ليتني استطيع فعلها الحلقة (35)

بواسطة -


ليتني استطيع فعلها




الحلقة  (35)
بقيت ابجي و اتوسل بيها، كالتلي :- فوتي كبالي بسرعة بدون صوت طايحة الحظ
-خالة
-اشششش فوتي
مشيت كبالها اخذتني، للغرفة اللي نايمة بيها مها، مها من سمعت صوت البجي فزت :- ها خالة شبيها ديار ؟
-اخذي شوفي بعينج هاي المأمنة بيها و ردتيها تصون رجلج و جهالج تالي فجريات الكاها تخابر ابن عمة هسه اني شحجي و شكول فهمني
اخذت مها قرت الرسالة ، شالت راسها :- منو هذا ؟
اني بس ابجي ما رديت، حجت ام امجد:- خالد اكو غيرة يعني، سألتها و نكرت و سألتج قبل و نكرتي و حتى ام رافد سألتها و نكرت علاقة ديار بخالد تالي الفاس وكع بالراس
مها:- والله خالة ما ادري اني بكلشي ، ديار احجي شجاي يصير ؟
ديار :- كعدت يم مها، مسحت وجهي اخذت نفس و ام امجد ترزل :- صار بيناتنا حب فترة بس امه ما جانت تريدني و مرته كل يومية تجي لبيتنا تتوسلني ابتعد منه حتى يرجعها، قبلت طلبج و اتزوجت حتى ابتعد من عنده
ام امجد:- و اذا مبتعدة من عندة شعندج مخابرة جذبة جديدة هاي ولج عبالج اصدكج بعد
-هو دزلي رسالة والله
-ودزلج! تخابرينه ؟
-ما حجيت وياه شي والله بس كلتله اني مالي ذنب بأمي هي التعاركت وياه
-يعني العركة الصارت من ورا امج !!
-لا بس هي شكته لأبوه وكالتله خل يبتعد من بتي تزوجت، و ابوه متضايق منه و متعاركين ابيناتهم
-يعني بسببها و تنكر يمة منجن مو نسوان من غضب الله على راسج، عالكات راس براس و ماخذات جانب، يصير الصبح و اخذج الامج اذا ما ادبتج حسابي وياج يطول، و موبايلج هذا صار يمي ما انطيجياه و بس تحجين اسولف لامجد كلشي
كامت من عدنا وراحت برا، التفتتلي مها :- ليش ديار هيج ؟
-ما جاوبتها
-مو سألتج مو كلت ليش هيج ديار
-اني لخاطرج عفت كلشي و قررت ابتعد منه و اربي جهالج بس هو اللي ما جاي يعوفني، بيوم العرس راد يكلب السيارة بينا و ثاني يوم خله امجد يشك بوسام عنده علاقة وياي و لهسه ما خلصانة منه كل يوم يدز رسالة و يهددني بيها
-يعني انت ما رايدته ابد ؟
-اني طلعت من حياته و ما اريد ارجع و تزوجت حتى ما ارجعله لأن تأذيت ابوه ما يريدني و امه تكوم تكعد تعيرني بوضعي و مرته تريد بناتها لهيج عفته
-لهذا السبب مانعة امجد منج ؟
دنكت رجعت سألت :- بعدج تحبينه ؟
-البكلبي بكلبي ما ضارة احد بيه بس امجد من حاول يتقربلي كش من جسمي و ابتعد مني بعد ما حاول يتقرب
-يعني هو الما راد ؟
-ما كال بس هو من تلمس التشوه البجسمي ما اتقبلني دار وجهه و انطاني ظهره
هزت راسها ، حجيت :- راح تكول لامجد مو ؟
- والله ما ادري احتمال تكول لابو امجد، بس ليش جذبتي عليه و اني اقرب الناس الج ليش ما كلتيلي عندج شي وياه
-ما ردت اكول لاحد ردت الشي ينتهي و بس
-وجذبتي لحد ما هسه محد مراح يصدكج، ليش تسوين بنفسج هيج ؟
-كلشي بحياتي احاول ارهمة و تتماشي وياه و ما جاي يصير كلشي مو على مرامي، تعبت
-اصعدي فوك اني احجيلج ويا عمتي و ديري بالج امجد يحس اكو شي.
هزيت راسي و كمت و اني افرك بأدية، صعدت فوك فتحت الباب ودخلت، حس امجد شال راسه :- ها
ما رديت عليه، حجه :- بيش الساعة ؟
-ما ادري
باوعها بقى يركز بيها كوة كلت اله :- بستة وربع
امجد :- من تصير بالسبعة كعديني
-اي
رجع نام، و اني افور بمكاني من التوتر، كل شوية يجي ابالي تفكير شكل شنو راح تسوي امه و اختنك
اتذكرت: شلون لو خالد يدز رسالة يهددني بيها ؟لو يذكر سالفة طفل و هيج شي و انفضح وتنخبص الدنيا فوك راسي !
