
بس بتي هم ما سوت شعدها ادور وراها ؟

وهاي انت الدكيتي الباب و اني رديتلج الجواب
ومع السلامة ..

طلعت منهم و عفتهم ينضربون ابعضهم ، دخلت لبيت ام امجد، لكيت ام امجد حاطة حساني ابن امجد و تنوم بيه :- ها وينهم لعد

-الجهال يم ديار فوك

-ام امجد لريدج تساعديني عيوني

-على شنو

-نحل قضية امجد و ديار، صارلهم فوك للشهرين متزوجين نكول لخاطر مها، بس المرحومة راحت و نامت بكبرها الله يرحمها و ذوله ما تصير بيناتهم مودة ورحمة لا ما يتم زواجهم كامل

-والله على بالي الموضوع بس هي تعبانة و هو سودة عليه مقهور هم مو سهلة مريته و حبيبته ماتت و جهاله تيتمو، يجي من الدوام لا سالفة ولا رواية على وجهه چفي ينام لو يكابل هالجهال

-وشلون نظل نتفرج عليهم، انت احجي ويا ابنج اليوم و اني اعلم بتي

-الله كريم هسه يجي و احجي وياه، حجيتيلي على وحدة لاحمد ما كتيلي مني هي ؟

ميعاد :- بت حليمة اخت سلمان هم بنية حليوة و طالبة و مثقفة و السمعته ابنج هم هاويها

ام امجد :- ولا جاية على بالي بس والله خوش بنية على اقل نعرفها

-خيه و الحجي بيني و بينج البنية بس هي بقت ابيت ابوها يعني لو خذاها ابنج هم يستفاد و يعيشون مرتاحين

-يا ليش ما تدرين حليمة مسجلة البيت بأسمها

-بأسمها ؟!!!

-اي غير موقعتها على تنازل ومسجله البيت بأسمها ما سمعتي الحجي ذاك اليوم

-لا والله، شكالت ؟

-كالت خليت رغد تتنازلي من زمان من كبل اتزوج ابو رافد ، تكول شمدريني منو بتي تتزوج و منو يلعب بعقلها تالي انشمر بدار المسنين و اطلع منها بلاش سجلته ابأسمي و هي تكعد عندي هو اول و تالي راجع الها

-برضات بتها لو غصب عنها

-والله يا اختي بعد ما اعرف

-زين حصة سلمان شنو اكلتها ؟

-سلمان مات بعد يا حصة

-اي غير جان متزوج ديار

-والله ما اعرف بس ما اعتقد الها لان هي اتزوجت، و بكل الاحوال ما الها لان هسه اببيت كله بأسم حليمة

ديار :- ها ماما اجيتي

ميعاد :- اي ، نامو الجهال ؟

-بس فطومة كاعدة

-تعاي وياي

ديار :- صعدت وياها ، سألتها :- شسويتي لمنى ؟

-مو منى كولي ضحى

-ضحى شنو ! شعليها ؟

-طلعت هي الماخذه الدفتر من منى مسويه كل هالعمايل وبعد نا مخلصة بايعه مسكنة براس الزوج الجنت تحبينه و راجعة

-صدك عود ؟

-اي والله

-وشسويتي؟

-سويت اللي هي سوته وياج رحت كبال رجلها و حجيت ، الشفته خالد ما قبل نزل كال لامه حتى ياخذونها، عوفينه منها نارها تاكل حطبها، خليني وياج ، ما دام الجهال نامو كعدي حتى ارتبج

...اخذت نفس تنهدت .. باوعتلها محجيت

- لا تبقين تشمرين حسرات خالد الجان رايدج شاف حياته انت موكفة حياتج ليش

-مو خالد

-شنو لعد

-ما اعرف هالموضوع من اتذكره احس اريد استفرغ ابقى اتذكر ذيج الايام

-ذيج الايام راحت وولت لازم تصيرين قوية و تتعديها، الحياة مثل الكتاب ما تكدرين تمشين بيها لا ما تطوين الصفحة المضيتي بيها .. اطوي صفحة الماضي و قوي نفسج رجلج خوش ولد اكسبي ولج شرايد منج الله الاحد هي شغيله وحدة، و تمشي حياتج كلها يا بتي

... هزيت راسي محجيت، نظفتني و رتبتني و اني كلشي بيه مشوش عقلي ما اعرف شصابه ، احس مغص يصيبني كل ما اتذكر العليا

كلش تشوشت لدرجة ردت ابجي، كملتني هي و بقت تنصح بيه بأمور زوجية كلت الها :- كافي امشي راح تخليني ازوع

ميعاد:- اسمعي ولج لطامة مو وجهج هذا تكابلي للرجال لو هسه شما بيج من يدخل ابتسمي، مو بفلوس والله يا عالم الابتسامة مو بفلوس ما تخسرين شي لو ابتسمتيله خلي الرجال يحس انت رايدته مو لاطمة بوجهه و محسيته مجبورة عليه

-ماشي ماشي بس روحي

-فوكها، عمي يلا رايحين بس مشيها يفلك الله طكت ارواحنا

مشت للكنتور باوعت ملابس النوم، طلعت واحد و خلته ع الجرباية ورادت تطلع

- البس هذا ؟!!

