ليتني استطيع فعلها الحلقة (36)

بواسطة -


ليتني استطيع فعلها


 
الحلقة  (36)
احمد :- منو هذا القريب علينا يعني ؟ زين امحد انت شلون تشك بمرتك لمجرد اجتك كم رسالة للموبايل ؟ لو ما ديار عايشة ويانا من زمان و نعرفها و نعرف طبعها هسه نشك بيها لخاطر واحد يريد يشوه سمعتها ؟
ام امجد :- هذا الكلام الصح يمه حرام عليك لا تشكك بمريتك اذا ما تشوف بعيونك لا تصدك اذنك
ابو امجد صافن بوجهنا يفسر بعقله و الغضب مبين بملامحه ، اخير شي كال :- صبيحة اني جوا رايدج بساع
فات ابو امجد و عمتي راحت وراه ومها تصيح و احمد كاعد يهدي بامجد، كام امجد :- شنو الحجي يابه شو صاير الحجي ختلات
صاح من جوا عمي:- بعدين احجي وياك امجد
فتت المها و هي تكلي :- شبيه عمي فهميني شصاير ؟
-جايته رسالة عني، لو بس اعرف منو الجاي يسوي بيه هيج راح اتخبل
مها :- اخذي حذرج ديار و ديري بالج عمي حيل شك بيج
-شسوي و شبيدي والله حتى الموبايل انطيته العمتي و ما بقيته عندي
شوية و فاتت عمتي، كالت :- عمج شاك بيج، و اني كتله حتى الموبايل اخذته منها و ما عدها شي البنية يمكن بيت اخوك جاي يهددون بس ما يردون امها تتزوج ابنهم هم لا تحط كل الحق على البنية
مها :-و اقتنع ؟
-لا بعده شاك
مها:- عمه فدوة العينج ترا والله هاي لا حول و لا قوة لا تعوفينها خطية الجلاب كامت تنبح من كل صوب عليها و كل الكام حجه عليها
ام امجد :- الله كريم بنيتي
طلعت و صاحتلي، رحت وراها ، حجت :- انت عود ليش مو مثل النسوان ؟ تره ما صارلج اسبوعين من اتزوجتي لا كحلة مرت عينج ولا اعتنيتي بنفسج هم الرجال يشك هاي شبيها وياي
البس اتكشخ اتعطر و انتظر رجلي لا بس تنتظرين منه و انت كلشي ما منطيته ما يصير هيج
-خالة هو ما تقبلني
-شنو يعني ؟
-اخر مرة كش من جسمي و بعد ما حاول
صفنت بوجهي ، بعدين هزت راسها :- روحي اصعدي لغرفتج هسه و سايسي رجلج لا بس ساكته و تبجين تخلين الما يشك يشك بسكتج و بواجيج
-ماشي
صعدت فوك امجد نايم بغرفة مها و الجهال يمه يلعبون، مشيت لغرفة احمد دكيت الباب، سألت اسامة اذا يحتاج شي كالي :- لا تعشيت ما محتاج شي
رحت لغرفة امجد دخلت، عزلت العاب الاطفال، نظفت الغرفة و رتبتها و هو كاعد ضايج و ميحجي وياي
حجيت :- امجد تشك بيه ؟
امجد :- لو انت بمكاني شتسوين
-راح انتظر اشوف بعيني
-و هذا المنتظرة و لو شفت والله لخليج تتندمين ع اليوم الاجيتي بيه لهاي الدنيا
-انت ليش بس تهدد ؟
-والج عين تحجين ؟
-وليش ما الي عين شسويت حتى ما الي عين من يوم زواجي وانت شاك بيه و اني لو اريد اخونك ما مجبورة على زواجك اني الوافقت برضاتي
-ووسام ؟ و الرسايل
-اوكف عوف الرسايل وسام شنو و تجيبه بالطاري من شوكت اني عندي شي ويا وسام ترا الولد عمره ما حطني اباله ولا فكر بيوم يباوعلي ولا اني فكرت بيه كافي طوختها
-طوختها اني مو ؟
-ما مجبور بيه ما تتحمل عوفني
-و اني عايفج ما متقربلج ترا غير لمها و لجهالي ما عندي شي وياج ما معتبرج زوجة خليها ابالج
-خدامة قصدك
- سكت
عفت التنظيف من ايدي و طلعت من الغرفة رحت لغرفتي، كلش تضايقت بس صوجي اني الحطيت روحي بهالموقف اني الرضيت اكون بهالدرجة
مشوهة
و امي مشبوهه
و ابوي ارهابي
شتوقع من الناس تاخذني بالاحضان لو تتمناني
كل اليبعد مني حقه و ما ينلام ..
واحد بس الرادني و ما راد بعدي و اني العفته بأرادتي
عفته بعد ما تعبت من اهله و هم يقارنون وجهه بوجهي هو مثل الكمر و اني وجهي ما يتباوع