ياربي شورطت روحي اني
هذا الزواج اصلا كله غلطة بحياتي و كلما جاي استمر بيه اتورط اكثر من الفات، بس لو صدك و اني حملت من خالد شراح اسوي ؟
زين ليش ما فكرت بهالموضوع قبل لا اتزوج شبية كملت، شجنت اتوقع من كعدت كبال بيت خالد ما راح انفضح و اهله كلهم يدرون و يكرهوني !
اروح و ارجع بالغرفة افتر راسي
اتضايقت حيل و اختنكت ما اعرف شلون اخلص روحي من كل هذا !
شفت موبايل امجد كبالي، باوعته نايم
تقرب منه على كيف، اخذته فتحته طلعت رقم خالد ، كتبت اله (موبايلي صار عند ام امجد عرفت كلشي لا تراسل هناك بعد و عوفني بحالي الله يخليك ) دزيت الرسالة اجاني تقرير تم التسليم بسرعة حذفت كلشي من موبايله
ردت ارجع الموبايل بس خفت خالد يدز شي مرت دقايق ماكو مسج هم زين، رجعت الموبايل للميز
كعدته :- امجد صارت بالسبعة تكعد
حجه :- كاعد
رجف گلبي، بلعت ريكي و ابتعدت منه، كعد باوعلي :- شبيج؟
-ماكو شي
باوع على موبايله، شاله و دور بيه و كام على حيله :- حضريلي ملابسي بسرعة
-اي
رحت بسرعة لغرفته هناك حضرت كلشي يحتاجة و نزلت جوا حتى اسويله ريوك لكيت ام امجد كاعدة ووجهه ما يتباوع مبينه كلش ضايجة، من شافتني، حجت :- شعندج ؟
-اريد اسوي ريوك لامجد
-تلعبين من ورا ظهرة و تخدمينه ولج
-ما رديت عليها مشيت اسويله الاكل
هي بقت تفتر و متضايقة نزل هو، باوعها :- ها يمة شو كاعدة ؟
-روح توكل يمة
-اكو شي
- لا امشي
-صاير شي بينج و بين ابوي
-لا يمه لا تشغل بالك روح بالسلامة وليدي
باس راسها و حجه :- اني اليوم راح الزم خفارة ما ارجع ديرو بالكم على معا و الجهال
-ان شاءالله وليدي لا تشيل هم
اجا للمطبخ تريك ع السريع ووكف بالباب:- تحتاجين شي ؟
هزيت راسي (لا ) ، طلع فلوس ٢٥ الف انطانياها :- خليها مصرف عندج اذا احتاجيت شي للبيت انطي
-اي
-ديري بالج ع الجهال ، يلا مع السلامة
طلع و اني رجعت صعدت لغرفتي فوك بعد ما كابلتهم، للصبح عمتي دزت اسامة على امي رجع كال الها: ما موجودة
خابرتها و كالتلها :- اريدج ابيتي بسرعة تجين
حاولت امي تفهم شكو بس ام امجد ما حجت اي شي بس كالت الها :-تجين و تعرفين
خابرت على موبايلي، ردت عليها ام امجد :- موبايل بتج يمي صار
ميعاد :- خير ان شاءالله شكو حتى ماخذة موبايل بتي ؟
-كلت الج تجين و نحجي
ميعاد :- مسافة الطريق و اني يمكم
ام امجد :- منتظرتج
بقيت اني انظف و اغسل بالجهال و اوكلهم، فاتت امي شافتني بالمطبخ، اول ما دخلت فاتت ام امجد، كالتلها :- فوتي ابو امجد ما موجود و امجد بالدوام لا تخافين
ميعاد :- اخاف منين يمة
-من عمايل بتج
-الحمدلله اعرف بتي ما يحتاج تكليلي بعمايلها
-يعني تعرفين بيها عدها علاقة ويا خالد و هي على ذمة ابني
عقدت حواجبها، باوعتلي عيوني كامت تكت، تخصرت الها :- و انت مخلية دموع بتي تجري على هالتلفيق هذا ؟
-تلفيق لو حقيقة بالخمسة الصبح لكيتها تخابر بخالد
-واءا خابرت يعني خانت ترا ما ارضاها هالحجي على بتي و اعرفي حدودج ام رافد
-وفوك الحك صوتج عالي شنو من طينة انت
-احترمي ام امجد و خليني محترمة كلش زين اعرف بتي غمة و ما بيها خير لان عافت كلشي و ضمت البكلبها بس حتى تخدم ابنج و مرته و جهاله و تترك ابن الناس يرجع مرته شذنبها اذا هو ما هادها ؟