-لا يابه تلبسين هذا شنو نزلي جيبي بجامة عمج و دشداشته و فوطة عمتج لبسيهن و تكبعي للرجال و كعدي انتظري بلكي الله يخترع ويهج فد مرة

ولج يمة انت راح تربيلي علة امجد مو سلمااان كافي اعرفي شلون تفكرين و تعيشين حياتج مثل باقي النسوان، يلا اروح ما اوصيج

بقيت اباوع عليه وهي راحت :- البسه لا .. هو حتى جسمي من جوا متشوه لا لا ما البسه ، ضميته و طلعت ثوب نوم شوية عن الركبة و ربع ردن ومكياج و شعري مشسور، احسن من الطلعته امي

بقيت كاعدة بمكاني بس بطني تمغصني كانما عندي امتحان، و هو هم ما قصر ساعتين و هو ما مبين، هدور لا نزلت ولا شفت البيت شمحتاجين

فاتت ام امجد للغرفة ابتسمت من شافتني باستني من راسي وكالتي صيري سباعية و داري رجلج ما الج غيره بعد و هم ما اله غيرج
بقت تنصح بيه و اني دخت كلش بعد ما افسر كلمة عن كلمة، العرفته هو جوا متمدد ويا فطومة

نزلت ام امجد كالتله اصعد يم مرتك عوف الجهال اني راح انام يمهم ، هو عايفهم و صاعد

اني مطفية الضوة بس ضوا التلفزيون، فات هو ، احس كلشي بجسمي كام يلويني، حجه :- شلونج

كوة طلعت مني :- زينة

خله كدامي علاكة كرزات و اخذ الريموت دارها على فلم عربي (دكان شحاته) اني كاعدة بمكاني ما تحركت، حجه :- كومي خلي الكرزات بكاسة حتى نباوع الفلم و ناكل براحتنا

-اي
كمت من مكاني الثوب قصير شينزلني جوا ولا اكدر ابدله، انتبه هو ، كال :- اذا ما تكدرين تنزلين عوفيه بعلاكته

كعد ع الجرباية و كال :- جيبي
تقربت انطي العلاكة ، لزم ايدي و كال :- كعدي يمي
كعدت بس جسمي احس الدم يفور بيه من التوتر و ادية ترجف

ما جبرني اتقرب منه اكثر، كعد يشرحلي على بداية الفلم ولو ما انتبهت على كل كلامة بس هو اندمج بالفلم، فاني نسيت التوتر و بقيت اباوع وياه ع الفلم، شال من العلاكة كرزات و حطها بيدي، بقيت استنكي الفستق و اكل و اباوع و نسيت السالفة تقربت اشمر بالمنفضة اليمة ، و اباوع

طلعت لقطة سخيفة بالفلم درت وجهي خجلت كلش كمت اباوع بالسكف، ابتسم هو و كال:- هاج كومي شمري الكشور بالزبالة
كمت بسرعة حتى اداري الخجل، طفى التلفزيون من الريموت صارت الغرفة ظلمة حيل عفت المنفظة ع الميز حسيت بخطواته، مد اديه من ورايه على خصري و همس :- طفيت كلشي حتى لا تتوترين اكثر

بلعت ريكي، اتصنمت بمكاني، همس:- ما رايد اجبرج على شي انت راضية ؟

طلعت صوت ( امممم) بدون ما انطق اي حرف

اخذني بحظنه وجان حذر حيل حتى ما يتعنف او يضايقني، بس جنت كلش متوترة جسمي كله يرجف
كل اللي يجي على بالي هي الايام اللي عشت بيها ويا ابوي بخوف عقلي كام يقارن مقارنات سخيفة بس امجد جان يختلف .. ما جان يشد حيل مثل كل حالة مريت بيها قبل .. جان متخوف اكثر مني انو يأذيني او اخاف فلهذا حتى ايده ما جانت تشدني بقوة
وهالشي ساعد عقلي يفرق ان اكو اختلاف بالموضوع .. و هان علية هواي بخوفي و توتري

.... ابتعد مني بدل و نزل
بقيت بمكاني ما اعرف حسيته تضايق بعدين
بس ما راد يحجي و نزل، هو تضايق لو اني يتخيلي هيج، ليش طلع بسرعة ؟

رحت للحمام سبحت، رجعت لكيته بالغرفة فاتح ضوا و تلفزيون و كاعد، ما حجيت بقيت انشف بشعري

امجد:- ديار تعاي هنا اريد احجي وياج

التفتت اله، بقيت اباوع بوجهه، شكله جدي مو مثل قبل شوي مرتاح و يتعامل وياي بلطف، تقربت وكعدت كباله ع الجرباية