بقيت افتر بغرفتي
ساعة اتمدد
ساعة اروح اباوع وجهي بالمرايا و ابجي
وساعة اواسي نفسي و اكول اثبت نفسي بدراستي
اتذكر وضع البلد و تخيب كل امالي
السويته ارضى بيه انسانيتي ما ردت رضى احد
سعيت لمساعدة انسان عسى الله يوكف وياي و يساعدني
ارجع اتذكر الدفتر و اكره روحي
وين راح معقولة عد خالد فعلا ؟
اختنكت للصبح و اني ما نايمة، جان بيومها جمعة و الكل نايم حتى امجد نايم ولا احد كاعد
لبست ملابسي و طلعت افتر بالمنطقة ع الشارع اختنكت بس بالبيت، بقيت افتر شارع شارع بالدورة لهناك قررت ارجع
باوعت محل بيت ابو رافد، شفت خالد واكف
دخلت للمحل :- صباح الخير
باوعلي مستغرب :- صباح النور الساهة سبعة شعندج طالعة بهالوكت
-طكت روحي من البيت كلت افتر ما ادري شوكت تخلص ه العطلة و ارجع لجامعتي كلش تضايقت
-اتضايقتي من البيت لو اكو احد مضايقج
-لازم مسمعت ؟
-شسمع ؟
-خالد الله عليك دفتر المذكرات عندك ؟
صفن بوجهي:- مو رجعه اسامة
-ضاع ووجاي يهددوني بيه كل يومية
- منو الجاي يهددج ؟
-ما اعرف امي دزولها رسالة و امجد و ابو امجد
-شاكة بأحد ؟
-امي شاكه بيك
- و انت شاكة بيه ؟
-لا، خالد فدوة ساعدني اكيد الدفتر ابيتكم لأن كل التهديدات تثبت هالشي توقع يكولون لامجد مرتك جاي تخونك مع اقرب الناس الك
- و هو مصدك
-اني جاي اخون ؟
-لا .. جنت اتمنى تسويها حتى انهي زواجج منه بس ما سويتيها، بس استغرب طالعة بهالوكت ما تخافين يتفقدج و يشك بيج اكثر
-تعبت يريد يشك يطلك شيريد يسوي يسوي اذا هو ما حاسبني زوجه اعتبره زوج ليش
-تحبيه ؟
-ما احبه حب زواج، احبه عادي مثل قبل يعني بس قبل اكثر، القالقني هسه المذكرات خالد فدوة ساعدني
-اذا ابيتنا فعلا فاني اعرف شلون اطلعهة
-شلون ؟
-خلي هالموضوع يمي و هسه ارجعي للبيت لا تصيرلج مشكلة
-ماشي
-اسمعيي
-هاا
انطاني علاكة بيها جبن و حلويات :- شنو هاي
-حجة تكليلهم طلعت لخاطرها
-بعدك تشيل هم لادق تفاصيلي
-ما اريد بعد و اني هذا الاسبوع مسافر
-وبناتك ؟
-ائمن وضعي هناك و اخذ بناتي و بتول وياي
-من شوكت هالقرار ؟
-من البارحة و الاهل كلهم رفضوه بس ميهمني رأيهم
-وضحى ؟
-مو ابالي ارجعها ما اريدها
-بناتك خطية لخاطرهن كافي تكابر خالد لا تفكر بأنانية ، لو جنت افكر بأنانية ما اتزوجت
- و شحصلتي ؟ تمنيتي ما اتزوجتي
-لان اني مو مثلك، ما عندي ، بس انت عندك بناتك يستاهلون التضحية
هز راسه بأيجابية و كال :- امشي ليشوفج احد و تصير مشكلة و لا تشيلين هم للمذكرات اني احلها
-ماشي ، بيباي
ابتسملي .. مشيت درت اتذكرت المسلسلات التركية بهيج موقف يديرون وجهم حتى يشوفون اللي يحبوه بعده يباوع وراهم لو ما هامة ..
التفتت لكيته يباوع وراي و نظرته بيها حزن و حسرة
ابتسمت اله ، لوحلي بأيده ( بيباي ) و اشر روحي
مشيت .. رغم كل السويته بيه و السواه بيه بعد اللي بداخلنا ما جاي يبرد،من غيره احس اطنان هموم فوك ظهري وبوجودة جانبي احس نفسيتي اتحسنت و انطاني جرعة قوة اتحمل بيها ايامي
رغم كل الصار ما يرتاح كلبي الا يمه
..دخلت الفرع شفت امجد من بعيد واكف بالباب، رحت يمه، مريت حتى ادخل للبيت، حجه :- وين جنتي ؟
-اختنكت و طلعت افتر بالمنطقة الصبح ليش اكو شي
-اني مو امج حتى اطلعين وكت ما عجبج
-انت البارحة كلتلي اني ما معتبرج زوجه فبأي صفة تحاسبني ؟ لا بيناتنا شي ولا انت معتبرني و ما كاعدة الا لخاطر بت عمتي و ما رايدة اخليها وحدها و هي بأخر ايامها .. بس انت ما الك حق تحاسبني