بيكم خير وكفوا ابن ابن عم ابنكم تره عجزت و اني اتعاؤك وياه و اكله ابعد هسه جاية اتذبين الصوج ابتي
-لا تبرين بتج و انت تعرفينها كلش زين شنو ، بتج جذابة و انت هم جذابة
-والله خلف الله عليج اذا طلعنا جذابين لا احد دك بابج و لا كالج تعاي اخذي بتي انت الجيتي و صرتيلها مي و حرير حتى ترضى بابنج
-عبالي شريفة
-و غصبا عن لليرضى و الما يرضى و حجايتج هاي ما ينسكت عنها اني اخذ بتي و اطلع و اخابر ابوها اشوف يرضى ينكال على بته هيج كلام
-اسمعي ميعاد لا تكبرين السوالف و تفضحيها فوك ما هي مفضوحة
-مفضوحة عليكم البيه خير يمدها على بتي و شوف اذا ما علكتها بركبته، وكت التشوفيها مدخلته للبيت و خاينة ابنج وياه ذاك الوكت احجي غير هالحجي والله والله والله الدنيا فوك هالبيت اهجمها
-اني اعرفج شبيه تورطت و اخذت منج بنية
-و اطولوني انتم روحي لمي ابنج يفتر سكران والله عالم بمكسراته، عايشين دور الملائكة هواي شوية جناحكم عمي عمانه
اسمعي، لا تظلين تباوعين بعيوب العالم و عيبوكم مفضوحة عيب عليج، كومي ديار البسي خل نروح
مها :- خالة مو هيج الحجي هدو خل نتفاهم
ميعاد :- ليش هي عمتج خلت تفاهم ما تعرفيها انت ديار حتى تكولين عليها مو شريفة هالكلمة ما اسكت عنها
كامت مها تتوسل بام امجد و امي تنتر بيه حتى الم ملابسي و اروح وياها ، شافتني ابجي :- لطامة شبيج مسوية ذنب انت و خايفة جايبة الشبهه الروحج بخوفج منو يسوى و تخافين منه و تنزلين بدموعج الما يصدكج طز لا يصدك كافي اني اعرفج شنو امشي
ام امجد كلش ضاجت من امي وكفت تتعارك وياها شلون تكول عليها (طز )
ردتها امي :- و سبعين طز شمنتظرة مني اكلج عفية و اعذرينا و انت تكولين على بتي مو شريفة
ام امجد :- و الفجريات تحجي ويا صاحبها
-و اذا هو لازكلها و تخاف لان ابنج مهددها
-و ابني ليش يهدد لو هي ماعدها شي
-بنية و عافت التريدة و تزوجت و هي كل عمرها ٢٠ شتريديها نبي و ما تبجي و ابنج شكاك شلون تبجي كام يهدد بروسنا و سكتت لعيونكم الا بنية عروس و تتهدد منو يقبل بس غير كلت اقربائنة و عشرتنا حلوة و ما اريد اخبرها بس الظاهر محد يحترم و كل الكام و حاد نيابه على هالبنية
باعيها بضميرج هذا وجه عروس الحزن ماكل ملامحها لو هي مو شريفة مثل ما تكولين ما لعبت ع الحبلين و ضربت الدنيا بعرض الحايط و سعدت نفسها
بس هي غبية ضحت بروحها لهذا و ذاك و محد راضي
مها :- ميخالف خالة اكعدي اهدي و نحل الامر بهدوء فدوة ما نريدها تكبر
ميعاد :- ليش خالة هو منو رايدها تكبر منو يحب الفضيحة البته و سيرتها تصير على كل السان بس من ينكال عنها مو شريفة لا هنا ما نسكت، كافي ينسحك على راسنه و نسكت و نكول جيران و قربة و محد مقدر
ام امجد :- ميعاد انت ليش تصيرين باطله اني يا يوم ما مقدرتها و حاطتها على راسي بس منو يرضاها جنتي فجريات تحجي ويا اليحبها الفجر
ميعاد :- ليش تسأليني ما سمعتي منها ليش خابرت
ديار :- هو دزلي رسالة و اني خابرته حتى اوضحله اني ما الي علاقة بكل الموضوع و ابعد نفسي و بقى يهدد