امجد :- انت مو كلتيلي سلمان جان عاجز و زواجنا جان مو حقيقي

-اي

-بس انت مو بنية

-يعني شلون مفهمت

-اكيد دارسة و تعرفين موضوع غشاء او هيج شي ؟

-افتهمت

- اي ؟

- اني كلت الك ان اني صارت بيه حالة نفسية لان تعرضت للتحرش

-كلتيلي للتحرش مو للاغتصاب وفرق جبير بين الاثنين

-هو نفسه

-امج كالت هي اخذت نفسها و انت تكليلي تحرش صيري بمكاني اصدك منو بيكم انت لو امج ؟

-امي كالتلك هذا الشي قبل لا اني احجيلك الحقيقة اكيد ما راح تكلك بتي هيج صار وياها

-اغتصاب و اخذ عذرية بعمر صغير مو شي هين ، تريدين تقنعيني ان فقدتي عذريتج و انت طفلة

-منو كالك المريت بيه شي هين ؟ لو هو هين جان هان عليه ما سببلي عقدة و حالة نفسية

-باوعي بعيوني و كليلي ماكو شي ثاني ؟

-جيب القران و اقسملك ان ما مارست الحرام ويا اي بشر و كل التحرشات اللي تعرضتلها جانت غصب عني وبسببها تأذيت هواي و حتى انت جنت صعب عليه

بقى ساكت ما حجه اي شي، ردت اكوم اجيب القران حتى اكد اله كام و طلع برا :- شلون ما اجيبها بحياتي ما جاي ترهم شلون ما ادري

باوعت موبايله يمي، خابرت امي منه، سولفتلها، كالتلي:- لا تفكرين ولا تجيبين ولا تودين .. من راح تخافين و تشيليله هم راح تشككي، سوي روحج ما مهتمة و اتصرفي وياه عادي و اذا حسيتي بي زاد بالموضوع كليلي عود ساعتها اني ادخل

التسوينه هسه نامي و شبعي نوم ، والف مبروك بنيتي يارب يفتحها بوجهج و يمشي وياج مثل المي و يسندج و يدللج بجاه كلمن عنده جاه

.. نهيت وياها الاتصال و مثل ما كالتلي حاولت ما اتأثر بالموضوع، بقيت لازمة موبايله و اباوع بيه ، موبايله جان لمس و كومة العاب بيه منزل و مقاطع و فيديوهات .. بقيت ناسية روحي و اني العب و اكلب بيه

فات هو ، شافني العب بالموبايل ما حجه، الساعة جانت ٢ و نص، طفى كلشي و اجا نام و انطاني ظهره

سألته :- الجهال كلهم نايمين

جاوب بكلمة وحدة :- اي

- يم عمتي ؟

ما رد بعد .. عفته و بقيت اكمل اللعب، محسيت على روحي الا الصبح طالع و الجهاز طافي خليته ع الشحن و نمت

كعدت ب١١ الظهر هو كاعد يباوع على قناة على اخبار رياضية، كلت :- صباح الخير

حجه :- صباح النور
بدون ما يباوعلي

-اكو شي ؟

-ليش

-ما اعرف حسيتك متضايق مني

-سكت و دار وجهه
عفتهو نزلت لكيتهم بعدهم بفراشاتهم ما كاعدين لأن جمعة و عطلة فماخذين راحتهم، باركتلي ام امجد و بقت توصي بيه و عفية بنيتي و سباعية و ديري بالج

للعصر جان تفوت امي و ام رافد .. حافتلها الوجه و صابغتلها شعرها لون جكليتي و كاصته الها .. ام رافد عيونها صفر حيل و امي حاطتلها كحل مبينات لون عيونها كلش قوي

بقينا فاكين حلوكنا و ام رافد فرحانه بروحها، عمتي تكول لامي :- والله سويتلي واهس اصبغ شعري ليش باقي مشيب

و امي تسويلها واهس و تحمسها، شو لبست عبايتها عمتي و كامت ، ام رافد و امي اشتغلنها ضحك
اخذنها وراحن رجعن للصالون

اجت بتول :- امي وين لعد ؟ كالت سارة اجت لهنا

-رجعن ويا عمتي تريد تكص و تصبغ

-دشوفي بالله امج كببت علينا العجايز

ضحكت :- يمعودة خل يشوفن نفسهن شنسويلهن

-و احنا الشابات وجوهنا شلونها

-ما عندنا خلكهن

-اي والله ، اني اروح

-وين اكعدي

-لا والله جهال خالد مناك وحدهم

- ليش ضحى وينها

-مو البارحة امج حاجيه كبال خالد و خالد متخبل ، عاف البيت و طلع و امي خابرت اهلها اجو اخذوها