مثل ما تهيني و تكلي ما اعتبرج زوجة خليها ابالج
فخليها ابالك انت ما تحكمني كزوج .. و مو خدامتك اني
فتت جوا ، لزك ايدي :- لازم الحجي اليوصل و التهديدات كلها صدك
-تريد تصدك بكيفك تريد لا هم بكيفك تعبت اخاف و احسب احساب لناس ما معتبريني ولا مخليني ابالهم
-هيج الحجي
-خلينا متفقين نرجع مثل قبل لا اني انتظر منك ولا انت تهتم و اليربطنا بس مها بسسس
-هالحجي ما يمشي وياي
-حرت وياك احجي و احاول اتفاهم وياك ما تريدني ابتعد تكلي هالكلام ما يمشي عندي، التريده بالضبط شنو
-تصارحيني
عفته و فتت للبيت ، اجا وراي :- من احجي وياج ما تتركيني و تمشي
-كلمة لخ اعوف البيت و اطلع ابتعد مني
-جاي تهدديني انت
-لا ما اجي اهددك بس لان بزعت روحي خليني اعتني ببنت عمتي المشمورة مثل الجلب محد بحالها تتمنى اليكعد يمها
- سهلة
حجاها و صعد اني خليت جدر مي و حطيت بيه بيض و بلشت اسوي ريوك، للظهر و امجد متضايق مني و يفتر وراية فرارة
اعوفه ما يدورني اتركه يفتر وراي
شلون ترهم ما اعرف
ام امجد رايحة لبيت ابو رافد و حاجية ويا رافد و ام رافد بموضوع المذكرات و كايلتلهم :- لو تلكون الدفتر و تعرفون من الجاي يدز رسالة لامجد و ابو امجد لو احجيلهم الصدك و اخليهم هم يتصرفون كافي عيب استحوا على ارواحكم جذبتو عليه و كلتو خالد ما عنده شي ويا البنية تالي يهددني اذا ما اطلكت هو يخليها تطلك ..
فرافد كايل الها خلي الموضوع عليه اني افهم الموضوع
وكالعادة ام رافد ما قابله بالحجي و باقيات متراددات الى ان مسكتهم رافد .. و جايه
حجتلي .. كتلها :- بلكت صدك و يلكون الدفتر ويعرفون كنو هذا الجاي يهدد
كالتلي :-، لا تهتمين اطلعه من عيونهم
لورى الظهر اجا اسامة من برا فات لغرفتي جنت اعزل الملابس فوك و مها نايمة جوا و جهالها يمي يلعبون
اجا تقرب من ، حجه بصوت ناصي :- ديار خالد وصاني اكلج شي
-خالد !! شنو ؟
- كال عرفت عد منو المذكرات و خل تطمن و تريح بالها محد يهددها بعد
-صدك الله عليك
-ليش هو الدفتر مو جبته اني الج هنا والله اني متأكد
-خب دسكت انت المطفي غير انلعب بيه جوله من وراه بس الله عليك صدك كالك هيج
-اي والله قبل شوية شافني و كالي
:-الحمدلله ربي
دنحجي سمعنا ضجة جوا، نزلت بسرعة فزت تصيح شكو ديار :- والله ما ادري
طبت ام امجد :- انطيني الجبة مالتي ام رافد تخربطت خل الحك اروح وراها
-خير شكو ؟
-شمدريني اجا مهيمن ابنهم و كال بيبي تخربطت و ابو رافد ما موجود ؤكض ابو امجد .. اركضي جيبيلي الجبة
رحت جبت الها و طلعت وراها اباوع شكو و المح امي واكفة بحوش بيتهم
..........
ميعاد :- دكيت الباب طلع الي ابنهم مهيمن
فتت للبيت :- منو هنا يحبيبي
-بابا ما موجود
-لازم تعرفني اخص ابوك و تحجيلي عنه، لا ادري ابوك مو هنا قبل شوية جان يمي يحلو اني جاية على بيبتك هنا ؟
-اي جوا بس خل اكللها
-لتكللها اني مو غريبة حبيبي
فتت للبيت ام رافد و بتول كاعدات بالهول يسولفن، دخلت عليهن :- مرحبااااا مسااااء الخير يحلوات
ام رافد :- صدك الاستحو ماتو انت شلون تفوتين للبيت هيج فالتو شنو كومي اطلعي برا
-تزعليني منج هيج ام رفودة شيخ الشباب و اني الجاية الج حتى تباركيلي اطرديني ليييش
-اباركلج ؟
-عزاااا متدرين ؟ غير صرت جنتج
ام رافد :- يبووووووووووووووو....يتبع

☆☆☆☆☆☆

تعليقات

إرسال تعليق

اهلاً وسهلاً بقرائنا الكرام نتشرف بكم في مدونتا ارجو الاشتراك في مدونتنا ليصلكم كل ماهو جديد تحياتي لكم