ميعاد :- سمعتي ؟ بدال ما لازمة براس بنيتي و مخلية دموعها تكت روحي لومي ابن حماج تراها طلع ارواحنا، خلي ايدج بأيدي و ساعديني ابعده منها تره تعبت والله شسوي هو طايح حظ و ما جاي يجوز منها شتسوي ؟
ام امجد :- و تخابرة ؟
ميعاد :- اني ما اريد اظلمج و اكلج انت باطل ام امجد بس كتلج البنية صغيرة و ما عرفت تتصرف بس مو هيج تسوين بيها
ام امجد :- والله لا ضربتها ولا تعديت عليها كلت الها تجي امج و هي تحاسبج
-اني احاسبها و اكسر راسها ما اقبل الها الغلط بس ما اقبل تسوون بيها هيج لان هي ما غلطت بقصد،
بس حجايتج مال بتج و لو ما مخذتها مردودة عليج و كلش عيب وما ارضاها
بقت مها تهدي بين الطرفين، امي شافت عمتي بعدها ضايجة كامت و كالت :- كومي روحي وياي امشي
وكفت ام امجد كالتلها :- وين ماخذتها ؟
ميعاد :- لبيتي وين اخذها خوما اخليها هنا
ام امجد :-كتلناها لو خلينا الدم بطولها، لو اجا ابو امجد و سألني شكول ؟
-والله ام امجد تريدون تكبروها نكبرها لا احنه قليلين شر ولا كصيرين السان و ان ردوها صغيرة نصغرها و لم الموضوع بيناتنا و نمشيها
ام امجد :- ولو ما تابت ؟
-هي شسوت حتى اتوب لا تحجين هيج ترى ما اقبل، هاي كدامج و اخذي منها وعد شما يسوي لا تخابرة و تتوسله تجيج و انت تحلين الموضوع
-لو صدك هو متقرب منها و هي ماعدها شي اكلب الدنيا فوكاه و فوك اهله هي هم بتي و لو ما احبها ساعة العرفت اكعد زوجها و اسويها هوسة بس هي هم مثل بتي و عاشت عندي و ما ردت اظلمها بس و هاي هي تسمع والله ثم والله لو نعادت يا ديار اكبرها و ساعتها حتى امج ما تخلصج من ادين امجد و ابوه
-هي بنيتج و علميها شدي ورخي وياها و اني من زوجتها خليتها امانة عندج حالها حال بناتج الما ترضي عليهن لا ترضي عليهن
-هالمرة نعديها و نسدها بيناتنا بس خليها ابالج موبايلج عندي و افعالج مراقبتها افتهمتي
-هزيت راسي اي
ميعاد :- ايييه الله يدهي سركم اني اروح
طلعت و اني رحت وراها، دارتلي بخزرة :- لو شما اعلمج غبية اني مو كتلج ابعدي عنهم ولج لا تخابرين و لا تسألين ليش هيج ديار
-هو خابرني
-انجبي ولا كلمة زين ربج هسه و عدت ورضت المرة لو فاضحتج كبال رجلج و ابوه و الامة تتفرج احسن ؟ و تخلين الما يسوى يتشمت بيج
خالد لو شما يسوي ويهدد عوفي لا تبرريز ولا تحجين يثولة تلوفيها على روحج و توكع براسج، ليمتى ابقى اني اسد بيها و انت تفتگيها، كااافي
هزيت راسي
-اي ابقي ابقي هزهزي براسج جنج غراب افهمي عاد اتوعي شلعتي كلبي
-كافي افتهمت
-شفتهمتي هسه من اروح منج تفتكيها بمصيبة لخ ما استغرب اذا فد شوية لو اجا خالد تلبسين و تروحيله
-لا ما اروح
-اوووي يمه مشكورة ورحم الله والديج حيل مفضلة علينا على كيفج يمعودة
-يمة والله من البارحة منايمة تعبت كافي
-دصعدي نامي ولا تفكرين امج بظهرج لا تخافين
هزيت راسي سلمت عليه و طلعت
رجعت للبيت ام امجد بعدها ما تحجي وياي، كملت الغدا و كعدت الجهال على الافلام كارتون يم مها و صعدت لغرفتي انام.
ساعة نمت و فاتت ام امجد للغرفة كعدتني و كالت :- اسمعي اني من رضيت تبقين على ذمة ابني مو بهالبساطة و اني راح اراقبج كل يوم و اشوفج اي خطأ احجي لامجد كلشي ولا تتوقعين امج تخلصج لو درى امجد.