-على سالفة الدفتر

-لا مو بس هاي غير طلع جانت عدها علاقة ويا واحد ومن رجعت لخالد عافته

صفنت :- هاي من شوكت

- كبل لا يرجعها

-اذا كبل لا يرجعها ما بيها شي منو ما عنده ماضي

-اي حبيبه ماضي بس مو تتوسل خالد و هي واحد ، من ايست من خالد جلبت بذاك و من رجع خالد عافت ذاك، هءا لعب شلون تريدينه يثق بيها بعد ما جانت تجي تبجي دموع حتى ترجعله وهي بعلاقة ويا غيره ؟

-مدام ما طالع من عدها شي يكفي مو لخاطرها لان هي تبينت وحدة حقيرة بس لخاطر البنات

-الى متى يسكتلها لخاطر البنات، والله معليه لا ادخل ولا احجي شيريد يسويلها خل يسويلها ، اني راوح عيوني مع السلامة

الله وياج .....

... بعد هالفترة مرت الايام بهدوء
امجد تحسس كم يوم و اني اخذت الامور طبيعية .. رجع فك ومشت الامور .. شوية شوية كام تزيد العلاقة بيناتنا

صار لما يستلم راتب يجيبه يخلي عندي ومن يحتاج يكلي انطيني، جان مديون ١٠ ملايين لأبوه ع المهر و على علاج مها .. و قبل لا يتزوجني جان كل اكل البيت من برا ما عدهم اليطبخلهم بس ام امجد و يا دوبها جانت للجهال .. لهذا صرف جان قوي فيداين متراكم عليه صاير ١٠ ملايين

طلبت من عمتي تشوفلي اللي بالمنطقة منو تسوي سلفة حتى اجبره يقتصد من راتبه ويوفي دينه ..
سالت عمتي و لكت سلفة ويا ام الحصة ٢٠ اسم بشهرية ٥٠٠ بس بادية صارلها شهرين .. كلت الها ميخالف اشترك .. اشتركت بالسلفة
حجيتله، كال :- خليها الج عالجي باقي جسمج بيه والله كريم ع الدين ينحل

كلت اله:-، بالاول فك دينك و خل نخلص من الدين و الله كريم الزمن كدامنا و عود اسوي سلفة لخ و اتعالج ..

وهاي جانت غلطة من غلطاتي لما فكرت اقدم شي على نفسي ، ما اعرف يمكن الدنيا هيج صارت ما تحب الزين تحب الاناني و اليدور بس مصلحته .

اما سالفة خالد .. ورى اسبوع ابو ضحى مرجع ضحى وكاعد ويا خالد و ابو رافد ومعتذر منهم و كايل الهم ان هو الجان رايد الزواج و هو راد يفرضه عليها لان كاعدة بلا زواج .. بس من قررت ترجع لرجلها عفنا ذيج للسالفة

حجي النسوان يختلف عن حجي ابوها .. القال و القيل كثرت ان هي لا جانت عدها علاقة بهذاك و حتى مفاتح ابوها بالموضوع بس من خالد موافق على رجعتها عافت ذاك ورجعت لخالد
ضاعت الحقيقة وين بس بالحالتين هي ما غلطانه بشي من حقها تتزوج جهالها و ماخذيهم منها المن باقية ابيت ابوها، وحقها ترجع لخالد لان بناتها عنده

بس امي كبرتها عليها لان رادت تفضحني، ولو هي بالاصح فضحتني لو ما امي كلبت السالفة عليهم و سدت حلوكهم .. فرادت تردلها الموقف الها .. لان من اجت و شكت النا استقبلناها و ما رديناها و ابتعدت من خالد بس حتى يرجعلها تالي جازتني بهالسوايا
على كولة امي :- انطيتها طينتها بخدها

... خالد متضايق منها و الكل يهدون بيه و يقنعونه حتى يسكت عن السالفة، مرجعها لبيت اهله و هو سافر
اسبوع و دزلهم خبر ان هو متزوج

من درت ضحى بالسالفة و خالد متزوج عليها متخبلة كايمة ادك و تلطم و حتى متخربطة بس محد جان بالبيت ياخذها و ام رافد فرحانه بابنها لان اتزوج عليها و كسر خشمها .. عايفتها متخربطة و طالعة

باقية بس بتول تصحي بيها بالمي لحد ما صحت
باقية ادعي عليه و على امي

امي ما تحب تفوت الها هيج سالفة، خصوصا صايرة هي و ام رافد دهن و دبس لأن غيرتها هواي و حتى كامت ملابس تاخءها و تكللها عوفي الغوامق اخذي الوان فاتحة . والله صدك ابو رافد ملاحظ التغيير ومتصالخين بيناتهم بعد ما جان هاجرها من اخر مشكلة صارت بيناتهم

من يومها و امي و ام رافد صارن حبايب ، فام رافد مخابرتها مسولفتلها على ضحى، كايلتها :- ادعي عليه ؟ وشسويتلها اني فوك ما بعدت بتي منها وكتلها هاج تهني بيه و تروح تفضح ابتي ، لا لا اني باجر جايتكم العصر