تعيشين وياه ما اريده ينقصه شي حاجته و امورة كلها تقضيها جهاله و مرته و الا والله يا ديار ما اسكتلج افتهمتي ؟
هزيت راسي (اي) ، رجعت حجت :- سيد جعفر منو ؟
-جيرانه بكربلاء
-شعندج وياه ؟
-ما عندي بس هم جانو ما مقصرين ويانا و امه تحبني
-مخابرج مرتين
-شيريد ؟
-ما ادري
-خل اخابره
-ممنوع موبايل ما الج
سكتت، كامت من عندي و كالت :- يلا انزلي كابلي جهال امجد كومي لا بس فالحة فجريات تخابرين
كمت من مكاني نزلت يمهم بس من النعاس نمت جوا، كعدتني و هي تصيحلي حتى اكوم لجهال امجد تعاركوا و حسوني طشر الشكر
كمت فاككتهم و غسلتهم و لميت و كعدت بعد ما اجاني النوم بس حيل دايخة، اجا ابو امجد كال جبنا خالد و هسه هو صحته زينة
اني اباوع على ابو امجد مركزة و هو يحجي انتبهت لعمتي و هي تخزر بيه، كمت من يمهم و بقيت بالمطبخ كاعدة
بالليل سمعت صوت باوعت، فايت خالد ووياه احمد، رايد يفوته للاستقبال خالد ما قابل كاعد بالهول
عمتي حيل تضايقت، فاتتلي للمطبخ كالتلي:- فوته جو ما تفوتين من كدامه افتهمتي ؟
هزيت راسي (اي) .. مشت و احمد صاح على جاي الهم، سويت الجاي و صحت على ام امجد تشيله، ما اجت ولا كأن سمعت
صحت على احمد يجي ياخذ الجاي صاح (جيبي شنو مستحية ) فتت الهم حطيت الجاي كبالهم، شلت راسي لخالد :- الحمدلله على سلامتك
باوعت ايده خنكتني العبرة، غوركت عيوني و اني احجي، هو مركز بيه، كال :- الله يسلمج اشوفج تعبتي نفسج و سألتي عني
باوعت لام امجد فاتت و هي تأشرلي اطلع، انداريت اطلع و خالد صاح و طلع دفتر من وراه خلاه على رجله ، انصدمت دفتر مذكراتي بأيدة رجفت و احس ضغي هبط من الخوف
حجه هو :- ديار امجد وين ؟
ام امجد :- شرايد منه ؟
خالد و هو يمسح ع الدفتر:- عندي شغل وياه
بقيت واكفة اباوع بعيونه تصنمت بمكاني، حجت ام امجد :- فوتي لمها ديار شوفيها شتحتاج
عمي شك اكو شي كام يباوع بالوجوه ، خالد مبتسم و يباوعلي بنظرات ماكرة ، طلعت منهم كل حيلي هابط
اديه ترجف:- لا خالد ما يسويها، اي اعرفه ما يسويها
مها نايمة تون و اني افتر يمها انضرب دماغي من الخوف كمت ما اشوف كدامي، لزمني وجع من يم ركبتي لنص راسي ذبحني كمت اضغط على راسي بس اريد الوجع يروح
افتر منا و منا ما عاد الالم يفاركني
اني اصلا قبل يوم ما نايمة سهرانه بمها واخذتها للمستشفى رجعت لاكيت مصيبة خالد هدت نص حيلي نمت ساعة و كعدت لثاني يوم نمت بس ساعتين .. ولا اكل ولا شرب صار يومين ما عدت اشوف كبالي شي
غوشت الدنيا بعيني ووكعت
انتهت على وكعتي فطومة بت ضحى راحت ركض لجدها تكله (جدو جدو ديال ماتت ) فكايم احمد و خالد راكضين بسرعة رايد يشيلني خالد احمد شايلني عنه بسرعة خلوني بالسيارة وعيت
احمد و خالد و ام امجد، و ابو امجد بقى بالبيت يم الجهال لان فرغ البيت، وعيت على ايد ام امجد و هي تضرب على خدي تريدني اصحى فتحت عيوني و اسمع خالد يكله :- احمد اطبك ع المضمد مو للمستشفى خل نسوف شبيها
ام امجد :- فتحت كعدت ما بيها شي
الفت خالد و هو يكللها :- فاقدة هاي احمد استعجل يمعوووود
عمتي كلش متضايقة من صعدت خالد بس هو ما داير بال حتى احمد من مانعه يجي وياهم لان هو مريض
وصلوني المضمد نزلوني
قاسلي الضغط نازل ٦ درجات
كايللهم شوفوها احتمال عدها فقر دم، ويحتاجلها مغذي، كايله خالد :- يعني ناخذها مستشفى ؟
كايله :- اذا تكدرون روحو بس اذا هاي عوفوها اليوم انطيها بس المغذي و باجر تروح دكتور اختصاص احسن
كلت الهم :- اريد ارجع لامي ودوني لامي
ام امجد :- احمد امشي خل ناخذها لامها
خالد :- لا نطلع بيها للمستشفى
ام امجد :- ارجع لبيتك خاله تلكى امك ضال بالها عليك روح