ام رافد هم ادك اصبع للمشاكل كايلتلها العصر باجر انتن يمي عازمتجن على عصرونية

امي ما جذبت خبر ثاني يوم ورى الظهر مرت عليه و على عمتي ، اني ما جنت ادري عن الموضوع اي شي لان ابتعدت عن بيت خالد ابتعاد كلي حتى اوتر علاقتي ويا امجد او يشك بشي و نرجع لنقطة الصفر

مرت علينا كالت :- ام رافد عازمتنا اليوم على كعدة يمها

ام رافد :- شكو

ميعاد :- عصرونية يمعودة نتونس شعدنا يومية ابيت

ديار :- روحو اني ما اروح

ميعاد :- انت بالذات اريدج تروحين

-ليش عود ؟

-بعدين تعرفين

-يمه تعرفيني

-لا اعرفج ولا تعرفيني بيت و ماكو احد بيه بس النسوان حتى رفودة ما موجود، كووومي

كمت بدلت للجهال و رحنا اني وياها و عمتي ، فتنا للبيت ام رافد صايرة غير شكل لابس ثوب فالينة لونه ازرك بس شكد حلو طالع عليها ، اباوعلها و بيني و بين روحي اضحك على سوالف امي و عمايلها

كعدنا و بتول قدمت النا جاي و كعك و كيك، حطت الاستكان كبال امي، كالتلها :- شو بس انت ضحى وينها

بتول :- فوك كاعدة

-يا صيحيها خطية كاعدة وحيدتها خل تتونس ويانه

سارة بتها نطقت من يمها :- اني اصيحها اني اصيحها

ركضن هي و اثار فوك حتى يصيحن ضحى، و امي و عمتي و ام رافد يسولفن دقيقة وحدة ما خلن لا صالون لا جيران لا ابن منطقة ما حجن بيها
ما شفتي هاي و ما سمعتي ذاك ..

مر مهيمن من كدامنا صاحتله امي :- تعال يبن ابوك الحلو من اروح فدوة لهالعيون الزرك

اجاها وكف كبالها، كالتله :- روح صيح امك كللها سالفة تفوتج نزلي

هو راح من برا صعد لبيتهم ،منى ما جذبت خبر، ثواني و هي كبالنا اجت ، شفتها امي صاحت :- هلا بضرتي عاش الشاف طولج عيني

ضحكت و كالتلها :- شنو السالفة شكو اليوم

ميعاد :- يااا ما تدرين

- شكو ؟

- تتذكرين ام الدفاتر

--منيه ؟

-شبيج ثوله ذيج الكربست براسج سوالف الدفتر

منى :- ياااا هههههههه غير تلكتها البارحة و تكربست براسها خوش اجتها بالكصة

ميعاد:- غير بزودج يالغمة لو باقية عليج تاكلنا و تشربنا ام الدفاتر و انت باقية تكرضمين الاظافر

بقن يضحكن و اني صافنه عليهن شلون ضراير .. واضحك ، امي وكت المصايب تفر الناس فر و تلعب بيهم طوبة ووكت الضحك كلها تحبها من السانها و اسوالفها .. ما عدها حقد على احد التكرهه اليوم تحبه باجر وماشية هيج ويا الناس بالسالفة و الضحكة

ضحى اتأخرت بالنزلة ما نزلت، صعدت الها بتول شوية و نزلت هي و بتول بس وجهه كلش متضايقة ، شافتها امي ، صاحت :- هلا بالعافية و بالخير على زواج رجلج

انصدمت هنا، زواج شنو ، عمتي كاعدة يمي ما اكدر اسال و استفسر عن الموضوع ، ضحى دارت وجهه و ما سلمت على امي بس على عمتي و كعدت

رجعت امي حجت :- يا شنو طالبتني بثار و ما تسلمين مو اني الزوجته والله هو الراح تزوج

ضحى :- سكتي مني فدوة ما الي خلكج

ميعاد :- لا تنقهرين حبيبة هم الزلم كلهم هيج براسهم فندق مال نسوان يملون من هاي يرحون لغرفة هاي وكل وحدة تطلع .. تنزل غيرها بمكانها

ديار اني باقية اصفن بالوجوه، اتحججت بحسوني وكمت اغسله و صحت على بتول سالتها، كالتلي:- اتزوج وحدة سورية بعمان و بعده هناك

صفنت بوجهه عصرني كلبي، ومدري شصار بيه، سألت :- يحبها ؟

-بعدج تحبي ؟

-نزلن دموعي بسرعة ، كمت اداري بيهم منا و منا، ضحكت بتول :- اني ما عفته لان بطلت احبه، اني عفته لان خفت اشاركه او احرمه من عائلته الا كل ليلة جاي اعيش مكابرة ويا روحي بس اريد انسى وما كاعد انسى

بتول :- الله كريم كلشي بالايام يروح و ينسي

- الماخذها منو

-والله ما اعرفها الاعرفة صديقته سورية اسمها مينا

-اعرفها مينا صديقته اللي ابوها توفى بحادث بسوريا و امها مريضة

-ما ندري احنه بهاي التفاصيل .. النعرفه عايشه بعمان هي و امها و بس يحبها ميحبها مندري

مسحت دموعي و كلت الها :- الله يوفقه و يسعده ان شاءالله

غسلت وجهي ورجعت، بس تلخبطت مشاعري ما اكدر اكعد بعد افكاري ضربت، معقوله جان يحبها لما جان وياي ؟ معقوله جان عنده علاقه و اني ما ادري، مسولفلي عليها كبل معقوله اكو شي و هو ما محسسني
بقيت ارجع اسوالف قديمة و اقيس

كلت لامي :- اني راح ارجع للبيت محد بيه

ميعاد :- تؤبري البي مشان الله خليكي

ضحكت ام رافد و هي تكلها :-، كلبتي سوري

ميعاد :- غير ناسبناهم شلون لعد، مشان الله مرت عمي انطيني هالكعكاية من يمج

كامن يضحكن بصوت عالي، ضحى ضاجت، اني ندست امي و خرتها :- كافي طوختيها كومي خل نروح

:- اولي على ئامتي شوبك يبنتي ما عم تشوفي قاعدين و ما احلانااااا

ام رافد :- تبين شاااي يمرت ابني البربوقااا

ميعاد :- ما هيك يا مرت عمي جفصتي بابو اللهجة ذيج كويتي كويتي السوريين يكولون ( بددددك شاااي) ما يكولون تبيييي

كامن يضحكن بكل علو صوتهنؤ ضحى كامت صعدت فوك
ديار :- ماما راح اروح

-وين رايحة اكعدي لا تشككين عمتج بشي يلطامة

-كافي والله كعدة سخيفة

ميعاد :- خالدييييية

ام امجد :- ولج عمتج يمعزاية
وخربت من الضحك

ميعاد:- يا صدك نسيت ، مرت عمي شو رأيك نروح نزور حليمة العمصة نشرب شاي يمها و نضحك عليها شوية

ام رافد :- وشنصخم بيها

ميعاد :- نضحك عليها شوية و نخسرها عصرونية الا اليوم ما نطلع الباب من الاكل

ام امجد :- اني اروح وياجن

بتول ظلت تضحك على سوالفهن، شو صدك كامن لبسن و رادن يكومن يروحن ، كمزت منا و بتول كل وحدة تكول اصبرولي بس البس

ميعاد :- يااا طلعت كلها تحب المصايب مو بس اني

باوعتلي وجهي عاقدته و ضايجة عقجت وجهه و هي تعيب عليه و تكلي :- لطمي بعد بعد لطمي على توالي ابوج

-اني راح ارجع للبيت

-ولج يمه انت ليش ما بيج حظ مو تشوفينا كلنا راح نروح نسير يم بيت العمصة

-يمه هيج كعدة كلها تقليد و استهزاء على البشر اني ما احبها

-اوووو راح يكعد يصفط علينا مبادئ بدر شاكر السياب، دمشي يا يمة دمشيييي هو بيت عمج و سدينا ؤاجعتلي تصفنين بالحياطين و تتذكرين واحد حاضن مرته بعمان و تتحسفين و تقهرين بروحج عليمن ، امشي كدامي لشوف امشي

-لو مجايبتي لهنا جان ما عرفت ولا دريت انت تعمدتي اعرف

-اي تعمدت اخليج تعرفين بطلعة حتى بسوالفنا تلتهين لما ترجعين معودة روحج ع الخبر و تكدرين تلمين نفسج مو تعتزلين بغرفتج تتبجبجين و تخلين رجلج يضرب اخماس باسدادس ، لمي نفسج شوية و قويها ودوسي على كلبج

درت وجهي منها بودي ابجي، بس اخاف لو نزلو دموعي عمتي كبالي ، بقيت ضامتها بكلبي

بدلت منى و بتول وصن ضحى ع البيت و طلعنا نتمشى، فتنا بالفرع الثاني، فرعنا السابق
صارلي سنة تقريبا من اجيت للدورة ولا مرة مريت بهذا الفرع ولا اجيت منه

امشي و اتذكر هنا كعدت، هنا بجيت ، منا مشيت
بيتنا مفلش ومبني جديد رايحة كل معالمة
وصلنا لبيت سلمان انقبض كلبي اتذكرت من سحلته هنا لما جان ما يريد يروح وياي لكربلاء حتى لا يسوي العمليه و سحلته للتكسي غصب عنه

فتت للبيت شفت الدجة، ابتسمت اتذكرت لما حليمة جانت طاردة سلمان و خليت اسامة يدهن الدجة ووكعت حليمة

شلون ايام، و شلون جنت .. جان اليتعدى عليه لو على شخص احبه ما اسكتله شكد جنت وكحة و شكد تغيرت هسه اتأذى و اسكت و ما احجي
شكد تغيرت.