خالد :- امشي احمد
احمد :- صدك خالد خل نرجعها لامها هي باجر تاخذها للدكتور و تشوف شبيها
خالد :- من خر*** بطينتكم من هي بحيلها تريدوها و من وكعت رجعوها لامها تستاهل كل اليجرالها والله
حجه هالكلام بعصبية و طلع من المضمد اخذ تكسي وراح، و اني رجعوني لبيت امي لكيت اسامة منتظرني براس الفرع بس شاق سيارة احمد اجا ركض عليه
-شبيها ليش وكعت خالة شبيها ديار
نزلت كوة و امي واكفة بالباب بس صفو السيارة اجت علية ركض :- سودة علية بنيتي انهد حيلها يمة
اخذتني من ايد ام امجد و فوتتني جوة هي و اسامة، فاتت ام امجد امي كامت تحجي عليها :- شسويتي بيه ليش هيج شسوت و هيج سويتو بحالها موتو بتي يمه
ام امجد :-، على كيفج عيوني شسوينالها وهي واكفة وكعت لا احد جاي يمها ولا احد متكرب منها
ميعاد:- من القهر ذبحتوها لبنيتي كتلتوها ماتت من قهركم زواجة المصخمة عساها من ساعة الاخذتكم و بتي ما شافت الخير
كامت تحجي ام امجد ما قبلت امي كامت تترادد وياها، فات احمد سحب امه و تعذر من امي و كال الها :- احنا عود باجر نجي وناخذها للدكتور
كايلتله :- لا خلفت الله عليكم ما اريد من احد شي عوفو بتي و شوفوني اكفاكم موتوها من القهر لا اكل ولا نوم تريدوها بس للخدمة لحد ما وكعت
... عافو امي و طلعت، هي كابلتني و كعدت :- ها ديار يمه شصار وياج
كوة حجيت :- راسي يوجعني راح اموت
-اكوم ابدل و اخذج للمستشفى وجهج اصفر كركم صاير
اندكت الباب، طلع اسامه و امي تبدل، صوت خالد يكله :- شلونها ؟
اسامة :- امي راح تاخذها للمستشفى هسه وجهه كلش تعبان
-من ترجع تعال كلي اني راح اكعد بالسيارة ابابنا
اسامة :- ماشي
سد الباب، فاتت امي :- منو بالباب ؟
-خالد يسأل على ديار
-اله عين و يسأل هالناقص هذا خل يولي اطرده
-هو راح
.. اجت كومتني ووصت اسامة يبقى ويا اثار بالبيت و راحت للمستشفى قاسولي الضغط و سوولي تحليل دم
ضغطي هابط و دمي ناقص ، حطولي بطل مغذي ساعة و اني نايمة فاقدة من التعب ما ادري ..
الدكتور اجا يتفقد، يسألني كلت اله انو صارلي يومين مماكلة و نوم قليل كال :- صابها الايعاء
تحتاج راحة تامة و تغذية جيدة و ترجع توكف على حيلها
كتب لامي على فيتامينات ووصاها توكلني لحم و اكباد حتى دمي يستعدل و كال بالعافية
طلعنا امي اشترتلي لفة معلاكة و قوطية بيبسي و كالتلي اكلي، بس ما جنت اشتهي ابد ما انطيت اي ردة فعل اني و الميت سوا جثة هامدة من التعب
رجعتني للبيت جان خالد واكف براس الفرع و رافد واكف وياه، بس صفت سيارة امي، اجا رافد :- ها خير شبيها
ميعاد :- ليش هم خلو بيها خير دمروها للبنية
رافد :- من ايدها
ميعاد :- عفية ترا ما الي خلك احجي ويا احد كافي علية هبطت بتي فأبعد من طريقي بلا زحمة
خالد :- شسوولها
ميعاد:- والك عين تسأل شسولها ؟ ما كافي السويته بيها انت، اصالك على راي لو تحبها و تخاف عليها لو ابعد من طريقها و اكفيها شرك
ما رد عليها بس بقى يباوعلي نزلتني من السيارة دخلتني للبيت، خلتني ع السرير جنت تعبانة حيل
نمت ما دريت بالدنيا كل حيل ما بيه
لل٤ الفجر كعدتني امي و هي تكلي :- هاج بس احجي ويا خالد هرجني يريد يحجي وياج
كمت من مكاني فزيت، باوعتلي هي و النعاس بعيونها :- يغمة على اسمه تفزين
اخذت الموبايل منها و حطيته على اذاني، اسمعه يجر نفس مثل اليبجي، امي طلعت .. نزلت دموعي على انفاسة، حجه :- ليش كل هذا اللي دا يصير بينا ؟
شهكت ابجي:- باعي حالج وين وصل وباوعيني و كليلي ليش ؟ لا انر رايد ضحى و مرجعها و لا انت المتقبلة رجلج و صايرتله مرة ليش فهميني
-تهددني بمذكراتي !!