فتنا للبيت حليمة رحبت بينا و دخلنا، كعدنا و بدت ام رافد ادوس و حليمة ادوس و هن يضحكن ..

اجت رغد سلمت و صبتلنا مي بدولكة، امي كالت الها :- غدي منو بعد يشرب من مي البوري يا حليمة ما ينضاك دجيبيلج مصفي مال مي لو دزيلنا ابطالة مي نشرب

حليمة:- الصندوك بالفين

ام رافد :- غدي يمه شني قيمتهن الالفين يماااي يجي ابو رافد و اكله شهالبخل هذا

حليمة :- هاي شبيجن اني بس جاي اكللجن بالسعر

ميعاد :- تكليلنا ليش، حتى بالف ونص مو بالفين بحبحيها بداعة عيونج العمص التخبل

كامت انطت الفين لابن منى ، كالت الها امي :- وياج كعك فدوة

ام رافد :- لا دزيلنا موطات اني و بتي وجهالها و جنايني ١٦ موطة

حليمة :- ياااااا باردة ماكو موطة ماكو

ام رافد :- لا لا اكو اكو بمحلنا اكو

حليمة :- هااا اذا اكو بالمحل جيب وسجله على ابو رافد

ام رافد :- لا بيبي لا بعيد عليك محلنا، روح لهذا بصف البيت جيب منا و تعال

حليمة :- ما عليه شي ما عليه خل يروح

ام رافد :- سيارات اخاف على حفيدي، انطي فلوس دزييي

احنا فطسنا من الضحك عليهن ، و حليمة ادور بجيزدانها، جرته منها ام رافد خذت منها ٥ الاف و كالتله :- هاك بيبي روح جيبلنا ب٥ الاف موطة

حليمة :- ياااا شني تريدين تنتحريييييين

ام رافد :- لا اريد احتفل غير ابني متزوج

-و تحتفلين براسي

ام رافد :- غدي شنو هالنفسية غير خطار ابيتج احنا شو ما تحترمين، رجعها بيبي ما نريد

كامت تنفخ خلينه و تكله :- رووح يلا رووح

لازمين ابطونا من الضحك من وراهن و من وره مداهرهن، مشى ابن رافد و امي باوعت الرغد كالت الها :- صلاوات على النبي شصايرة رغودة كمر بحالة

خجلت و كالتلها :شكرا خالة

ميعاد :- لاكيتلج عريس توب بالباكيت شلون ولد

ام رافد :- منو ؟

ميعاد :- اخو نسيبي و له شرايج يا ام امجد

ام امجد :-، والله يا ام ديار كمر و كاعد هنيال ابني لو حواها

ضحكت هي و كامت، و حليمة تكللها :- منو ابنج ؟

ام امجد :- احمد

حليمة :- لا بتي تريد تكمل درتستها

ميعاد :- و شعليه مو هيانها بتي دا تكمل دراسه هي اكو عمة مثل ام امجد فدوة العينها وردة ام كلب الطيب لو الدورين الدنيا ما تلكين مثلها و مثل ولدها ادب و اخلاق ورزانه و هم هالاثنين

ام امجد :- فدوة الكلبج حبيبة والله ما عندي شي وياهن الله هن مرتاحت و ارجولتهن راضين شعندي وياهن اهم شي عندي راحت ولدي و هدوء بيتي

حليمة :- يعني انتم شنو جايين خطابة لو تشوفونه ؟

ميعاد :-، لا والله جليين نشوفج و شفنا البنية و ما اضم عليج من زمان مخليلين عليها ، الوا لو تحجيلنا ويا البنية و تاخذيلنا رأيها شفايتلنا نوفقلنا راسين بالحلال

ام امجد :- اني اخذت رايه قبل مدة و كتله عليها و هو طلع هم هاويها للبنية

ميعاد :- بيناتنا الحجي البنية هم رايدته ، يلا حليمة لا توكفين بقسمة البنية مشيها

حليمة :- اي غير احجي وياها اشوف رأيها انطونا صبر

فات ابن رافد كال لبيبيته :- ما لكيت عد هذا موطات جبتلكم حلويات و طشر العلاكة بنص الكعدة

صرخت حليمة :- و انت منو كايلك اشتري حلوياااات ما لكيت ترجع، رجعهن رجعهن ما ياكلون

ام رافد :- ناكل ناكل عوفهن بيبي روح

ام امجد كامت تجر و تنطي لجهال امجد و ام رافد توزع علينا و امي تصيح :-، اكل الخباثة شكد طيب يا يابة كل عمري ما ماكله هيج حلويات طيبة

حليمة :- عاد انطني وياجن شوية

شمرت الها امي من يمها
كملنا اكل و سوالف كمنا من يمهم المغربية، تمشينا بالفرع ، جان رافد واكف اباب المحل، فتح عيونه

رافد :- يا يابه شنو هالفيلق هذا

ميعاد :- مشينا خطابة و اجينا

رافد:- الله يستر منجن خطبتيش ؟

ام رافد :-- خطبو بت العمصة لابن عمك السكران

وكفنا كلنا يمه، هو يباوع لنسوانه و يضحك ، دنك على ابنه باسه و شال بته من منى ، حجت ويا منى :- خل اشوف المحل فدوة

رافد :- فوتي اخذي اللي يعجبج

فاتت غمز لامي :- رايحة للبيت

امي دارت وجهه منه و مشت :- ايييي
وهو يضحك

ام رافد مشت كبالنا و ام امجد كالتلي:- فوتي للمحل شوفي شنشتري للعشاء

-مسوية عجين كباب ما نحتاج خل نروح للبيت لا امجد يجي

رجعنا للبيت وكفت اني اكلي و عمتي كاعدة يمي تلعب بجهال امجد قالا باله فات ابو امجد و امجد ، كالتلهم :-الله جابكم اكعدو رايدتكم بموضوع

ابو امجد :- خير شنو الموضوع

ابو امجد كعد، و امجد اجا باس خدي و اخذ من الماعون كباية وانتجى ع الكاونتر ياكل و يستمع لامه و ابوه يحجون

فتحت ام امجد موضوع خطبة رغد و احمد و ما جان عدهم مانع بالعكس فرحوا، كاللها ابو امجد :- شوفي رد البنية و امها حتى اذا وافقن اخذ اخوتي و نروح لعمامهم نخطب البنية

.. صبينا العشا و اجا احمد حجو ويا بالموضوع الفرحة بينت بوجهه بس ابو كام ينصح بيه :- هذا زواج و عوف الشرب و توب ابني حرام كافي كون عائلة
و من هالحجي

وامجد هم يحجي وياه وكام ينصحه ، و اتعهدله اذا صارت غرفة نومه على حسابه هو يشتريها اله
احمد مبتسم و مرحب بكل كلامهم و نصايحهم و فرحان

كمت من يمهم و اني ادعيلهم ، يمكن احلى شي بالدنيا من واحد ينجمع باللي يحبه و يصير اله ، الله يهنيهم
مر على بالي خالد بقيت افكر بزواجه، فات امجد

- شدا تسوين

-كملت تنظيف و دا اكمل عشا اسامة خطية يجي من الشغل تعبان

-سمعتي ؟

-شنو ؟

-خالد تزوج سورية

-اي سمعت خطية يستاهل الله يوفقه

- اي ، كملي البيدج و اصعدي بعد اني راح اصعد الجهال انومهم بحضني

-ماشي

مشى كدامي باوعت عليه، ما اعرف يمكن راد يختبر ردة فعلي شنو ، هم زين الله ضبطت نفسي و جاوبته طبيعي ما ارتبكت

... من بعد ايام حليمة خابرت على عمتي وكالتلها :- البنية موافقة و ما نلكة احسن منكم روحو على عمامها و اتفقو وياهم

عمتي ما صدكت، سدته منا صعدت بشرت احمد نزل فرحان و امجد يباركله و احنا نبارك و ام امجد تكول هيج احضر و ابو امجد يكول هيج احط

راحو على عمامها و اتفقو ع الحاظر و الغايب و قرروا الجمعة الجاية يوم الخطبة

.. اتفقنا حفلة خطبة صغير بيناتتا ما نعزم احد اليجي من الكرايب هلا بيه بس على كدنا ...

هم بس بيت عمامهم جيش جرار الله يحفظهم
فحسبنا احساب اني و عمتي للخطبة ان نخلي الاكل زيادة مو نقصان

رحنا اني و امجد قبل يوم من الخطبة تسوكنا لحليمة و بتها كارتونات الكيك و صناديك البيبسي و رجعنا الليل ما نمنا ذيج الليل من التعب

خوات امجد كلهن اجن و اقاربهم .. و صار البيت هوسه ووحدي بس اني، خواته معتمدات عليه، انغسلت غسله ذاك اليوم ..

الا ثاني يوم كعدنا يوم الخطبة و ناس تحضر و ناس تصفك و ناس تكول هش لا تصفكون المرحومة و ناس تكول اييي ماتت الله يرحمها اذا ما صفكنا رجعت يعني

و اني غاصه بالمطبخ ناكو غير بتول تساعدني،

هناك و سمعت صوت خالد و هو يصيح على بنته :- هلوووو بابا

باوعته الباب مفتوح نازل من التكسي و مستقبلاته بناته، نزلت زوجته السورية ، لزم ايدها و فات

باد كل الشغل من ايدي، بقيت واكفة و متصنمة طلع رافد سلم عليه وكاله منا فوت منا عمامنا كاعدين

جابها و فات من المطبخ بيه عمتي كاعدة و ام رافد و امي منتجية ع الباب و خوات امجد بالممر ، وكف كبالي و كال :- هااا الله يساعدكم
وهي حجت بخجل :- اهلين كيفكون .....يتبع

☆☆☆☆☆☆