-ومن هاي وكعتي يعني بسببي
-لا صارلي يومين مماكلة ولا نايمة هبط ضغطي وتعب حالي، تعبت خالد والله تعبت
-تعبتي مني
-من كلشي تعبت
-تكدرين اطلعين هسه
- لا احد يشوفني
-لا تخافين من احد و لا تخلين احد على بالج كافي كد ما تفكرين بهذا وذاك ادمرنا، انتظرج برا قفل الجهاز
كمت من مكاني عفت الموبايل لبست اي شي طلع كبالي، فتحت الباب و طلعت ، لكيته اباب المحل
باوعت بالفرع ماكو احد، مشيت لراس الشارع و هو تبعني بسيارته، صعدت وياه، انطلق بالسيارة بكل سرعتها
غمضت ، حجه :- مستعدة تموتين ؟
فتحت باوعتله :- والله اتمنى
-تتمنين تموتين بس ما تتمنين ترجعيلي
-اكو غيري هواي احلى و اغنى عوفني
-ما حبيت لغاية حتى ادور اذا اكو احسن منج لو احجي منا لمية سنة ما راح تفهمين البداخلي الج شنو بعمري لا تمسكت بوحدة ولا ذليت نفسي بهالشكل
-انت ما جاي تذل بروحك انت جاي تدوس علية و تأذيني
-ما اذيتج وحدج اذيت روحي وياج، كافي ديار لخاطر الله كافي عوفي هالزواج عوفيه ما تعبتي منهم
-عفته و شيصير ؟ ينحسب عليه زواج و ارجع وياك و ترجع مرتك تتوسلني وامك تعيرني و اهلك شايفيني عار و مها مريضة وتنخاني !
-وكل ذولة اهم مني ؟
-الحب وحدة ما يكفي كل مرة اتعيرني بيها امك والله اكره حبي وياك لان اكوم اقارن نفسي بيك و اتعب احس اني اقل من انو تحبني
- كلت الج معليج
-مو بالكيف ما اكدر لا تكلي لا تهتمين اني اهتم مرتك اذا تحبني صدك رجعها و اسعد بناتك و عوفني
-و اني ؟
-عيش مثل ما اني جاي اعيش و امشيها كوة
-ما مجبورين ديار افهمي كافي انهيها
-ما اكدر
-اذا ما تكدرين ليش لهسة انت ما متقبلة رجلج ؟
-بسببك، ليش نسيت السويته بية تقربتلي قبل عرسي بيومين لا كدرت اتارجع و لا اكمل زواجي و اتقبله انت دمرتني
اخذ نفس:- يعني رايدته
-ورايدة ترجع لعائلتك، حبنا ما راهم خالد و مو كل حب يرهم هي الدنيا هيج لازم نرضى بالواقع ونتعايش
-هذا قرارج ؟
-قررت من زمان الريدته بس تبتعد عني و بس
وكف السيارة :- راجعت اليوم كل ورقة بمذكراتج كل كلمة بهاي المذكرة ولا كأن انت الكتبتيها حبج ذاك وين راح
-حبي الك نفسه هو ما تغير مثل الكنز كلش ثمين بالنسبة الية ما اقبل اشاركه مع اي احد لهذا الكنوز تدفن
بقى يباوع بوجهي :- راح يأذيج و راح يستغل وضعج حجة حتى يخون بعمره ما راح يفهمج ولا يحتويج و يبقى الشك بداخله لان حبي عمره ما راح يروح من عيونج كل اللي راح يباوعلج يلكاني بنص عيونج.
-ما رايدة من احد شي مكتفية بهالحب النفسي
-هذا اخر قرار الج ؟
-اي
-شكد ضجت منج و كل لحظة مرت افكر انتقم بيها منج على كد الاذية الشفتها منج من غدرتيني بس ما كدرت اكرهج، توقعت من راح اتقرب منج راح تبطلين هالزواج و تعوفين بس ما عفتي
ذبحتيني يومين اني ما ادري بروحي وين رحت ووين اجيت بناتي ما داري عنهم و اتزوجتي و ما حسبتيلي حساب حسيت اني ارخص انسان على هالكاع بعد ما جنت عايش بوهم مذكراتج الوصفتلي شكد اني اهم انسان بحياتج
حاولت و حاولت و حاولت و كلت غبية هسة تصحى على روحها و تتراجع اتزوجتي و بقى عندي امل تتراجعين و ما تراجعتي
لهنا و اتوقف وياج
بحياتي بعد لا ادخل بحياتج ولا الي شغلة بيج
هنا وانت انتهيتي بالنسبة الية
خل اطمنج اني ما تقربت منج بمجرد ما وصلت و انصدمت بيج انت بنية انسحبت بدون ما اكمل اي شي وياج فلا تتوقعين تحبلين ولا تعيشين هالاوهام اني جنت احجي هيج حتى اعيشج شعور الخيانة العيشتينياه ، ما سويت شي الصار جان غلطة و بلحظة عصبية
الظاهر نزلت بروحي هواي روحي يبنت الناس اني الجنت وهمان مو انت ..
-مو هيج
-لا تبررين .. عرفت قيمتي تريديني ابتعد
بالخدمة ابتعد و ما اطلع كبالج بعد
تتهنين بالاختاريتي وفضلتيه عليه
-ما فضلت .....
سكتني :- اقفلي على الموضوع بعد
وصلني للباب مال البيت، ردت انزل، التفتت اله :- المذكرات
هو مدنك باوعلي بنظرة يأس، حجه :- وصيت اسامة يخليهم بغرفتج
،-يا غرفة !!
-اللي ابيت عمي
-مع السلامة
شخط السيارة و طلع من كدامنا
فتت للبيت، محد كاعد، رجعت افكر بكل كلامه و لهفته وردات فعله كلها ابالي ، اخذت نفس تنهدت، نطقت :- الكنوز تدفن
نزلت ادموعي و تمددت بفراشي:- الله يوفقه هو من الاساس ما جان الي اني التحلمت بيه هواي لحد ما خليته يعيش الحلم اللي اني تحلمته بس دفعت ثمن هالحلم هواي .. ولليوم اني ادفع
الصبح كلت لاسامة على دفتر المذكرات كال:- اي خليته بغرفتج انطانياه خالد بالليل و كال رجعه
-تكدر تروح تجيبه ؟
ما حجه، لبس وراح لبيت ابو امجد حتى يشوف المذكرات ... شوية و رجعلي :- ديار ما لكيته ماكو
-شنو ماكو ؟
-اني خليته ع الميز البارحة بس هسه ماكو
كمت من مكاني ، حجت امي :- شكو ؟
-دفتر مذكراتي ماكو
-يا مذكرات انوب يمعزاية
-الجانن عد خالد رجعهن للغرفة و هسه ماكو
-عزا العزاج كون و هالمذكرات ما حاركتهن ولج انت اذا نا حبتي نهايتنا ما ترتاحين وينع ولج
-لازم اروح اشوفه
-شتشوفين و اني البارحة متعاركة وياهم
-معليج لازم اروح
لبست و طلعت لبيت ام امجد، اول ما دخلت لكيت ام رافد عدنا بالبيت ، سلمت عليهم و رحت لعمتي بست راسها و كلت الها :- اعتذر عن كلام امي من خوفها عليه حجت هالحجي
هزت راسها و كالت :- شلون صرتي انت ؟
-زينة
-اصعدي لغرفتج ارتاحي ولا تنسين الوصيتج عليه
-صعدت فوك لغرفتي نفضتها نفض دفتر المذكرات ماكو
عزا العزاني بيوم كتبت عالمذكرات المصخمة وورطت روحي، هسه وين الكاهن اني
نزلت للبيت حتى اسأل عمتي اذا تعرف بيه راح تحجي بيه وياي و اءا ما تدري بيه يعني مو عدها، انزل و هم الكا ام رافد اممده بغرفة مها
رحت لعمتي بالمطبخ:- خالة ام رافد شعدها عدنا
-متعاركة البارحة بالليل ويا ابو رافد
-على موديش ؟
-عرفت هو متزوج عليها و متعاركين غالطة عليه كاتلها رايدة تروح لاخوتها جابها عمج هنا تبقى لما يحل الموضوع هو
-راح تبقى عدنا يعني ؟
-اي
-زين خالة اكو دفتر الية مسجلة بيه ملاحظات مال كلية مالتي ما شايفته ؟
-لا والله ما صاعدة الغرفتج
التفتت عنها :- عزااا العزاني دفتر مذكراتي وينه ؟....يتبع

☆☆☆☆☆☆

تعليقات

إرسال تعليق

اهلاً وسهلاً بقرائنا الكرام نتشرف بكم في مدونتا ارجو الاشتراك في مدونتنا ليصلكم كل ماهو جديد تحياتي لكم